વાત્સલ્યમ્ સમાચાર.
રિપોર્ટ :- રમેશ મહેશ્વરી
માંડવી,તા-૨૩ જુલાઈ : કહેવાય છે કે ‘ જનની જણ તો ભક્ત જણ, કાં દાતા કાં શૂર, નહિં તો રહેજે વાંઝણી મત ગુમાવીશ નૂર ‘ આ ઉક્તિને ખરા અર્થમાં ચરિતાર્થ કરી બતાવી છે રામપર વેકરાના સખાવતી કણબી દાતાએ. વાત કરવી છે મૂળ ગામ રામપર વેકરા અને હાલે નૈરોબી ( કેન્યા) ખાતે રહેતા દિલેર દાતા શ્રી શાંતિલાલ ભાઈ ભંડેરીની. સામાન્ય રીતે લોકો પોતાના સમાજમાં, ગામમાં, ધાર્મિક સ્થળોએ અથવા તો ગૌશાળા વગેરેમાં દાન આપતા હોય છે. લોકોની માનસિકતા પણ કંઈક એવી હોય છે કે સરકારનું કામ છે એ સરકાર પોતે કરશે.પણ નોખી માટીના માનવી એવા શાંતિલાલભાઈ પટેલ અને તેમના ધર્મ પત્ની શ્રીમતિ ધનુબેન ભંડેરી દાનનો માટે ભાગે ઉપયોગ સરકારી પ્રા. શાળા અને આંગણવાડીના બાળકો માટે કરે છે. અત્યાર સુધી તેમના દ્વારા કચ્છ જિલ્લા ઉપરાંત અન્ય જિલ્લાની મળી ૬૩ જેટલી સરકારી શાળાઓ તેમજ આંગણવાડીઓમાં અંદાજિત રૂપિયા ૩ કરોડ જેટલી રકમના કામો થયા છે. જેમાં શાળાઓમાં જરૂરિયાત મુજબ મરામત અને રંગ રોગાન કરાવી અપાયા છે. તો ક્યાંક પ્રાર્થના અને મધ્યાહન ભોજનના શેડ, દિવાલ વગેરે બનાવી આપવામાં આવ્યા છે તો ઘણી જગ્યાએ નવા પંખા , ટ્યુબલાઇટ , કોમ્પ્યુટર, વોટરકૂલર, ટી.વી. જેવા સાધનો અપાયા છે. સરકારી શાળાઓમાં ગ્રાન્ટ આવતી હોય છે પણ તેની અમુક મર્યાદા હોય છે જેથી તેમાંથી બધા કામો થઈ શકતા નથી. આજે ઘણા એવા ગામો છે કે જ્યાં સ્થાનિકે દાતાઓ મળવા મુશ્કેલ હોય ત્યારે આવા દાતાઓ પણ છે જે કોઈ પણ ભેદભાવ વિના જ્યાં જરૂરિયાત જણાય ત્યાં દાનની સરવાણી વહાવતા હોય છે.
તાજેતરમાં નોખાણિયા પ્રા. શાળાના આચાર્ય હરિસિંહ જાડેજાએ શાળામાં કલરકામ માટે દાતા શાંતિલાલભાઈ ભંડેરી પાસે ટહેલ મૂકતા તેમણે રૂબરૂ શાળામાં આવી જોઈ અને જરૂરિયાત જણાતા શાળાના ૭ વર્ગખંડો ઉપરાંત પ્રાર્થના શેડ, કિચન શેડ, ટોયલેટ વગેરેની દીવાલો , છત, બારી દરવાજા સહિતમાં કલર કામ કરી આપ્યું હતું. આ સાથે તેમના તરફથી શાળાના વર્ગખંડો માટે ૨૧ ટ્યુબલાઇટ પણ ભેટ આપવામાં આવી હતી સાથે તેનું ફિટિંગ પણ કરી આપવામાં આવ્યું હતું. આ તકે શાળામાં યોજાયેલ સન્માન કાર્યક્રમમાં દાતા હાલ વિદેશ હોઇ તેમના પ્રતિનિધિ અને તેમનું તમામ કામ સંભાળતા અબ્દુલભાઈ લોધરાનું શાળા પરિવાર અને ગ્રામજનો વતી શાલ અને મોમેન્ટો દ્વારા અભિવાદન કરવામાં આવ્યું હતું. જિલ્લા પ્રાથમિક શિક્ષણાધિકારી શ્રી ભૂપેન્દ્રસિંહ વાઘેલાએ દાતાની દિલેરીને બિરદાવી હતી. આ તકે એસ.એમ.સી. ના અધ્યક્ષ હરિભાઈ ચાડ,ભરત છાંગા, નાનજી કાપડી, નરશી છાંગા, ભીલાલ સમા, રમેશ છાંગા, ભુરાભાઈ વારોત્રા , વિશ્રામ ગાગલ, ભાવેશ માતા સહિતના આગેવાનો ઉપસ્થિત રહ્યા હતા. વાલીઓ અને ગ્રામજનોએ દાતા પરિવારનો આભાર માન્યો હતો.
