નેપાળમાં આવેલા ભીષણ પૂરના કારણે દેશના ઈન્ફ્રાસ્ટ્રક્ચરને મોટો ફટકો પડ્યો છે. રસ્તાઓ, પુલો, વીજ ઉત્પાદન, બેન્કિંગ વ્યવસ્થા, ટેલિકોમ નેટવર્ક અને સરકારી ઇમારતો સુધી પૂરના કારણે ભારે નુકસાન થયું છે, જેના લીધે અનેક વિસ્તારોમાં સામાન્ય જનજીવન સંપૂર્ણપણે ખોરવાઈ ગયું છે.
પૂરના પ્રકોપથી 11 હાઇડ્રો પાવર પ્લાન્ટ ક્ષતિગ્રસ્ત થયા છે. પ્લાન્ટ્સને નુકસાન થવાના કારણે 431 મેગાવોટ વીજળીનું ઉત્પાદન સિસ્ટમમાંથી બહાર થઈ ગયું છે, જેની સીધી અસર અસરગ્રસ્ત વિસ્તારોના વીજ પુરવઠા પર પડી છે.
નાણાકીય ક્ષેત્રને પણ પૂરનો મોટો માર પડ્યો છે. અડધા ડઝનથી વધુ બેંકો અને નાણાકીય સંસ્થાઓની ઓફિસો પાણીના પ્રવાહમાં વહી ગઈ છે, જ્યારે કુલ 12 થી વધુ બેંક શાખાઓને નુકસાન પહોંચતા કામગીરી અટકી ગઈ છે.
સંચાર વ્યવસ્થા પર પણ પૂરની ગંભીર અસર થઈ છે. NTC અને Ncell ના ટાવર્સ, ઓપ્ટિકલ ફાઈબર કેબલ્સ સહિત 25 થી વધુ ટેલિકોમ સાઈટ્સ ક્ષતિગ્રસ્ત થઈ છે. નેપાળ ટેલિકોમની ચીન સાથે જોડાતી ફાઈબર લાઇન પણ તૂટી ગઈ છે. આ સિવાય રસુવા, ધાદિંગ અને નુવાકોટમાં 6 સ્થળોએ લગાવેલી ફ્લડ અર્લી વોર્નિંગ સિસ્ટમ પણ તૂટી ગઈ છે.
નુવાકોટના બિદુર-6 સ્થિત ખામ્પાકામ્પમાં સેન્ટ્રલ જેલનું વહીવટી મકાન અને નેપાળ પોલીસ સુરક્ષા યુનિટની બિલ્ડિંગ પ્રભાવિત થઈ છે. ઇમારતોની બહારની દીવાલો અને વાહનોને નુકસાન થયું છે, જોકે રાહતની વાત એ છે કે જેલમાં બંધ તમામ 800 કેદીઓ સુરક્ષિત છે.
