Gondal: તમિલનાડુની અસ્થિર મગજની મહિલા ભૂલથી ગુજરાત આવી પહોંચી, ગોંડલની ૧૮૧ અભયમ ટીમે પરિવાર સાથે કરાવ્યું મિલન
તા.૨૫/૭/૨૦૨૫
વાત્સલ્યમ્ સમાચાર
માત્ર તમિલ ભાષા જાણતી મહિલાનું અભયમ ટીમના કુશળ કાઉન્સેલિંગ દ્વારા પરિજનો સાથે સંપર્ક કરાયો
તમિલનાડુથી ૧૫ દિવસથી ભૂલી પડેલી નિ:સહાય મહિલાને પરિવાર લેવા આવે ત્યાં સુધી સુરક્ષિત આશ્રય અપાવતી ૧૮૧ અભયમ્ ટીમ
Rajkot, Gondal: અમને ગત રોજ દડવી ગામથી અજાણી મહિલા અંગે ફોન આવેલો, સ્થળ પર પહોંચી મહિલા સાથે વાતચીત કરવાનો પ્રયત્ન કરેલો. મહિલા થોડી ગભરાયેલી લાગતી હતી, ને આપણી ભાષા પણ સમજે નહીં. હિન્દી પણ નહીં.. માત્ર તમિલ ભાષા આવડે. જે આપણને ન સમજાય. મહિલાને કંઈ પણ પુછીયે તો માત્ર તમિલ બોલે, પણ સમજવું કેમ ? આ શબ્દો છે ગોંડલ સિટી પોલીસ સ્ટેશન સ્થિત ૧૮૧ અભયમ ટીમના કાઉન્સેલર લતાબેનના.
અમે મહિલાની ઓળખ મેળવવા નામ, નંબર સહિતની વિગતો કાગળ પર લખાવી. જેનો ગુગલ ટ્રાન્સલેશન દ્વારા ગુજરાતીમાં અનુવાદ કર્યો. આ વિગત પરથી પીડિતાના પરિવારજનો સાથે સફળતાપૂર્વક સંપર્ક કરી મહિલાનું પરિવાર સાથે મિલાન કરાવ્યાનું કાઉન્સેલર લતાબેન જણાવે છે.
આ અંગે વિગતે વાત કરતા ૧૮૧ ટીમના કાઉન્સેલર લતાબેન ચૌધરી, એ.એસ.આઈ. પરવાનાબેન અને પાયલોટ વિશાલભાઈ જણાવે છે કે, ગત રોજ એક જાગૃત નાગરિક દ્વારા રાજકોટ જિલ્લાના જામકંડોરણા તાલુકાના દડવી ગામથી ૧૮૧ પર કોલ આવેલ એક અજાણી મહિલા મળી આવેલ છે. કોલ મળતાં જ અમે ઘટના સ્થળે પહોંચી જાગૃત નાગરિક તથા સ્થાનિક લોકો સાથે વાતચીત કરી હતી. જાણવા મળ્યુ કે પીડિત મહિલા બપોરના ૧૨ વાગ્યાના દડવી ગામના બસ સ્ટેશન પર બેઠા છે. અમે લોકોએ પૂછપરછ કરતા કંઈ જણાવતા નહોતા અને ગભરાયેલા હોય તેવું લાગતા ૧૮૧ અભયમમાં કોલ કરી મદદ માંગી હોવાનું ગ્રામજનોએ જણાવ્યું હતું.
અભયમ ટીમે દોર હાથમાં લેતા પીડિત મહિલા સાથે પરામર્શ કરતા જાણવા મળ્યું કે, તે અન્ય રાજ્યના વતની છે અને તમિલ ભાષામાં વાત કરતા હોઈ પીડિતાના પરિવારજનોની માહિતી મેળવવી અત્યંત મુશ્કેલ હતી.
કુશળતા પૂર્વક લાંબા પરામર્શ બાદ પીડિતાએ પોતાના પરિજનનોના નામ અને મોબાઈલ નંબર અને સરનામું તામિલ ભાષામાં લખી આપેલું. ત્યારબાદ ૧૮૧ ટીમના કાઉન્સિલરે ગૂગલ ટ્રાન્સલેટની મદદથી જણાવેલ મોબાઇલ નંબર પર સંપર્ક કરતા તેમના પતિ અને દીકરી સાથે વાત કરી. પીડીતાએ આપેલા નંબર પર વિડીયો કોલ કરી પીડિતાને એમના પતિ સાથે વાત કરાવી હતી. ટીમને પીડિતાના પતિ સાથે ચર્ચા કરતા જાણવા મળ્યું હતું કે, તીરૃવલીના વતની પીડિતાની માનસિક સ્થિતિ સારી નથી અને અંદાજે ૧૫ દિવસથી તેના પત્ની ઘરેથી નીકળી ગયેલ છે. અમે ગુમશુદાની ફરિયાદ તીરૃવલી પોલીસ સ્ટેશનમાં દસ દિવસ પહેલા લખાવેલી છે. અમે લેવા આવીએ ત્યાં સુધી સલામત જગ્યાએ આશ્રય અપાવવા વિનંતી છે.
અભયમ ટીમ દ્વારા પીડિતાને જામકંડોરણા પોલીસ સ્ટેશન લઈ જઈ બનાવની નોંધ કરાવી પોલીસ સ્ટેશનના પી.આઈ. ને સમગ્ર બનાવ અંગે જાણ કરવામાં આવી હતી. પી.આઈ. દ્વારા તીરૃવલી પોલીસ સ્ટેશનમાં ફોન કરી પીડિતાની માહિતી તથા ફોટો મોકલાવી ખરાઇ કરવામાં આવી હતી. આ અંગે તીરૃવલી ખાતે પોલીસ સ્ટેશનમાં ગુમસુદાની ફરિયાદ દાખલ થયેલી હોવાનું ત્યાંના અધિકારીઓએ જણાવતા પીડિતા હાલ ગુજરાતના રાજકોટ જિલ્લાના જામકંડોરણા તાલુકામાં આવી ગયાની વિસ્તૃત માહિતી તેઓને પૂરી પાડી હતી.
તેઓની અરજને ધ્યાનમાં રાખી તમિલનાડુની તપાસ કરનાર પોલીસ ટીમ અને પીડિતાના પરિવારના સભ્યો મહિલાને તેડવા ન આવે ત્યાં સુધી પીડિતાને અમરધામ આશ્રમ માં ૧૮૧ ટીમ દ્વારા આશ્રય આપવામાં આવ્યો છે
ગુજરાત સરકાર દ્વારા મહિલાઓને મદદ અર્થે કાર્યરત અભયમ મહિલા હેલ્પલાઇનની માનવીય કામગીરીથી પ્રોત્સાહિત થઈ પીડિતાના પરિવાજનોએ મદદ બદલ પ્રશંસા કરી રાજ્ય સરકાર અને સમગ્ર અભયમ ટીમનો આભાર માન્યો છે.
