MORBI:મોરબી પોલીસ દ્વારા ‘તેરા તુજકો અર્પણ’ કાર્યક્રમ હેઠળ ₹૫.૧૦ લાખના ૩૧ ખોવાયેલા મોબાઈલ મૂળ માલિકોને પરત સોંપાયા
MORBI:મોરબી પોલીસ દ્વારા ‘તેરા તુજકો અર્પણ’ કાર્યક્રમ હેઠળ ₹૫.૧૦ લાખના ૩૧ ખોવાયેલા મોબાઈલ મૂળ માલિકોને પરત સોંપાયા
મોરબી સીટી બી ડિવિઝન પોલીસે “પોલીસ પ્રજાનો મિત્ર છે” એ સૂત્રને ફરી એકવાર સાર્થક કરી બતાવ્યું છે. ‘તેરા તુજકો અર્પણ’ કાર્યક્રમ અંતર્ગત પોલીસે ટેકનોલોજીનો ઉત્તમ ઉપયોગ કરીને નાગરિકોના ખોવાયેલા આશરે ₹૫,૧૦,૦૦૦/- ની કિંમતના કુલ ૩૧ જેટલા મોબાઈલ ફોન શોધી કાઢીને તેમના મૂળ માલિકોને સફળતાપૂર્વક પરત સોંપ્યા છે.
મોરબી સીટી બી ડિવિઝન પોલીસ સ્ટેશનના ઉચ્ચ અધિકારીઓના સુપરવિઝન હેઠળ સ્ટાફને નાગરિકોના ખોવાયેલ કે ચોરાયેલ મોબાઈલ શોધી કાઢવા માટે ખાસ સૂચના આપવામાં આવી હતી. જેને પગલે પોલીસ ટીમે કેન્દ્ર સરકારના “CEIR” (Central Equipment Identity Register) પોર્ટલનો ઉપયોગ કર્યો હતો. પોર્ટલ પર ગુમ થયેલા મોબાઈલની વિગતો દાખલ કરી, સતત ટેકનિકલ મોનિટરિંગ અને વર્કઆઉટ કરીને પોલીસે ટૂંક સમયમાં જ આ ૩૧ મોબાઈલ શોધી કાઢવામાં સફળતા મેળવી હતી.
આ તમામ મોબાઈલ ફોન એક કાર્યક્રમ યોજીને અરજદારોને પરત કરવામાં આવ્યા હતા. પોતાના ખોવાયેલા ફોન અચાનક પરત મળતાં નાગરિકોના ચહેરા પર ખુશી જોવા મળી હતી અને તેમણે મોરબી પોલીસની આ કામગીરી તેમજ સેવાકીય અભિગમની મુક્તમને પ્રશંસા કરી આભાર વ્યક્ત કર્યો હતો. સુરક્ષાની સાથે સાથે પ્રજા પ્રત્યેની પોતાની સામાજિક જવાબદારી નિભાવીને સીટી બી ડિવિઝન પોલીસે મોરબીમાં એક ઉત્કૃષ્ટ ઉદાહરણ પૂરું પાડ્યું છે.
