ડેડીયાપાડા જુના મોસદા ગામે સાયબર સેફટી તથા મહિલાલક્ષી જાગૃતિ કાર્યક્રમ યોજાયો
તાહિર મેમણ – ડેડીયાપાડા 29/09/2025 – ડેડીયાપાડા તાલુકાના જુના મોસદા ગામે આવેલી સરકારશ્રી ઉચ્ચતર માધ્યમિક શાળામાં ‘બેટી બચાવો, બેટી પઢાવો’ યોજના અંતર્ગત વિદ્યાર્થીનીઓને સશક્ત બનાવવા માટે વિવિધ માર્ગદર્શન અને જાગૃતિ કાર્યક્રમોનું આયોજન કરવામાં આવ્યું હતું.
આ કાર્યક્રમમાં મુખ્યત્વે સાયબર સેફટી, સ્વરક્ષણ કૌશલ્ય, સી-ટીમ સાથે સંવાદ, તેમજ મહિલાલક્ષી કાયદા અને સરકારી યોજનાઓ અંગે માહિતગારી જેવા વિષયો આવરી લેવામાં આવ્યા હતાં.
સાયબર સેફટી સેલ દ્વારા વિદ્યાર્થીનીઓને ઓનલાઈન ઠગાઈ, સાયબર ક્રાઈમના પ્રકારો, તેમજ તેનાથી બચવા માટે જરૂરી સુરક્ષા પદ્ધતિઓ, મજબૂત પાસવર્ડ, ઓટીએપી શેર ન કરવો, અજાણી લિંક્સ ન ખોલવી જેવી પ્રાથમિક તકેદારીઓ અંગે માર્ગદર્શન આપવામાં આવ્યું હતું. તેમજ સાયબર ગુનાઓમાં સરકારી હેલ્પલાઇન, સાયબર પોર્ટલ અને પોલીસની ઉપલબ્ધ સેવાઓ વિશે વિગતવાર જાણકારી આપવામાં આવી હતી. ત્યારબાદ સી-ટીમ દ્વારા વિદ્યાર્થીનીઓ સાથે પ્રશ્નોતરી ચર્ચા કરાઈ જેમાં સાયબર સેફટી, આત્મરક્ષા અને કાયદાકીય સહાય જેવા વિષયો આવરી લેવાયા હતાં.
કાર્યક્રમના અંતે તાલુકા અને જિલ્લા કક્ષાએ રમત-ગમત ક્ષેત્રે વિશિષ્ટ પ્રદાન કરનાર, તથા ધોરણ ૯ અને ૧૦માં ઉત્તમ ક્રમાંક મેળવનાર વિદ્યાર્થીનીઓને સન્માનિત કરવામાં આવી હતી. આ અવસરે શાળાના શિક્ષકશ્રી નિતીનભાઈ વસાવાએ સમગ્ર કાર્યક્રમનું સંચાલન કર્યું હતું.
કાર્યક્રમમાં ડી.એચ.ઇ.ડબ્લ્યુ, મહિલા સહાયતા કેન્દ્ર ડેડીયાપાડા અને સખી વન સ્ટોપ સેન્ટરનો સ્ટાફ, સાયબર સેફટી સેલની રીટાબેન, તેમજ સી-ટીમ ડેડીયાપાડાની અરૂણાબેન વસાવા સહિત શાળાના શિક્ષકગણ ઉપસ્થિત રહ્યા હતાં.
