WAKANER:વાંકાનેર ડ્રાયફ્રૂટ્સના ધંધામાં ઊંચા નફાની લાલચ આપી યુવાન સાથે 6 લાખની છેતરપિંડી
WAKANER:વાંકાનેર ડ્રાયફ્રૂટ્સના ધંધામાં ઊંચા નફાની લાલચ આપી યુવાન સાથે 6 લાખની છેતરપિંડી
વેપારી સંબંધો કેળવી રાજકોટના શખ્સે વાંકાનેરના યુવાનને વિશ્વાસમાં લઈ નાણાં ઓળવી લીધા; પોલીસે ગુનો નોંધી તપાસ હાથ ધરી
વર્તમાન સમયમાં વેપારી અને પારિવારિક સંબંધોનો ગેરફાયદો ઉઠાવી વિશ્વાસઘાત કરવાની ઘટનાઓ સતત વધી રહી છે. આવો જ એક કિસ્સો વાંકાનેરમાં પ્રકાશમાં આવ્યો છે, જ્યાં ડ્રાયફ્રૂટ્સના વ્યવસાયમાં રોકાણ કરી ટૂંકા સમયમાં મોટો નફો મેળવવાની લાલચ આપી એક યુવાન સાથે રૂ. 6,00,000ની છેતરપિંડી આચરવામાં આવી છે.
વાંકાનેર તાલુકાના નવા કણકોટ ગામે રહેતા અને જૂની દાણાપીઠ રોડ પર આવેલી એક પેઢીમાં એકાઉન્ટન્ટ તરીકે ફરજ બજાવતા અયુબભાઈ ઈસ્માઈલભાઈ શેરશીયા (ઉ.વ. 32) એ રાજકોટના સબીરહુશેન મોહમદભાઈ કાસમાણી (રહે. ન્યુ ઘાંચીવાડ) વિરુદ્ધ વાંકાનેર સીટી પોલીસ સ્ટેશનમાં ફરિયાદ નોંધાવી છે.ફરિયાદ મુજબ, આરોપી સબીરહુશેને અયુબભાઈ સાથે પ્રથમ વેપારી અને પારિવારિક સંબંધો કેળવ્યા હતા. ત્યારબાદ પોતાનો કાજુનો મોટો ધંધો હોવાનું જણાવી તેમાં રોકાણ કરવાથી ટૂંકા ગાળામાં જંગી નફો મળશે તેવી લાલચ આપી હતી.આરોપીની વાતોમાં આવી જઈને ફરિયાદી અયુબભાઈએ અલગ-અલગ તારીખે નાણાંનું રોકાણ કર્યું હતું:તા. 15/06/2025: રૂ. 1,00,000 (એક લાખ)
તા. 16/06/2025: રૂ. 5,00,000 (પાંચ લાખ) આમ, કુલ રૂ. 6,00,000 ની રકમ આરોપીની ‘ફાઈવસ્ટાર ડ્રાયફ્રુટ’ પેઢીના સ્મોલ ફાઈનાન્સ બેંકના કરંટ એકાઉન્ટમાં RTGS મારફતે ટ્રાન્સફર કરવામાં આવી હતી.પૈસા મેળવી લીધા બાદ આરોપીએ વાયદા મુજબ નફો તો ન આપ્યો, પરંતુ મૂળ રકમ પણ પરત કરી નહોતી. લાંબા સમય સુધી નાણાં પરત ન મળતા છેવટે અયુબભાઈએ છેતરપિંડીનો અહેસાસ થતા પોલીસનો સંપર્ક કર્યો હતો. વાંકાનેર સીટી પોલીસે આરોપી સબીરહુશેન વિરુદ્ધ વિશ્વાસઘાત અને છેતરપિંડીનો ગુનો નોંધી આગળની કાયદેસરની તપાસ શરૂ કરી છે.
