ગુજરાતના જૂનાગઢ જિલ્લાના મેંદરડા તાલુકામાં આવેલા માનપુર ગામના સરપંચ હાર્દિકભાઈ ખુંટને દિલ્હી ખાતે યોજાનાર રાષ્ટ્રીય સ્તરના ત્રણ દિવસીય તાલીમ કાર્યક્રમમાં ભાગ લેવા માટે ખાસ આમંત્રણ પ્રાપ્ત થયું છે. આ પ્રતિષ્ઠિત કાર્યક્રમનું આયોજન પંચાયતી રાજ વ્યવસ્થાને વધુ સશક્ત બનાવવા અને ગ્રામીણ વિકાસને નવું આયામ આપવા માટે કરવામાં આવ્યું છે, જે દેશભરના પસંદગીના સરપંચો અને આગેવાનોને એક મંચ પર લાવશે.ગુજરાતમાંથી ચૂંટાયેલા થોડા સરપંચોમાં માનપુરના હાર્દિકભાઈ ખુંટનું નામ સામેલ થવું એ ગામ અને સમગ્ર મેંદરડા તાલુકા માટે અત્યંત ગૌરવની વાત છે.આ તાલીમ કાર્યક્રમ દ્વારા સરપંચને ગ્રામ્ય કક્ષાએ વિકાસની યોજનાઓને વધુ અસરકારક અને નવીન રીતે અમલમાં મૂકવા માટે જરૂરી માર્ગદર્શન, નવી ટેકનિકો અને અનુભવોની સમૃદ્ધ તક મળશે.માનપુર ગામના રહેવાસીઓ આ સમાચારથી ઉત્સાહિત છે અને તેમના સરપંચની આ ઉપલબ્ધિને ગામના ઉજ્જવળ ભવિષ્યના સંકેત તરીકે જુએ છે. હાર્દિકભાઈ ખુંટને રાષ્ટ્રીય સ્તરે ગામનું પ્રતિનિધિત્વ કરવાનો આ અવસર એ ગામની પ્રગતિ અને એકતાનું પ્રતીક બની રહેશે. આ તાલીમ પછી તેઓ ગામના વિકાસના કાર્યોને વધુ ગતિ અને નવી દિશા આપશે, તેવી આશા ગ્રામજનો વ્યક્ત કરી રહ્યા છે.આ રાષ્ટ્રીય કાર્યક્રમ દેશના ગ્રામીણ વિસ્તારોમાં સ્વશાસનને મજબૂત કરવા અને ગામડાઓના સર્વાંગી વિકાસને પ્રોત્સાહન આપવા માટે એક મહત્વપૂર્ણ પગલું છે. માનપુર ગામના લોકોએ આ ગૌરવપૂર્ણ ક્ષણ બદલ તેમના સરપંચને શુભેચ્છાઓ પાઠવી છે અને આશા વ્યક્ત કરી છે કે આ તક ગામના વિકાસના નવા દ્વાર ખોલશે.
રિપોર્ટર :- અનિરૂધસિંહ બાબરીયા – કેશોદ
