નરોડાના નોબલનગરમાં તસ્કરોનો આતંક: ઉનાળાની રજાઓ દરમિયાન બંધ મકાનો બન્યા ચોરોના નિશાન
રિપોર્ટર
હિતેન્દ્ર ગોસાઈ
અમદાવાદ
અમદાવાદ શહેરના નરોડા વિસ્તારમાં આવેલ નોબલનગર ટેનામેન્ટની મધુરિકા પાર્ક સોસાયટીમાં ચોરીની ઘટના સામે આવતા સ્થાનિક રહિશોમાં ભય અને ચિંતા ફેલાઈ ગઈ છે. ઉનાળાની રજાઓ દરમિયાન અનેક પરિવારો બહારગામ જતા હોવાથી બંધ રહેલા મકાનો હવે તસ્કરો માટે સરળ નિશાન બની રહ્યા હોવાનું ફરી એકવાર સ્પષ્ટ થયું છે.
મળતી માહિતી અનુસાર, આજ રોજ ૨૦ મે, ૨૦૨૬ની વહેલી સવારે મધુરિકા પાર્ક સોસાયટીમાં આવેલા બે મકાનોના તાળા તૂટેલા હાલતમાં જોવા મળ્યા હતા. સોસાયટીના રહિશોએ શંકાસ્પદ સ્થિતિ નિહાળી મકાનમાલિકોનો સંપર્ક કર્યો હતો, ત્યારબાદ સમગ્ર બનાવ બહાર આવ્યો હતો. પ્રાથમિક તપાસ મુજબ અજાણ્યા તસ્કરોએ મુખ્ય દરવાજાના તાળા તોડી મકાનમાં પ્રવેશ કર્યો હતો અને અંદરથી કિંમતી વસ્તુઓની ચોરી કરી હોવાનું અનુમાન છે.
હાલ બંને મકાનમાલિકો પરિવાર સાથે બહારગામ હોવાને કારણે કેટલા મુદ્દામાલની ચોરી થઈ છે તેની ચોક્કસ માહિતી હજુ સુધી સામે આવી નથી. પોલીસના મતે મકાનમાલિકો પરત ફર્યા બાદ જ સોનાચાંદીના દાગીના, રોકડ રકમ તેમજ અન્ય કિંમતી સામાનની સંપૂર્ણ વિગતો જાણી શકાશે.
ઘટનાની જાણ થતા જ નરોડા પોલીસ તથા નોબલનગર પોલીસ ચોકીની ટીમ તાત્કાલિક ઘટનાસ્થળે પહોંચી હતી. પોલીસે સ્થળનું નિરીક્ષણ કરીને ફોરેન્સિક તપાસની કાર્યવાહી હાથ ધરી હતી. સાથે જ આસપાસના વિસ્તારોમાં લગાવવામાં આવેલા CCTV કેમેરાના ફૂટેજ ચકાસવાની પ્રક્રિયા પણ શરૂ કરવામાં આવી છે. પોલીસ દ્વારા શંકાસ્પદ હિલચાલ અને વિસ્તારમાં છેલ્લા કેટલાક દિવસોમાં દેખાયેલા અજાણ્યા લોકો અંગે પણ માહિતી એકત્રિત કરવામાં આવી રહી છે.
સ્થાનિક રહિશોના જણાવ્યા મુજબ છેલ્લા કેટલાક સમયથી ઉનાળાની રજાઓ દરમિયાન બહારગામ જતાં પરિવારોના બંધ મકાનો તસ્કરો માટે સરળ ટાર્ગેટ બની રહ્યા છે. રહિશોએ સોસાયટી વિસ્તારમાં રાત્રિ પેટ્રોલિંગ વધારવાની તેમજ ખાનગી સિક્યુરિટી વ્યવસ્થા વધુ મજબૂત બનાવવાની માંગ કરી છે.
પોલીસે નાગરિકોને સાવચેત રહેવા અપીલ કરતા જણાવ્યું છે કે લાંબા સમય માટે બહારગામ જતા પહેલા નજીકના પડોશીઓને જાણ કરવી, CCTV અને ડિજિટલ સુરક્ષા સાધનો સક્રિય રાખવા તેમજ કોઈ પણ શંકાસ્પદ વ્યક્તિ કે હલચલ જણાય તો તાત્કાલિક પોલીસ કંટ્રોલ રૂમ અથવા નજીકના પોલીસ સ્ટેશનનો સંપર્ક કરવો.
આ બનાવે ફરી એકવાર શહેરમાં ઘરફોડ ચોરીની વધતી ઘટનાઓ સામે સુરક્ષા વ્યવસ્થાને લઈને અનેક પ્રશ્નો ઉભા કર્યા છે. સ્થાનિક લોકો હવે પોલીસ દ્વારા ઝડપી તપાસ અને તસ્કરોની વહેલી તકે ધરપકડની આશા રાખી રહ્યા છે.
