ધવલીવેર ગામમાં ગેરકાયદેસર દારૂ, જુગાર અને અસામાજિક પ્રવૃત્તિઓ સામે ગ્રામજનો એકજૂથ, તંત્રને આવેદન પત્ર આપ્યું,
ધવલીવેર ગામમાં ગેરકાયદેસર દારૂ, જુગાર અને અસામાજિક પ્રવૃત્તિઓ સામે ગ્રામજનો એકજૂથ, તંત્રને આવેદન પત્ર આપ્યું,
વાત્સલ્યમ સમાચાર
જેસિંગ વસાવા : સાગબારા
સાગબારા, નર્મદા: નર્મદા જિલ્લાના સાગબારા તાલુકાના ધવલીવેર ગામમાં ગેરકાયદેસર દારૂના વેચાણ, જુગાર અને અન્ય અસામાજિક પ્રવૃત્તિઓ સામે ગ્રામજનો એકજૂથ બન્યા છે. ગામના સરપંચ, ગ્રામ પંચાયતના પ્રતિનિધિઓ, વડીલો, મહિલાઓ અને યુવાનો સહિત મોટી સંખ્યામાં ગ્રામજનોએ સાગબારા પોલીસ સ્ટેશનના સબ પોલીસ ઇન્સ્પેક્ટર, મામલતદાર, પ્રાંત અધિકારી, જિલ્લા કલેક્ટર તેમજ જિલ્લા પોલીસ અધિક્ષક (એસપી)ને સામૂહિક આવેદનપત્ર આપી તાત્કાલિક અને કડક કાર્યવાહી કરવાની માંગ કરી છે.
ગ્રામજનોના જણાવ્યા અનુસાર ગામમાં લાંબા સમયથી ગેરકાયદેસર દારૂનું વેચાણ, જુગાર તથા અન્ય અસામાજિક પ્રવૃત્તિઓ ચાલી રહી હોવાની અનેક રજૂઆતો છતાં અસરકારક કાર્યવાહી થતી નથી. પરિણામે યુવાનો વ્યસનની ચપેટમાં આવી રહ્યા છે, પરિવારો પર સામાજિક અને આર્થિક અસર પડી રહી છે તેમજ ગામની શાંતિ અને કાયદો-વ્યવસ્થાની સ્થિતિ પર પણ પ્રશ્નો ઊભા થયા છે.
આવેદનમાં ગેરકાયદેસર દારૂના વેચાણ, જુગાર અને અન્ય ગેરકાયદેસર પ્રવૃત્તિઓમાં સંડોવાયેલા તત્વો સામે કડક કાયદેસરની કાર્યવાહી કરવાની, ગામમાં નિયમિત પોલીસ પેટ્રોલિંગ વધારવાની, વ્યસનમુક્તિ અને જનજાગૃતિ અભિયાન શરૂ કરવાની તેમજ ગુનાખોરી પર નિયંત્રણ માટે વિશેષ અભિયાન ચલાવવાની માંગ કરવામાં આવી છે.
ગ્રામજનોએ વધુમાં ચેતવણી આપી છે કે જો સ્થાનિક તંત્ર દ્વારા ટૂંક સમયમાં અસરકારક કાર્યવાહી કરવામાં નહીં આવે તો તેઓ ગુજરાતના પોલીસ મહાનિદેશક (DGP), ગૃહ વિભાગ અને રાજ્ય સરકાર સમક્ષ પણ રજૂઆત કરી કાયદેસર અને લોકશાહી રીતે આગળની લડત ચલાવશે.
મુખ્ય માંગણીઓ:
ગેરકાયદેસર દારૂના વેચાણ પર તાત્કાલિક રોક લગાવવામાં આવે.
જવાબદાર વ્યક્તિઓ સામે કડક કાયદેસરની કાર્યવાહી કરવામાં આવે.
ગામમાં નિયમિત પોલીસ પેટ્રોલિંગ વધારવામાં આવે.
યુવાનો માટે વ્યસનમુક્તિ અને જનજાગૃતિ અભિયાન શરૂ કરવામાં આવે.
ગ્રામજનોની રજૂઆતનો સમયમર્યાદામાં નિકાલ કરવામાં આવે.
ધવલીવેર ગામના લોકોની આ સામૂહિક રજૂઆતથી હવે તંત્ર શું પગલાં ભરે છે તેના પર સમગ્ર વિસ્તારની નજર મંડાઈ રહી છે.
