Rajkot: હેમુ ગઢવી હોલ ખાતે રાજ્ય કક્ષાની સાહસિક પ્રવૃત્તિ પ્રોત્સાહન શિબિરનો શુભારંભ કરાયો
તા.૧૭/૩/૨૦૨૫
વાત્સલ્યમ્ સમાચાર
ફાયર સેફટી, સાઇબર સિક્યુરિટી સહિતની આપાતકાલીન સ્થિતિઓ વિશે ૪૦૦થી વધુ બહેનોને માર્ગદર્શન અપાયું
Rajkot: જિલ્લા યુવા અને સાંસ્કૃતિક પ્રવૃત્તિ કચેરી, રાજકોટ દ્વારા રાજ્ય કક્ષાની સાહસિક પ્રવૃતિ પ્રોત્સાહન શિબિરનું આયોજન કરવામાં આવ્યું છે. જેના શુભારંભ પ્રસંગે હેમુ ગઢવી હોલ ખાતે આપાતકાલીન પરિસ્થિતિ વિશે એસ.ડી આર.એફ ની કંપની એસ.આર.પી. ગ્રુપ ૧૩ ઘંટેશ્વર દ્વારા તાલીમ આપવામાં આવી હતી.
શિબિરમાં સાયબર પોલીસ સ્ટેશનના પી.એસ.આઇ. શ્રી વેગડ દ્વારા સાયબર સિક્યુરિટીની તથા રાજકોટ મહાનગર પાલિકાના ફાયર ઓફિસર શ્રી તેજસ ગઢવી દ્વારા ફાયર સેફ્ટી અંગે માહિતી તથા માર્ગદર્શન આપવામાં આવ્યું હતું.
જ્યારે રેડ ક્રોસ સોસાયટીના ફર્સ્ટ એઈડ ટ્રેનર શ્રી બીપીનભાઈ લો અને રહીમભાઈ દલ દ્વારા તમામ શિબિરાર્થીઓને આપાતકાલીન સમયે દવાઓ અને અન્ય સાધનોના ઉપયોગ વિષે ટ્રેનિંગ આપવામાં આવી હતી. શુભારંભ સત્ર બાદ હવે શિબિરાર્થીઓને તા. ૧૮ થી ૨૧ દરમિયાન ઓસમ ડુંગર પાટણવાવ ખાતે પર્વતારોહણ, રોક ક્લમ્બિંગ, એડવેન્ચર તથા સાહસિકતાની મૂળભૂત તાલીમ આપવામાં આવશે.
આ શિબિરમાં કણસાગરા કોલેજ, મહિલા કોલેજ, એમ.પી.શાહ આર્ટસ એન્ડ સાયન્સ કોલેજ તેમજ ભાવનગરની પુરુષાર્થ એકેડમીના સભ્યો મળી કુલ ૪૦૦ બહેનોએ ભાગ લીધો હતો, તેમ જિલ્લા યુવા વિકાસ અધિકારીશ્રી એચ.વી. દિહોરાની યાદીમાં જણાવાયું છે.
