વાત્સલ્યમ્ સમાચાર.
રિપોર્ટ :- રમેશ મહેશ્વરી – ભુજ કચ્છ.
ભુજ,તા-૨૯ નવેમ્બર : બાળકો જ્યારે કોઈ જન્મજાત ખામીનો ભોગ બને ત્યારે પરિવાર ચિંતિત બની જતો હોય છે. આવા બાળકોની ચિંતામાં રાજ્ય સરકાર રાષ્ટ્રીય બાળ સ્વાસ્થ્ય કાર્યક્રમના માધ્યમથી હરહંમેશ સહભાગી બની પરિવારજનોની મુશ્કેલીઓ દૂર કરવા સતત પ્રયત્નશીલ રહી છે. રાજ્યનું દરેક બાળક તંદુરસ્ત રહે તે માટે “રાષ્ટ્રીય બાળ સ્વાસ્થ્ય કાર્યક્રમ” હેઠળ ઘરે-ઘરે જઈને દરેક બાળકની આરોગ્યની તપાસ હાથ ધરવામાં આવે છે. આ કાર્યક્રમના પરિણામે અનેક નાદુરસ્ત બાળકોને નવજીવન મળ્યું છે. જેમાં કચ્છના મુન્દ્રા તાલુકાના ભુજપુર ગામની ૧૦ વર્ષની રાધા રવિભાઈ સથવારાની જન્મ જાત હૃદયની ખામીની આ યોજના હેઠળ સફળ શસ્ત્રક્રીયા થતાં જ રાધાને નવજીવન મળ્યું હતું.આ બાબતે આર.બી.એસ.કે. ટીમના ડૉ. સંજયભાઈ યોગી દ્વારા જણાવવામાં આવ્યું હતું કે, કચ્છમાં CDHO શ્રી ડૉ. મિતેષ ભંડેરી તથા મુન્દ્રા તાલુકા આરોગ્ય અધિકારીશ્રીના માર્ગદર્શન હેઠળ શાળા આરોગ્ય પ્રોગ્રામ અંતર્ગત વિવિધ શાળાઓમાં બાળકોની શારીરિક તપાસ કરવામાં આવી રહી છે. જેમાં મુન્દ્રા તાલુકાની ભુજપુર કન્યા શાળામાં આર.બી.એસ.કે. ટીમ દ્વારા શાળા આરોગ્ય કાર્યક્રમ અંતર્ગત બાળકોની તપાસ હાથ ધરવામાં આવી હતી. વિવિધ બાળકોનું સ્ક્રીનીંગ કરી જન્મજાત ખામીને દૂર કરવા યોગ્ય સારવાર સાથે યોગ્ય માર્ગદર્શન આપવામાં આવ્યું હતું. જેમાં ૧૦ વર્ષની રાધા રવિભાઈ સથવારાની તપાસ કરતાં જન્મ જાત હૃદયની ખામી છે તેવું જાણવા મળ્યું હતું. આ બાબતની જાણ થતાં પરિવાર ચિંતામાં મુકાઈ ગયો હતો. ડો. સંજય યોગીએ ઉમેર્યું હતું કે, રાધાની સામાન્ય તપાસ જી.કે જનરલ હોસ્પિટલમાં કરવામાં આવી હતી. બાળકીને વધુ સારવાર માટે અમદાવાદની યુ.એન. મહેતા હોસ્પિટલ ખાતે રીફર કરવામાં આવી હતી.આર.બી.એસ.કે.ટીમ મુન્દ્રા તેમજ ડૉ.સંજય યોગી, અવની બેન્કર, એફ.એચ.ડબ્લ્યુ મનીષાબેન અને આર.એક્સ આકાંક્ષાબેનની ટીમ દ્વારા ખડેપગે રહી બાળકીની તાત્કાલિક ધોરણે સારવાર કરાવવામાં આવી હતી. આર.બી.એસ.કે યોજના અંતર્ગત યુ.એન.મહેતા હોસ્પિટલ- અમદાવાદમાં નિષ્ણાંત ડૉક્ટરોની ટીમ દ્વારા રાધાની સફળ શસ્ત્રક્રિયા કરવામાં આવતાં હાલ રાધા સ્વસ્થ જીવન જીવી રહી છે. સરકાર દ્વારા આ કાર્યક્રમ થકી કોઇ પણ ગંભીર બીમારીમાં બાળકોને સ્વાસ્થ્ય પ્રદાન કરી તંદુરસ્ત બાળ અને તંદુરસ્ત સમાજની વિભાવના ખરા અર્થમાં સાર્થક કરી બતાવી છે.
આ સંદર્ભે બાળકીના પરિવારે જણાવ્યું હતું કે, આર.બી.એસ.કે ટીમના માર્ગદર્શનથી આ યોજના હેઠળ સારવાર કરાવવા માટે સંદર્ભ કાર્ડ બનાવી આપવામાં આવ્યું હતું આ કાર્ડના કારણે દવા, રીપોર્ટસ તથા અન્ય પ્રકારના તમામ ખર્ચ સરકાર દ્વારા ચૂકવવામાં આવ્યા હતાં. જેના કારણે અમને એક રૂપિયાનો ખર્ચ ખિસ્સામાંથી કરવો પડ્યો નથી. સફળ હ્રદયના સફળ ઓપરેશન બાદ હાલ અમારી બાળકી સ્વસ્થ છે, ટીમ દ્વારા ફોલોઅપ લઈને સ્વાસ્થ્યની તપાસ પણ કરવામાં આવે છે અને જરૂરી દવાઓ તથા સારવાર પણ પૂરી પાડવામાં આવે છે.
