ઝઘડિયા પાસે ટેમ્પો ટ્રાવેલર ખાડીમાં પલટ્યો:નમાઝીઓને લઈ જતી ગાડી પલટતા 15 લોકો ઈજાગ્રસ્ત
સમીર પટેલ, ભરૂચ
ભરૂચ જિલ્લાના ઝઘડિયા તાલુકાના દધેડા ગામ નજીક આજે વહેલી સવારે એક માર્ગ અકસ્માત સર્જાયો હતો. નમાઝ અદા કરવા જઈ રહેલા 15 નમાઝીઓને લઈ જતો ટેમ્પો ટ્રાવેલર અનિયંત્રિત બની ખાડીમાં પલટાઈ ગયો હતો. આ ઘટનામાં વાહનમાં સવાર તમામ 15 લોકો ઈજાગ્રસ્ત થયા હતા.
અકસ્માતને કારણે ઈજાગ્રસ્ત થયેલા લોકોને તાત્કાલિક મદદ પૂરી પાડવામાં આવી હતી. ઘટનાસ્થળે આસપાસના ગ્રામજનો દોડી આવ્યા હતા અને બચાવ કાર્ય શરૂ કર્યું હતું.
ઈજાગ્રસ્તોને તાત્કાલિક અંકલેશ્વરની હોસ્પિટલમાં ખસેડવામાં આવ્યા હતા, જ્યાં તેમને પ્રાથમિક સારવાર બાદ વધુ સારવાર આપવામાં આવી રહી છે. ઝઘડિયા પોલીસને જાણ થતાં જ પોલીસ ટીમ ઘટનાસ્થળે પહોંચી હતી અને જરૂરી કાર્યવાહી હાથ ધરી હતી.
અકસ્માતનું ચોક્કસ કારણ હજુ સ્પષ્ટ થયું નથી. જોકે, પ્રાથમિક તપાસમાં વાહન અનિયંત્રિત થવાને કારણે પલટી ગયું હોવાનું સામે આવ્યું છે. પોલીસે ઘટનાસ્થળનું નિરીક્ષણ કરીને આ મામલે વધુ તપાસ શરૂ કરી છે.
