🩸 જીવન દરમિયાન રક્તદાન – મૃત્યુ બાદ ચક્ષુદાન 👁️

રિપોર્ટ : પુજા ઠક્કર, મુંદરા-કચ્છ.

🩸 જીવન દરમિયાન રક્તદાન – મૃત્યુ બાદ ચક્ષુદાન 👁️

મુંદરા, તા. 13 : એક તરફ જ્યાં મૃત્યુ બાદ સ્વજનો શોકમાં ડૂબી જાય છે, ત્યાં કચ્છના આજીવન બ્રહ્માકુમાર અને આરોગ્ય વિભાગમાં સુપરવાઈઝર તરીકે ૩૫ વર્ષ સેવા આપનાર વિનોદભાઈ ઠક્કરે એક અનુકરણીય ઉદાહરણ પૂરું પાડ્યું છે. તાજેતરમાં તેમના માતૃશ્રી સ્વ. ગોદાવરીબેન ઠક્કરનું દુઃખદ અવસાન થતાં વિનોદભાઈએ તેમનું ચક્ષુદાન કરાવ્યું, જેનાથી એક પ્રજ્ઞાચક્ષુ વ્યક્તિના જીવનમાં ફરીથી દૃષ્ટિની રોશની પ્રગટી છે.

વિનોદભાઈએ જણાવ્યું હતું કે તેમનાં માતૃશ્રી ગોદાવરીબેન હંમેશા બીજાના સુખનો વિચાર કરતા અને સૌનું ધ્યાન રાખતા. તેમણે પોતાનાં શરીરની પરવા કર્યા વગર બીજા માટે વિચાર્યું. તેમના આ જીવનમૂલ્યોને શ્રદ્ધાંજલિ આપવા માટે વિનોદભાઈએ માતાની ઈચ્છા અનુસાર ચક્ષુદાન કરવાનો નિર્ણય લીધો. આ દાનથી એક વ્યક્તિને તાત્કાલિક દૃષ્ટિ મળી છે.

આ પ્રેરણાદાયી કાર્ય બદલ ભુજની અદાણી સંચાલિત જી.કે. જનરલ હોસ્પિટલ દ્વારા વિનોદભાઈનું સન્માન કરવામાં આવ્યું હતું. સન્માન સ્વીકારતી વખતે વિનોદભાઈએ લાગણીસભર અવાજે જણાવ્યું કે, “આ સન્માન ખરેખર મારાં માતૃશ્રીને અર્પણ કરું છું, જેઓ જતા જતા પણ કોઈકના જીવનમાં પ્રકાશ આપી ગયા છે. આવી પ્રેમ અને વાત્સલ્યથી ભરેલી માતાને મારા શત શત પ્રણામ.”

આ ઘટના સમાજ માટે એક પ્રેરણા બની છે કે મૃત્યુ એ અંત નથી, પરંતુ બીજાના જીવનમાં નવી આશા જગાવવાની એક તક પણ છે. ચક્ષુદાન એ એક મહાદાન છે, જે મૃત્યુ બાદ પણ જીવનને ઉજાગર કરી શકે છે. વિનોદભાઈના આ કદમથી ચક્ષુદાન માટેની જાગૃતિ વધશે અને વધુને વધુ લોકો આ મહાદાન માટે પ્રેરિત થશે તેવી આશા વ્યક્ત કરવામાં આવી છે.

👁️‍🗨️ ચક્ષુદાન – મહાદાન

મૃત્યુ બાદ આંખોનું દાન કરીને 2 લોકોની દૃષ્ટિ પરત આપી શકાય છે.

માત્ર પરિવારને જાણ કરી અને નજીકની આંખબેંકમાં સંપર્ક કરવો.

મૃત્યુ બાદ 6 કલાકની અંદર આંખો લઈ શકાય છે.

ચાલો, જીવન દરમિયાન રક્તદાન અને મૃત્યુ બાદ ચક્ષુદાનથી કોઈના જીવનમાં પ્રકાશ ફેલાવીએ.

(વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો : પુજા ઠક્કર, 9426244508, ptindia112@gmail.com)

Sorry, there was a YouTube error.