🚭 મુંદરાના સુખપરમાં વ્યસનમુક્તિ અભિયાન અંતર્ગત જાગૃતિ રેલી યોજાઈ

૧૮ વર્ષથી ઓછી ઉંમરની વ્યક્તિને તમાકુનું વેચાણ એ દંડનીય ગુનો છે

POOJA THACKER2 hours agoLast Updated: November 11, 2025

7 1 minute read

રિપોર્ટ : પુજા ઠક્કર, મુંદરા-કચ્છ.

🚭 મુંદરાના સુખપરમાં વ્યસનમુક્તિ અભિયાન અંતર્ગત જાગૃતિ રેલી યોજાઈ : ૧૮ વર્ષથી ઓછી ઉંમરની વ્યક્તિને તમાકુનું વેચાણ એ દંડનીય ગુનો છે

મુંદરા, તા. 11 : મુંદરા તાલુકાના સુખપર વિસ્તારમાં યુવા પેઢીને વ્યસનમુક્ત કરવાના ઉદ્દેશ્ય સાથે આરોગ્ય વિભાગ અને સુખપર પ્રાથમિક શાળાના સંયુક્ત ઉપક્રમે એક જનજાગૃતિ રેલી અને કાર્યક્રમનું આયોજન કરવામાં આવ્યું હતું.

આ અભિયાનમાં પ્રાથમિક કક્ષાના બાળકોને નાની ઉંમરથી જ વ્યસનની લતથી બચાવવા પર ભાર મૂકવામાં આવ્યો હતો. ખાસ કરીને બાળકોને સ્થાનિક કચ્છી ભાષામાં સમજણ આપીને તમાકુયુક્ત બનાવટોનો ઉપયોગ ન કરવા તથા કેમિકલયુક્ત નાસ્તાને બદલે ઘરનો પોષ્ટિક તાજો આહાર લેવાની સલાહ આપવામાં આવી હતી. શાળાના તમામ બાળકોને વ્યસનમુક્તિનો સંકલ્પ પણ લેવડાવવામાં આવ્યો હતો.

આ સમગ્ર કાર્યક્રમ સુખપર પ્રાથમિક શાળાના આચાર્યશ્રી અબ્દુલ સમદ ખત્રીના માર્ગદર્શન હેઠળ યોજાયો હતો. શહેરી આરોગ્ય કેન્દ્રના ડો. શ્રેષ્ઠીબેન ગોસ્વામીની આગેવાની હેઠળ આરોગ્ય વિભાગના સુપરવાઇઝર પ્રકાશભાઈ ઠક્કર, કમળાબેન ફફલ, મહેન્દ્રભાઈ વાઘેલા, હર્ષિકાબેન ધાયાણી, ઓમ મહેશ્વરી, નગમાબેન મલેક, અને હંસાબેન બોખાણી સહિતના કર્મચારીઓએ સહયોગ આપ્યો હતો. સમગ્ર કાર્યક્રમનું સફળ સંચાલન કોમ્યુનિટી હેલ્થ ઓફિસર પંકજકુમાર તાવીયાડ દ્વારા કરવામાં આવ્યું હતું.

————————-

🚨 મોઢાના કેન્સરનાં ભયસૂચક ચિહ્નો :

તાલુકા આરોગ્ય અધિકારી ડો. યોગેન્દ્ર પ્રસાદ મહતોએ તમાકુના સેવનથી થતા મોઢાના કેન્સર અંગે લોકોને જાગૃત કરતા તેના ભયસૂચક ચિહ્નો અંગે માહિતી આપી હતી. તેમણે અપીલ કરી હતી કે આ લક્ષણોમાંથી કોઈ પણ દેખાય તો તાત્કાલિક ડૉક્ટરનો સંપર્ક કરવો જોઈએ:

* મોઢામાં ૧૫ થી ૨૦ દિવસ કરતાં વધુ સમયથી ન રૂઝાતું ચાંદું.

* મોઢામાં થતા લાલ તથા સફેદ રંગના ડાઘ કે જે સહેલાઈથી જતા નથી.

* મોઢામાં ગરમ કે તીખું ખાવાથી બળતરા થવી.

* મોઢું ખોલવામાં તકલીફ પડવી (મુખનું ઓછું ખુલવું).

* જીભની ચામડીનું કડક થઈ જવું અને તેના હલનચલનમાં ઘટાડો થવો.

* ગાલની અંદરની ચામડી કડક થઈ જવી.

* ખોરાક ગળવામાં તકલીફ થવી.

* શરીરના વજનમાં ઘટાડો થવો.

* લસિકાગ્રંથિનું સૂજી જવું.

————————-

📜 તમાકુ નિયંત્રણ કાયદા (COTPA 2003) અંતર્ગત વેપારીઓ અને નાગરિકોને ચેતવણી

તાલુકા આરોગ્ય વિભાગે તમાકુના વેચાણ અંગેના સરકારી કડક કાયદાઓ (કોટપા ૨૦૦૩) વિશે પણ વેપારીઓ અને નાગરિકોને સમજણ આપી હતી. વિભાગે યાદીમાં સ્પષ્ટ જણાવ્યું છે કે જો જરૂર જણાશે તો કાયદાકીય દંડાત્મક કાર્યવાહી પણ કરવામાં આવશે.