ભેસાણની ડ્રીમલેન્ડ સ્કૂલ ખાતે ખેલમહાકુંભ ૨૦૨૫નું ભવ્ય આયોજન કરવામાં આવ્યું હતું. આ પ્રસંગે ભગવાન બિરસા મુંડાની જન્મજયંતિના દિવસે બહેનોની એથ્લેટિક સ્પર્ધાનું વિશેષ આયોજન કરાયું હતું. આ સ્પર્ધામાં બરવાળા પે. સેન્ટર શાળાની આદિવાસી સમાજમાંથી આવતી વિદ્યાર્થીનીઓએ ઉત્કૃષ્ટ પ્રદર્શન કરીને તાલુકા કક્ષાએ પોતાની પ્રતિભા દર્શાવી હતી. આદિવાસી વિદ્યાર્થીનીઓના આ પ્રભાવશાળી પ્રદર્શને શાળા અને સમાજનું ગૌરવ વધાર્યું છે.આ એથ્લેટિક સ્પર્ધામાં બરવાળા પે. સેન્ટર શાળાની કુલ ૮ વિદ્યાર્થીનીઓએ ભાગ લીધો હતો, જેમાં અંડર-૧૭ વય જૂથમાં ૨ અને અંડર-૧૪ વય જૂથમાં ૬ વિદ્યાર્થીનીઓનો સમાવેશ થાય છે. આ તમામ વિદ્યાર્થીનીઓએ દોડની વિવિધ સ્પર્ધાઓમાં પ્રથમ, દ્વિતીય અને તૃતીય ક્રમાંકો હાંસલ કરીને શાળાનું નામ રોશન કર્યું.અંડર-૧૭ વય જૂથમાં ૪૦૦ મીટર દોડમાં પાવરા વૈશાલીએ પ્રથમ સ્થાન મેળવ્યું, જ્યારે ડાવર સાવિત્રીએ દ્વિતીય સ્થાન પ્રાપ્ત કર્યું. ૨૦૦ મીટર દોડમાં પણ આ બંને વિદ્યાર્થીનીઓએ ઉમદા પ્રદર્શન કર્યું, જેમાં પાવરા વૈશાલી દ્વિતીય અને ડાવર સાવિત્રી તૃતીય સ્થાને રહી.અંડર-૧૪ વય જૂથમાં ૬૦૦ મીટર દોડમાં સસ્તીયા રીતાએ પ્રથમ, બામણીયા ખુશીએ દ્વિતીય અને અલાવે રીટાએ તૃતીય સ્થાન મેળવ્યું. ૪૦૦ મીટર દોડમાં સસ્તીયા રેખાએ પ્રથમ અને ડાવર સંગીતાએ તૃતીય સ્થાન હાંસલ કર્યું. આ ઉપરાંત, ૨૦૦ મીટર દોડમાં પાવરા અર્પિતાએ તૃતીય સ્થાન પ્રાપ્ત કર્યું.આ સ્પર્ધામાં ભાગ લેનારી તમામ વિદ્યાર્થીનીઓ આદિવાસી સમાજના ખેતર અને વાડી વિસ્તારમાં રહેતી હોવા છતાં, તેમણે મર્યાદિત સંસાધનો વચ્ચે પણ પોતાની પ્રતિભા અને મહેનતના બળે આ નોંધપાત્ર સફળતા હાંસલ કરી છે. આ વિદ્યાર્થીનીઓની સિદ્ધિ એ દર્શાવે છે કે યોગ્ય માર્ગદર્શન અને પ્રોત્સાહન સાથે આદિવાસી યુવતીઓ પણ રમતગમતના ક્ષેત્રે ઉચ્ચ સ્થાન પ્રાપ્ત કરી શકે છે.આ સફળતા પાછળ ટીમના કોચ અને શૈક્ષિક મહાસંઘ, ભેસાણના અધ્યક્ષ શ્રી નરેન્દ્રભાઈ ભુવાનું મહત્વનું યોગદાન રહ્યું છે. તેમણે જણાવ્યું કે, “આ વિદ્યાર્થીનીઓની સફળતા એ માત્ર શાળાની જ નહીં, પરંતુ આખા આદિવાસી સમાજની ગરિમાને ઉજાગર કરે છે. તેમની મહેનત અને લગન દરેક માટે પ્રેરણાદાયી છે.”આ સ્પર્ધાનું આયોજન ડ્રીમલેન્ડ સ્કૂલ, ભેસાણ દ્વારા કરવામાં આવ્યું હતું, જેમાં આદિવાસી વિદ્યાર્થીનીઓને તેમની પ્રતિભા દર્શાવવા માટે એક ઉત્તમ પ્લેટફોર્મ પૂરું પાડવામાં આવ્યું. આ પ્રકારના આયોજનો ગ્રામીણ અને આદિવાસી વિસ્તારોની યુવા પ્રતિભાઓને રાષ્ટ્રીય અને આંતરરાષ્ટ્રીય સ્તરે લઈ જવા માટે મહત્વની ભૂમિકા ભજવે છે.બરવાળા પે. સેન્ટર શાળાની આ વિદ્યાર્થીનીઓની સિદ્ધિએ નવી પેઢી માટે એક ઉજ્જવળ ઉદાહરણ છે. આ સફળતા દર્શાવે છે કે પ્રતિભા અને સમર્પણની સામે કોઈ અવરોધ ટકી શકતો નથી.
બાયલાયન :- અનિરૂધ્ધસિંહ બાબરીયા – કેશોદ
