વાત્સલ્યમ્ સમાચાર.
રિપોર્ટ :- રમેશ મહેશ્વરી- માંડવી કચ્છ.
માંડવી તા.11 મે : ગુજરાત સરકાર દ્વારા નાગરિકોને આરોગ્ય સંબંધિત માહિતી અને સહાયતા પૂરી પાડવા માટે કાર્યરત 104 હેલ્પલાઇન એક મહત્વપૂર્ણ માધ્યમ છે. વર્તમાન સંજોગોમાં સરકાર દ્વારા લેવામાં આવી રહેલા સકારાત્મક પગલાં અને લોકોલક્ષી નીતિઓના કારણે અનેકવિધ સેવાઓ નાગરિકો સુધી પહોંચી રહી છે, જે ખરેખર આશીર્વાદરૂપ છે.
જો કે, આ સેવાને વધુ અસરકારક બનાવવા માટે કેટલીક બાબતો પર ધ્યાન આપવું જરૂરી જણાય છે. તાજેતરમાં 104 હેલ્પલાઇનના કેટલાક ઓપરેટરોના અસંવેદનશીલ વર્તનના કિસ્સા સામે આવ્યા છે, જે નાગરિકોને નિરાશ કરી શકે છે. માનસિક તણાવ જેવી ગંભીર પરિસ્થિતિમાં મદદ માંગનાર વ્યક્તિને “આ એનિમલ હેલ્પ લાઇન – પશુઓ માટેનું સલાહ કેન્દ્ર છે” એવો અયોગ્ય જવાબ આપવો અથવા રોગ થયા પહેલા શું તકેદારી રાખવી એની જાણકારી આપવાની બદલે તાવ આવ્યા બાદ સારવાર કરવામાં આવશે (ગુનો બન્યા બાદ કેસ નોંધવામાં આવશે) એવા જવાબો આપીને આરોગ્ય સંબંધિત મહત્વની માહિતી અધૂરી રીતે આપવી એ સેવાની ગુણવત્તા પર પ્રશ્ન ઉભો કરે છે.
આ સંદર્ભમાં, 104 હેલ્પલાઇનના તમામ ઓપરેટરોને નાગરિકો સાથે યોગ્ય અને સંવેદનશીલ રીતે વાતચીત કરવાની તાલીમ આપવી અત્યંત આવશ્યક છે. આ તાલીમમાં માનસિક સ્વાસ્થ્યની ગંભીરતાને સમજવી, આરોગ્ય સંબંધિત સાચી અને સંપૂર્ણ માહિતી આપવી અને કટોકટીની પરિસ્થિતિઓમાં કેવી રીતે માર્ગદર્શન આપવું તે અંગેનું શિક્ષણ સામેલ હોવું જોઈએ.
બીજી તરફ, તાજેતરમાં કચ્છમાં જોવા મળેલી પરિસ્થિતિ દર્શાવે છે કે સરકાર યોગ્ય સમયે યોગ્ય પગલાં લઈ રહી છે. યુદ્ધ વિરામના નિર્ણય અને રાત્રે લાઈટ ચાલુ રાખવાના કચ્છ કલેકટરના આદેશથી સામાન્ય લોકોને ઘણી રાહત મળી છે. આના કારણે મેલેરિયા જેવા રોગોને ફેલાતો અટકાવવામાં મદદ મળી શકે છે.આમ, સરકારના સકારાત્મક પ્રયાસો પ્રશંસનીય છે, પરંતુ 104 હેલ્પલાઇન જેવા મહત્વપૂર્ણ સેવા કેન્દ્રો પર કાર્યરત કર્મચારીઓને વધુ સારી તાલીમ આપીને સિસ્ટમમાં રહેલી નાની ખામીઓને પણ દૂર કરી શકાય છે. આનાથી નાગરિકોને વધુ સારી અને અસરકારક સેવાઓ મળી શકશે અને સરકારની લોકકલ્યાણની ભાવના વધુ મજબૂત બનશે.
