વાત્સલ્યમ્ સમાચાર,
પૂજા ઠક્કર – મુંદરા કચ્છ.
સાવધાન: તમે પી રહ્યા છો તે કેરીનો રસ અસલી છે કે ‘કેમિકલનું કોકટેલ’? બજારમાં સસ્તા રસના નામે આરોગ્ય સાથે ચેડાં?
મુંદરા, તા. 7:
ગુજરાતમાં હાલમાં ફૂડ એન્ડ ડ્રગ્સ કંટ્રોલ એડમિનિસ્ટ્રેશન દ્વારા નકલી પનીર અને એનાલોગ પનીરના વેપલાઓ સામે કડક ઝુંબેશ ચલાવવામાં આવી હતી ત્યારે હવે ઉનાળાની સિઝનમાં ‘ફળોના રાજા’ ગણાતી કેરીના રસમાં પણ મોટા પાયે ભેળસેળ થતી હોવાની આશંકાએ જોર પકડ્યું છે. બજારમાં ગુણવત્તાયુક્ત કેરીનો ભાવ 250 થી 300 પ્રતિ કિલો હોય ત્યારે તેની સામે તૈયાર રસ માત્ર 180 થી 200 માં વેચાતો જોઈને ગ્રાહકોમાં અનેક સવાલો ઊભા થયા છે.
સસ્તો રસ અને ભેળસેળનું ગણિત:
નિષ્ણાતોના મતે એક કિલો કેરીમાંથી માંડ 400 થી 500 ગ્રામ જેટલો જ શુદ્ધ રસ નીકળે છે. આ ગણતરીએ જોતા કેરીના ભાવ કરતા પણ સસ્તો રસ વેચવો વ્યવહારિક રીતે અશક્ય છે. નફાખોરીના આ ખેલમાં કેટલાક અસામાજિક તત્વો સસ્તું કોળું અને પપૈયું બાફીને તેને કેરીના રસમાં ભેળવી રહ્યા હોવાની વિગતો પ્રકાશમાં આવી છે. આ મિશ્રણનો સ્વાદ કુદરતી લાગે તે માટે તેમાં વધુ પ્રમાણમાં ખાંડ, સેકરીન અને કૃત્રિમ મીઠાશ ઉમેરવામાં આવે છે.
આરોગ્ય માટે જોખમી ‘આર્ટિફિશિયલ કલર અને એસેન્સ’:
માત્ર મિશ્રણ જ નહીં પણ ગ્રાહકોને આકર્ષવા માટે રસમાં ઘાટો લાલ-પીળો રંગ આપવા માટે જોખમી આર્ટિફિશિયલ કલર્સ અને કેરી જેવી સુગંધ લાવવા માટે કેમિકલ એસેન્સનો ઉપયોગ કરવામાં આવે છે. સ્વાસ્થ્ય નિષ્ણાતોએ ચેતવણી આપી છે કે આવા કેમિકલયુક્ત પદાર્થોનું સેવન કરવાથી “કિડની અને લીવર” જેવા મહત્વના અંગોને ગંભીર નુકસાન થઈ શકે છે.
તંત્ર પાસે કડક કાર્યવાહીની માંગ:
કચ્છ સહિત રાજ્યભરમાં જાગૃત નાગરિકો દ્વારા ફૂડ એન્ડ ડ્રગ્સ કંટ્રોલ એડમિનિસ્ટ્રેશન પાસે નમૂનાઓ લઈ તપાસ કરવાની માંગ કરવામાં આવી છે. ખાસ કરીને કચ્છમાં સ્ટાફની અછત હોવાને કારણે સ્થાનિક નગરપાલિકાના સેનેટરી ઇન્ચાર્જ આ બાબતે સક્રિય થઈને દરોડા પાડે તેવી લોકોની પ્રબળ ઈચ્છા છે.
ગ્રાહકો માટે સલાહ:
* માત્ર સસ્તું જોઈને કેરીનો રસ ખરીદવાનું ટાળો.
* હંમેશા વિશ્વાસપાત્ર અને જાણીતા વિક્રેતા પાસેથી જ ખરીદી કરો.
* શક્ય હોય ત્યાં સુધી ઘરે જ તાજી કેરી લાવીને રસ બનાવવાનો આગ્રહ રાખો.
તમારા અને તમારા પરિવારના સ્વાસ્થ્ય સાથે બાંધછોડ ન કરો અને ભેળસેળિયા તત્વોથી સાવધ રહો.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
