વેલંજા કેશડોલ સહાયમાં ગેરરીતિના આક્ષેપો તેજ: રૂ. 6,800 સામે રૂ. 5,000 ચૂકવાયાનો દાવો, કેટલાક પરિવારોને સહાય જ નહીં મળ્યાનો આક્ષેપ
સુરત, પ્રતિનિધિ :
સુરત શહેરના વેલંજા વોર્ડ નંબર-2 વિસ્તારમાં ભારે વરસાદ બાદ સરકાર દ્વારા અસરગ્રસ્ત પરિવારોને આપવામાં આવેલી કેશડોલ સહાયને લઈને ગંભીર પ્રશ્નો ઊભા થયા છે. સ્થાનિક રહીશોના આક્ષેપ મુજબ સરકાર દ્વારા જાહેર કરાયેલી રૂ. 6,800ની સહાયના બદલે અનેક પરિવારોને માત્ર રૂ. 5,000 જ આપવામાં આવ્યા છે, જ્યારે કેટલાક પાત્ર પરિવારોને આજદિન સુધી એક પણ રૂપિયાની સહાય મળી નથી.
રહીશોના જણાવ્યા અનુસાર આ મુદ્દે વોર્ડ નંબર-2ના કોર્પોરેટર મનીષાબેન ખેરના પતિ પ્રફુલભાઈ ખેરનો ટેલિફોનિક સંપર્ક કરવામાં આવ્યો હતો. રહીશોના દાવા મુજબ તેમણે જણાવ્યું હતું કે, ભારે વરસાદ દરમિયાન વેલંજા પ્રાથમિક શાળામાં સ્થળાંતરિત કરાયેલા પરિવારોના રહેવા, જમવા અને અન્ય વ્યવસ્થાના ખર્ચ પેટે રૂ. 1,800 કપાઈ ગયા હોવાથી તેમને રૂ. 5,000ની સહાય આપવામાં આવી છે.
આ નિવેદન બાદ સ્થાનિકોમાં ભારે રોષ જોવા મળી રહ્યો છે. રહીશો સવાલ ઉઠાવી રહ્યા છે કે કુદરતી આફત સમયે સરકાર દ્વારા સુરક્ષાના હેતુથી સરકારી શાળામાં આશ્રય આપવામાં આવે છે, તો શું તે બદલ સહાયની રકમમાંથી ખર્ચ કપાત કરવાનો કોઈ સત્તાવાર નિયમ છે? ઉપરાંત, કેટલાક પાત્ર પરિવારોને એક પણ રૂપિયાની સહાય ન મળવા પાછળનું કારણ શું છે તે અંગે પણ સ્પષ્ટતા કરવાની માંગ ઉઠી છે.
સ્થાનિકોએ સમગ્ર મામલે જિલ્લા વહીવટી તંત્ર અને સંબંધિત વિભાગ દ્વારા નિષ્પક્ષ તપાસ કરી કેશડોલ સહાયના લાભાર્થીઓની યાદી, ચૂકવાયેલી રકમ અને ચુકવણીની પ્રક્રિયા જાહેર કરવાની માંગ કરી છે. જો સહાયના વિતરણમાં કોઈ ગેરરીતિ થઈ હોવાનું સામે આવે તો જવાબદારો સામે કડક કાયદેસરની કાર્યવાહી કરવાની પણ માંગ કરવામાં આવી છે.
(નોંધ: ઉપરોક્ત વિગતો સ્થાનિક રહીશોના આક્ષેપો અને દાવાઓ પર આધારિત છે. સંબંધિત સરકારી તંત્ર અથવા કોર્પોરેટર પક્ષનો સત્તાવાર પ્રતિભાવ પ્રાપ્ત થાય તો તેને પણ સમાન મહત્વ સાથે પ્રકાશિત કરવામાં આવશે.)
રિપોર્ટર : કલ્પેશ ધામેલીયા કામરેજ સુરત
