આણંદ – સીવીએમ યુનિવર્સિટી દ્વારા એકેડેમી ઓફ ઇકોનોમિક્સ સ્ટડીસ સાથે MOU પર હસ્તાક્ષર
આણંદ – સીવીએમ યુનિવર્સિટી દ્વારા એકેડેમી ઓફ ઇકોનોમિક્સ સ્ટડીસ સાથે MOU પર હસ્તાક્ષર
તાહિર મેમણ – આણંદ – 26/11/2025 – આંતરરાષ્ટ્રીય શૈક્ષણિક સહયોગને વધુ મજબૂત કરવાના ઉદ્દેશ્ય સાથે સીવીએમ યુનિવર્સિટીએ 12મી નવેમ્બર, 2025ના રોજ કીસિનાઉ, મોલ્ડોવા ખાતે આવેલી પ્રતિષ્ઠિત એકેડેમી ઓફ એકોનોમિક સ્ટડીસ સાથે MOU પર હસ્તાક્ષર કર્યા.
આ કરાર પર એકેડેમી ઓફ એકોનોમિક સ્ટડીસના આદરણીય વાઇસ ચાન્સેલર (રેક્ટર) એલેક્ઝાન્ડર યુ. સ્ટ્રેટન (Mr. Alexander U. Stratan)ની ગૌરવપૂર્ણ ઉપસ્થિતિમાં હસ્તાક્ષર કરવામાં આવ્યા હતા. સીવીએમ યુનિવર્સિટીના પ્રમુખ ભીખુભાઈ બી. પટેલ, ચારુતર વિદ્યામંડળ યુનિવર્સિટીના ગવર્નિંગ બોડીના સભ્યો, યુનિવર્સિટીના પ્રોવોસ્ટ શ્રી પ્રોફેસર (ડૉ.) ઇન્દ્રજીત પટેલ, રજિસ્ટ્રાર અને ડીન એકેડેમિક્સ શ્રી પ્રોફેસર (ડૉ.) સંદીપ વાલિયાએ એકેડેમીના ઉત્તમ શૈક્ષણિક વાતાવરણ અને અત્યાધુનિક સુવિધાઓની પ્રશંસા કરી હતી.
સીવીએમ કોલેજ ઓફ ફાઇન આર્ટસના માનદ નિયામક શ્રી કનુ પટેલ દ્વારા રોમાનિયા અને મોલ્ડોવા ખાતેની વિદેશ યાત્રા દરમિયાન આ એમઓયુનું આયોજન કરાયું હતું. આ એમઓયુનો હેતુ બંને સંસ્થાઓ વચ્ચે શૈક્ષણિક, સંશોધન અને વિદ્યાર્થી વિનિમય કાર્યક્રમોને પ્રોત્સાહન આપીને વૈશ્વિક શિક્ષણની તકોને વિસ્તૃત કરવાનો છે. જેમાં બંને સંસ્થાઓના વિદ્યાર્થીઓ માટેના ભાવિ વિનિમય કાર્યક્રમોની ઉજ્જવળ સંભાવનાઓ પર ચર્ચા થઈ હતી.
સીવીએમ યુનિવર્સિટીના પ્રમુખ ભીખુભાઈ પટેલે આ પ્રસંગે જણાવ્યું હતું કે, “આ MOU વૈશ્વિક જ્ઞાનના આદાનપ્રદાન માટે એક મહત્વપૂર્ણ પગલું છે. અમે માનીએ છીએ કે આ સહયોગ સીવીએમ યુનિવર્સિટીના વિદ્યાર્થીઓને કળાના અભ્યાસ ક્ષેત્રમાં આંતરરાષ્ટ્રીય પરિપ્રેક્ષ્ય પ્રદાન કરશે.”
એકેડેમી ઓફ એકોનોમિક સ્ટડીસના વાઇસ ચાન્સેલર (રેક્ટર) સ્ટ્રેટને આ ભાગીદારી માટે ઉત્સાહ વ્યક્ત કર્યો અને ભવિષ્યમાં સફળ સહયોગની આશા દર્શાવી હતી.
આર્થિક અભ્યાસ અકાદમી સાથેનો સફળ એમઓયુ પૂર્ણ કર્યા પછી, સીવીએમ યુનિવર્સિટીએ મોલ્ડોવાની ફાઇન આર્ટ્સ કૉલેજ (Fine Arts College) સાથે અન્ય એમઓયુ પર પણ હસ્તાક્ષર કર્યા છે, જે વિવિધ શૈક્ષણિક શાખાઓમાં સહયોગને વધુ વિસ્તારશે.
