વાત્સલ્યમ સમાચાર
મદન વૈષ્ણવ-ડાંગ
ડાંગ જિલ્લામાં વરસાદની ધાર ધીમી પડતા ખોરંભે ચડેલ જનજીવન ફરી ધબકતુ થયુ..
રાજ્યનાં છેવાડે આવેલ ડાંગ જિલ્લામાં છેલ્લા ત્રણ દિવસથી વરસાદી માહોલે ભારે તાંડવ કર્યુ હતુ. ડાંગ જિલ્લાનાં ગિરિમથક સાપુતારા, આહવા,વઘઇ સુબિર સહીતનાં પંથકોમાં શનિવારથી સોમવાર સુધી અનરાધાર વરસાદ ખાબકતા લોકમાતાઓમાં અંબિકા,ખાપરી,પૂર્ણા અને ગીરા નદી ભયજનક સપાટીમાં આવી વહેતી થઈ હતી.ડાંગ જિલ્લામાં ત્રણ દિવસ સુધી પડેલ અનરાધાર વરસાદનાં પગલે ગામડાઓમાં ભારે ખાના ખરાબી સર્જાઈ હતી.જેમાં આહવા તાલુકાનાં ઢુંઢુનિયા અને ગાયખાસ કોઝવેને નદીનો પુર ઢસડી જતા હાલમાં લોકોને મોટી તકલીફો વેઠવાની નોબત ઉભી થઈ છે.તેવી જ રીતે આહવા તાલુકાનાં રાનપાડા ગામનું ગરનાળુ પણ ધોવાણ થઈ જતા આસપાસનાં લોકોની મુશ્કેલીઓ વધી છે.મંગળવારે દિવસ દરમ્યાન ડાંગ જિલ્લાનાં ગિરિમથક સાપુતારા, શામગહાન,આહવા,વઘઇ અને સુબિર સહીતનાં પંથકોમાં વરસાદની ધાર ધીમી પડી હતી.ડાંગ જિલ્લામાં વરસાદી તાંડવ બાદ વરસાદની ધાર ધીમી પડતા જનજીવને હાશકારો અનુભવ્યો હતો.મંગળવારે ડાંગ જિલ્લામાં વરસાદની ધાર ધીમી પડતા વઘઇનો ગીરાધોધ, ગિરમાળનો ગીરાધોધ,ભેગુધોધ,શિવઘાટનાં બન્ને ધોધ સહિત નાના મોટા જળધોધ આકર્ષણનું કેન્દ્ર બન્યા હતા.મંગળવારે ડાંગ જિલ્લા પંચાયત હસ્તકના અવરોધાયેલ 15 માર્ગો ખુલ્લા થતા યાતાયાત ધબકતો થયો હતો. હવે માત્ર 5 જેટલા ગ્રામ્ય માર્ગો જ, વરસાદી પાણીને લઈ અવરોધાયેલા છે.જેમાં વઘઇ તાલુકાના (1) કાલીબેલ-પાંઢરમાળ-વાંકન રોડ, (2) માછળી-ચિખલા-દિવડ્યાવન રોડ-૧, (3) માછળી-ચિખલા-દિવડ્યાવન રોડ-2, (4) આહેરડી-બોરદહાડ રોડ, અને (5) ઘોડવહળ વી.એ.રોડ, ક્યાંક કોઝ વે ઓવર ટોપિંગ થવાથી, તો ક્યાંક સ્લેબ ડ્રેઇન ઓવર ટોપિંગ થવાને કારણે અવરોધાયા છે.આ દરમિયાન સુબીર તાલુકાના સુબીર-મહાલ રોડ ઉપર કડમાળ ગામે રાત્રીનાં સમયે વૃક્ષ ધરાશાહી થતાં, વન વિભાગે તાત્કાલિક વૃક્ષ હટાવી રાહેદારીઓ માટે રસ્તો ખુલ્લો કર્યો હતો.જિલ્લા કલેકટર મહેશ પટેલ સમગ્ર પરિસ્થિતિ ઉપર નજર રાખી, તંત્રના સંબંધિત વિભાગોને માર્ગદર્શિત કરી રહ્યા છે. દરમિયાન લાઇન ડિપાર્ટમેન્ટના અધિકારી, કર્મચારીઓને સંભવિત પરિસ્થિતિ ધ્યાને લેતા, તેમનું કાર્ય મથક નહિ છોડવાની પણ તાકીદ કરવામાં આવી છે.ડાંગ જિલ્લા ડિઝાસ્ટર વિભાગના જણાવ્યા અનુસાર છેલ્લા 24 કલાક દરમ્યાન સાપુતારા પંથકમાં 23 મિમી,સુબિર પંથકમાં 24 મિમી,વઘઇ પંથકમાં 31 મિમી અર્થાત 1.24 ઈંચ, જ્યારે સૌથી વધુ આહવા પંથકમાં 38 મિમી અર્થાત 1.52 ઈંચ જેટલો વરસાદ નોંધાયો હતો..
