ગુજરાતમાં ભારેથી અતિભારે વરસાદની ચેતવણી, 10 જિલ્લામાં રેડ એલર્ટ આપવામાં આવ્યું
ગુજરાતમાં મેઘરાજાની એન્ટ્રી થઈ ચુકી છે અને બે દિવસમાં જ વરસાદે બરાબરની બેટિંગ પણ કરી છે. ચોમાસાની ધમાકેદાર એન્ટ્રી બાદ શરૂઆતમાં જ મેઘતાંડવ જોવા મળી રહ્યું છે. ભારે વરસાદને લીધે નદીઓમાં પૂર આવ્યા છે. તો કેટલાક જિલ્લાઓમાં તો પહેલા જ વરસાદમાં ડેમો છલોછલ થઈ ગયા છે. જો કે, હજુ પણ હવામાન વિભાગે ભારે વરસાદની આગાહી કરી છે. 23 જૂન સુધી ગુજરાતમાં અતિભારે વરસાદની આગાહી કરવામાં આવી છે.
હવામાન વિભાગે આવનારા આખા અઠવાડિયામાં ગુજરાતમાં ભારે વરસાદ થવાની સંભાવના વ્યક્ત કરી છે. જયારે આજે રાજ્યના 10 જિલ્લામાં ભારે વરસાદનું રેડ એલર્ટ આપવામાં આવ્યું છે. આજે સૌરાષ્ટ્રમાં પોરબંદર, જૂનાગઢ, મોરબી, બોટાદ, ભાવનગર અને સુરેન્દ્રનગરમાં અત્યંત ભારે વરસાદની આગાહી કરવામાં આવી છે. તો અમદાવાદ, આણંદ, ભરૂચ અને સુરતમાં અત્યંત ભારે વરસાદ પડી શકે છે. સૌરાષ્ટ્રના અન્ય જિલ્લાઓમાં અતિભારે વરસાદની આગાહી કરવામાં આવી છે.
આ સિવાય હવામાન વિભાગે ગુજરાતના 12 જિલ્લામાં ઓરેન્જ એલર્ટ પણ જારી કર્યું છે. સૌરાષ્ટ્ર, દક્ષિણ ગુજરાત અને ઉત્તર ગુજરાતના કેટલાક જિલ્લાઓમાં આજે ભારે વરસાદનું ઓરેન્જ એલર્ટ જારી કરવામાં આવ્યું છે. અરવલ્લી, મહીસાગર, દાહોદ, ડાંગ, નવસારી, વલસાડ, દાદરા અને નગર હવેલી અને દમણ, તેમજ પોરબંદર, જૂનાગઢ, ગીર સોમનાથ, દીવ, અમરેલી અને ભાવનગરમાં ભારે વરસાદની સંભાવના વ્યક્ત કરવામાં આવી છે. આ સિવાય 15 જિલ્લામાં યલો એલર્ટ જાહેર કરવામાં આવ્યું છે. જેમાં રાજકોટ, બોટાદ, સુરેન્દ્રનગર, અમદાવાદ, ગાંધીનગર, સાબરકાંઠા, ખેડા, પંચમહાલ, આણંદ, વડોદરા, છોટા ઉદેપુર, નર્મદા, ભરૂચ, સુરત અને તાપીમાં ભારે વરસાદની આગાહી કરવામાં આવી છે.
રાજ્યમાં આગામી 6 દિવસ ભારેથી અતિભારે વરસાદની ચેતવણી આપવામાં આવી છે. અમદાવાદ, ભરૂચ સહિતના જિલ્લામાં પણ અતિભારે વરસાદ પડી શકે છે. બનાસકાંઠા, અરવલ્લી, સુરત પણ ભારે વરસાદની સંભાવના છે. જો કે, રાજ્યમાં 30થી 40 કિમીની ઝડપે પવન ફૂંકાવાની શક્યતાઓ છે.
હવામાન વિભાગ દ્વારા આગામી 6 દિવસ વરસાદની આગાહી કરવામાં આવી છે. જેમાં અમદાવાદ, આણંદ, ભરૂચ, સુરેન્દ્રનગર, ભાવનગર, બોટાદ, પોરબંદર અને જૂનાગઢમાં રેડ એલર્ટ આપવામાં આવ્યું છે. સાથે જ બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, વડોદરા, સુરત, નવસારી, વલસાડ, દમણ, દાદરા નગર હવેલી, રાજકોટ, જામનગર, અમરેલી, મોરબી, દ્વારકા, ગીર સોમનાથ અને કચ્છમાં ભરેથી અતિભારે વરસાદની આગાહી કરવામાં આવી છે. આ ઉપરાંત માછીમારોને દરિયો ન ખેડવા સૂચના આપવામાં આવી છે.
