રૂ 50 લાખના પોસ્ટ ડેટેડ ચેક રિટર્ન કેસમા ભાગીદારી પેઢી અને બે ભાગીદારો ને હાલોલ કોર્ટે નિર્દોષ છોડી મુક્યા.
તારીખ ૦૩/૧૧/૨૦૨૫
સાજીદ વાઘેલા કાલોલ
હાલોલ તાલુકાના કંજરી ગામની સર્વે નંબર ૨૦૩૦ વાળી બિનખેતીની જમીન વૈશાલીબેન જીગ્નેશભાઈ શાહ પાસેથી સહકાર ઇન્ફ્રા નામની ભાગીદારી પેઢી અને તેના બે ભાગીદારો પ્રહલાદભાઈ જસરાજભાઈ પટેલ તેમજ વેણીલાલ તુલસીદાસ પટેલ રે વડોદરાનાઓ દ્વારા વેચાણ દસ્તાવેજ કરી રૂ 3.60 કરોડ કિંમત નક્કી કરી હતી અને તે પેટે ₹20 લાખ ચૂકવી આપ્યા હતા તેમજ બાકીની રકમના પોસ્ટ ડેટેડ ચેક ફરિયાદીના લખી આપ્યા હતા. તે પૈકીનો તારીખ ૧૦/૦૧/૨૦૨૨ ના રોજ નો સ્ટેટ બેંક ઓફ ઈન્ડિયા હરણી વડોદરા નો ચેક બંને ભાગીદારોની સહી વાળો રૂપિયા 50 લાખની રકમનો ચેક ફરિયાદીએ પોતાની બેંક ઓફ બરોડા હાલોલ ખાતે જમા કરાવતા અપૂરતા ભંડોળના કારણે પરત આવેલ જે બાદ નોટિસ આપી હાલોલ ના જ્યુડીશિયલ એડી ચીફ જયુ મેજિસ્ટ્રેટ ની કોર્ટમાં ક્રિમિનલ કેસ દાખલ કર્યો હતો. જે કેસમાં આરોપી તરફ એડવોકેટ જે.બી જોશી અને વી એચ ગોહિલ હાજર રહ્યા હતા. ફરિયાદી અને આરોપીઓ વચ્ચે તા ૨૧/૦૮/૨૧ ના રોજ વેચાણ દસ્તાવેજ થયો હતો તે જ દિવસે ફરિયાદી અને આરોપી વચ્ચે નોટરી રૂબરૂ સમજુતી કરાર પણ કરવામાં આવેલો. સમજૂતી કરાર ની શરત મુજબ જો કોઈ કોર્ટ મને હુકમ ન આપે તો જ ચેકો ભરવાના થાય તેવી શરત છે. સવાલ વાળી જમીનના ફરિયાદી માલિક બનેલા છે પરંતુ તેનો અવેજ તેઓએ જમીનના મૂળ માલિકને ચૂકવી આપ્યો નથી અને મૂળ માલિકે વેચાણ દસ્તાવેજ રદ કરવા માટે દાવો પણ કરેલ છે અને કલેક્ટર દ્વારા મનાઈ હુકમ આપવામા આવ્યો છે. રેવન્યુ વિભાગમાં પણ લીટીગેશન ઉભા થયેલ છે. વધુમાં ફરિયાદીએ ટાઇટલ ક્લિયર થયા બાદ જ પોસ્ટ ડેટેડ ચેક બેંકમાં ભરવાના હતા તેવી સમજૂતી કરારમાં વિગત લખેલી હતી. અને ટાઈટલ ક્લિયર કરવાનો બોજો ફરિયાદી ઉપર હતો. જેથી જમીનનું વેચાણ થયું તેવું કહી શકાય નહીં અને જ્યાં સુધી જમીનનું વેચાણ થયું છે તેવું પુરવાર ન થાય ત્યાં સુધી ફરિયાદી વળતર મેળવવા હકદાર થઈ શકે નહીં. વધુમાં ફરિયાદીને આપેલ પોસ્ટ ડેટેડ ચેક એડવાન્સ પેમેન્ટ છે જે કાયદેસરનું લ્હેણુ કહી શકાય નહી તેવી દલીલો આરોપી એડવોકેટ જે.બી જોશી દ્વારા કરી એપેક્સ કોર્ટોના જુદા જુદા ચુકાદાઓ રજૂ કરતા હાલોલના એડી ચીફ જ્યુ. મેજિસ્ટ્રેટ આર બી જોશી દ્વારા ફરિયાદી પોતાનો કેસ નિઃશંકપણે પુરવાર કરી શક્યા ન હોવાથી ભાગીદારી પેઢી સહિત બંને ભાગીદારોને નિર્દોષ ઠરાવી છોડી મૂકવાનો હુકમ કર્યો છે.
