વાત્સલ્યમ સમાચાર,બળવંતસિંહ ઠાકોર,વડનગર
આરોગ્ય મંત્રી ઋષિકેશ પટેલે જણાવ્યું હતું કે, સહકારી પ્રવૃત્તિઓને વેગ મળે તેવી વ્યવસ્થાઓ સરકાર દ્વારા કરવામાં આવી છે. પ્રધાનમંત્રીશ્રી નરેન્દ્રભાઈ મોદીએ સહકારીતાને અગ્રીમતા આપીને દેશમાં અલગ સહકાર વિભાગની સ્થાપના કરી છે. કેન્દ્રીય સહકાર મંત્રીશ્રી અમિતભાઈ શાહના નેતૃત્વ હેઠળ દેશભરમાં સહકારી સેવાઓ વધુ સુદ્રઢ બને તેવા પ્રયાસો કરવામાં આવી રહ્યા છે.
વધુમાં મંત્રી એ જણાવ્યું હતું કે ગામનો પૈસો ગામમાં રહે અને આ પૈસો ગામ લોકોના જ કામમાં આવે તે માટે ગ્રામીણ વિસ્તારોમાં પણ બેંકોની શાખાઓ બની રહી છે અને નાના મોટા ધંધા માટે લોકોની જરૂરિયાત મુજબ આ બેંકો દ્વારા લોન પણ આપવામાં આવે છે ત્યારે કુકરવાડા સહકારી બેંક છેવાડાના માનવી કે જે આગળ વધવાની ભાવના ધરાવે છે તેઓને મદદરૂપ થશે તેઓ મંત્રીશ્રીએ વિશ્વાસ વ્યક્ત કર્યો હતો.
આ પ્રસંગે લોકસભા સાંસદ હરિભાઈ પટેલે વડાપ્રધાનના વતનમાં ગુરુપૂર્ણિમાના પવિત્ર દિવસે કુકરવાડા સહકારી બેન્કનો શુભારંભ થવા પર સૌને શુભેચ્છાઓ પાઠવી હતી વધુમાં તેમણે જણાવ્યું કે હીરાભાઈ પટેલ દ્વારા શરૂ કરેલ કુકરવાડા બેંકની આજે 11મી શાખા નું ઉદઘાટન થયું છે, જે સહકારી બેંકની લોકો પર વિશ્વાસનીયતા દર્શાવે છે. તાજેતરમાં આણંદ ખાતે ત્રિભુવન સહકારી યુનિવર્સિટીની સ્થાપના કરવામાં આવી છે જે ગુજરાતની સહકારી સમૃદ્ધિ દર્શાવે છે.
આ કાર્યક્રમમાં અગ્રણીશ્રી સોમાભાઈ મોદી, પાટણ લોકસભાના સાંસદશ્રી ભરતસિંહ ડાભી, રાજ્યસભાના સાંસદશ્રી મયંકભાઇ નાયક, નગરપાલિકા પ્રમુખ મિતીકાબેન શાહ, બેંકના ચેરમેન કિર્તીભાઈ પટેલ, અગ્રણી સર્વે કાંતિભાઈ પટેલ,કાનાજી ઠાકોર, મહેશભાઈ, કમલભાઈ પટેલ,ઘેમરજી ઠાકોર સહિત સહકારી ક્ષેત્રના અગ્રણીઓ, તેમજ બેંકના કર્મચારીઓ સહિત નગરજનો ઉપસ્થિત રહ્યા હતા.
