વાત્સલ્યમ સમાચાર
મદન વૈષ્ણવ
નવસારી એસ.ઓ.જી.ની મોટી કાર્યવાહી : બે રીઢા આરોપીઓ પાસેથી 19 તલવારો જપ્ત, એકની ધરપકડ
નવસારી જિલ્લા પોલીસના સ્પેશિયલ ઓપરેશન ગ્રુપ (એસ.ઓ.જી.) દ્વારા કાયદો અને વ્યવસ્થા જાળવવા હાથ ધરાયેલા ખાસ અભિયાન દરમિયાન બે રીઢા આરોપીઓ પાસેથી 19 તલવારો સાથે એક આરોપીની ધરપકડ કરવામાં આવી છે.
પોલીસને મળેલી બાતમીના આધારે એસ.ઓ.જી. ટીમે કાલોલ-ગાંધીનગર વિસ્તારના રહેવાસી દેવલાલ ભાનુભાઈ મારવાડી (ઉ.વ. 24) અને ભોલીયા આત્મારામ મારવાડી (ઉ.વ. 25) અંગે તપાસ હાથ ધરી હતી. તપાસ દરમિયાન આરોપીઓ પાસેથી જાહેરમાં પ્રદર્શન કે ગુનાહિત પ્રવૃત્તિઓમાં ઉપયોગ થઈ શકે તેવી 19 તલવારો મળી આવી હતી.
પોલીસે અંદાજે રૂ. 76,000ની કિંમતનો મુદ્દામાલ કબજે કરી વધુ કાર્યવાહી હાથ ધરી છે. આ કાર્યવાહી દરમિયાન એક આરોપીને ઝડપી પાડવામાં આવ્યો હતો, જ્યારે અન્ય આરોપીની શોધખોળ ચાલુ હોવાનું જાણવા મળ્યું છે.
પોલીસ તપાસમાં સામે આવ્યું છે કે બંને આરોપીઓ અગાઉ પણ વિવિધ ગુનાઓમાં સંડોવાયેલા રહી ચૂક્યા છે. આરોપીઓ વિરુદ્ધ અલગ-અલગ પોલીસ મથકોમાં ગંભીર ગુનાઓના કેસ નોંધાયેલા હોવાનું પણ ખુલ્યું છે.
આ સમગ્ર કાર્યવાહી પોલીસ ઇન્સ્પેક્ટર આર.એસ. પટેલના માર્ગદર્શન હેઠળ એસ.ઓ.જી.ની ટીમ દ્વારા કરવામાં આવી હતી. નવસારી પોલીસે જણાવ્યું છે કે જિલ્લામાં શાંતિ અને કાયદો-વ્યવસ્થા જાળવવા માટે આવા વિશેષ અભિયાનો આગામી સમયમાં પણ ચાલુ રહેશે.
