પંચમહાલ ગોધરા
નિલેશભાઈ દરજી શહેરા 
ગોધરા: પંચમહાલ જિલ્લાના ગોધરા શહેરની પીપલ ટ્રી ફાઉન્ડેશન સંસ્થામાં, અભયમ 181 મહિલા હેલ્પલાઇનની ટીમ દ્વારા એક ખાસ જાગૃતિ કાર્યક્રમનું આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ્ય મહિલાઓ અને યુવતીઓને તેમના અધિકારો અને સુરક્ષા વિશે જાગૃત કરવાનો હતો. સંસ્થાની વિદ્યાર્થિનીઓ અને સ્ટાફ સભ્યોએ આ કાર્યક્રમમાં ઉત્સાહપૂર્વક ભાગ લીધો હતો.
અભયમ 181 મહિલા હેલ્પલાઇનના કાઉન્સેલર, શ્રીમતી દીપલ પટેલ, દ્વારા આ કાર્યક્રમમાં વિસ્તૃત માહિતી આપવામાં આવી હતી. તેમણે જણાવ્યું હતું કે કોઈપણ મહિલા, યુવતી કે વિદ્યાર્થિની મુશ્કેલીના સમયે 181 મહિલા હેલ્પલાઇન પર કોલ કરીને મદદ માંગી શકે છે. આ સેવા ચોવીસ કલાક વિનામૂલ્યે ઉપલબ્ધ છે અને જરૂરિયાતમંદ મહિલાઓને મદદ, માર્ગદર્શન અને બચાવની સેવાઓ પૂરી પાડે છે.
દીપલ પટેલે વધુમાં માહિતી આપતા કહ્યું કે ઘરેલુ હિંસા, શારીરિક, માનસિક કે જાતીય સતામણી, લગ્નજીવનના વિખવાદો, લગ્નેતર સંબંધો અને કાર્યસ્થળ પર જાતીય સતામણી જેવા અનેક કિસ્સાઓમાં અભયમની ટીમ સફળતાપૂર્વક કામગીરી કરી રહી છે. અભયમની ત્વરિત પ્રતિસાદ આપવાની કામગીરીને કારણે પીડિત મહિલાઓને સમયસર મદદ મળી રહે છે અને આ સેવામાં લોકોનો વિશ્વાસ દિન-પ્રતિદિન વધી રહ્યો છે.
આ ઉપરાંત, તેમણે ઝડપી સેવાઓ મેળવવા માટે સ્માર્ટફોનમાં ‘અભયમ એપ્લિકેશન’ ડાઉનલોડ કરવા માટે પણ અનુરોધ કર્યો હતો. કાર્યક્રમના અંતે, સ્વ-બચાવની કેટલીક ટેકનિક્સ અને સેફ્ટી પ્લાન વિશે પણ માર્ગદર્શન આપવામાં આવ્યું હતું. આ સમગ્ર કાર્યક્રમને સફળ બનાવવા માટે પીપલ ટ્રી ફાઉન્ડેશનના સ્ટાફ દ્વારા સંપૂર્ણ સહયોગ પ્રાપ્ત થયો હતો.
