અમેરિકા અને ચીન વચ્ચેના ભૌગોલિક-રાજકીય તણાવ વચ્ચે એક અત્યંત ચોંકાવનારો અને સનસનાટીભર્યો દાવો સામે આવ્યો છે. અમેરિકી રાષ્ટ્રપતિ ડોનાલ્ડ ટ્રમ્પ અને ટેસ્લા તેમજ સ્પેસએક્સના વડા એલન મસ્કના ચીન પ્રવાસ દરમિયાન આયોજિત સત્તાવાર સ્ટેટ ડિનર (State Dinner) હવે ભારે વિવાદોમાં ઘેરાયું છે. પ્રખ્યાત સોશિયલ મીડિયા બ્લોગર જેનિફર ઝેંગે એક સનસનાટીભર્યો દાવો કરતા જણાવ્યું છે કે, આ હાઈ-પ્રોફાઈલ ડિનર પાર્ટી દરમિયાન એલન મસ્કની બિલકુલ પાછળ સર્વિસ આપવા માટે જે વેટ્રેસ ઉભી હતી, તે કોઈ સામાન્ય હોટેલ સ્ટાફ નહોતી, પરંતુ ચીનની પીપલ્સ લિબરેશન આર્મી (PLA) ની એક અત્યંત પ્રભાવશાળી અને વરિષ્ઠ મહિલા અધિકારી મેજર ચેન્ગ ચેન્ગ હતી.
બ્લોગર જેનિફર ઝેંગે સોશિયલ મીડિયા પ્લેટફોર્મ પર પુરાવા તરીકે કેટલીક તસવીરો શેર કરીને શ્રેણીબદ્ધ પોસ્ટ કરી છે. તેમણે દાવો કર્યો છે કે ભોજન સમારંભમાં ભોજન પીરસતી આ મહિલા ચીની કમ્યુનિસ્ટ પાર્ટી (CCP) ની સક્રિય સભ્ય છે અને પીએલએ (PLA) ની પ્રતિષ્ઠિત ‘ઓનર ગાર્ડ સેરેમોનિયલ બ્રિગેડ’ ની બટાલિયન કમાન્ડર છે. ઝેંગે આ મહિલાની લશ્કરી ગણવેશ (આર્મી યુનિફોર્મ) વાળી જૂની તસવીરો પણ જાહેર કરી છે, જેમાં તેનો ચહેરો વેટ્રેસ સાથે તદ્દન મળતો આવે છે. ઝેંગે વધુમાં એક ગંભીર આક્ષેપ કર્યો છે કે આટલા મોટા આંતરરાષ્ટ્રીય ભોજન સમારંભ દરમિયાન ચેન્ગ ચેન્ગે કદાચ પોતાના વેટ્રેસના કપડાંની નીચે કોઈ ગુપ્ત બંદૂક કે અન્ય કોઈ શંકાસ્પદ ઉપકરણ છુપાવી રાખ્યું હોઈ શકે છે.
આ વિવાદ બાદ આંતરરાષ્ટ્રીય ડિફેન્સ એક્સપર્ટ્સનું ધ્યાન મેજર ચેન્ગ ચેન્ગ (Cheng Cheng) ના પ્રોફાઇલ તરફ ગયું છે, જે ચીનની સેનામાં ખૂબ જ મોટું નામ માનવામાં આવે છે.
જન્મ અને સેનામાં એન્ટ્રી: ચેન્ગ ચેન્ગનો જન્મ December 1986 માં શેડોંગ પ્રાંતના વેઈફાંગમાં થયો હતો. તેઓ માત્ર 18 વર્ષની નાની ઉંમરે વર્ષ 2004 માં ચીની સેનામાં ભરતી થયા હતા. શરૂઆતના વર્ષોમાં તેમણે લશ્કરમાં કોમ્યુનિકેશન સોલ્જર (સંદેશાવ્યવહાર સૈનિક) તરીકે ફરજ બજાવી હતી અને ત્યારબાદ નર્સિંગનો ઉચ્ચ અભ્યાસ કર્યો હતો.
ઓનર ગાર્ડમાં પસંદગી: વર્ષ 2008 માં ચીનના 60 માં રાષ્ટ્રીય દિવસની ભવ્ય પરેડ માટે તેમની પસંદગી કરવામાં આવી હતી, પરંતુ અંતિમ સમયે ઊંચાઈ વધી જવાના કારણે તેમને બેકઅપ ટીમમાં રાખવામાં આવ્યા હતા. ત્યારબાદ વર્ષ 2012 માં તેમની પ્રતિભા જોઈને તેમને ‘PLA ઓનર ગાર્ડ સેરેમોનિયલ બ્રિગેડ’ માં સત્તાવાર રીતે સામેલ કરવામાં આવ્યા હતા.
પ્રથમ મહિલા કમાન્ડરનો ઇતિહાસ: વર્ષ 2014 થી તેઓ આ સેરેમોનિયલ બ્રિગેડની મહિલા યુનિટના મુખ્ય કમાન્ડર તરીકે કાર્યરત છે. તેમણે વર્ષ 2015 માં આયોજિત વર્લ્ડ વોર વિક્ટરી પરેડ સહિત ચીનના અનેક અતિ મહત્વના વૈશ્વિક રાજદ્વારી કાર્યક્રમોનું નેતૃત્વ કર્યું છે. ચેન્ગ ચેન્ગ ચીનની પ્રથમ મહિલા ઓનર ગાર્ડ કમાન્ડર તરીકે ઓળખાય છે, જેમણે ચીનની મહિલા લશ્કરી વ્યવસ્થા માટે સત્તાવાર મેન્યુઅલ અને નિયમો તૈયાર કર્યા છે. તેઓ અત્યાર સુધીમાં 200 થી વધુ હાઈ-લેવલ સ્ટેટ ફંક્શનનો હિસ્સો રહી ચૂક્યા છે અને વર્ષ 2018 થી સતત બે વખત ચીનની પ્રતિષ્ઠિત ‘નેશનલ પીપલ્સ કોંગ્રેસ’ (સંસદ) ના સભ્ય તરીકે પણ ચૂંટાઈ આવ્યા છે.
જોકે, રક્ષા નિષ્ણાતોનું કહેવું છે કે બ્લોગર જેનિફર ઝેંગ દ્વારા કરવામાં આવેલા આ દાવાઓ પર હજુ સુધી કોઈ સત્તાવાર મહોર વાગી નથી. ચીન સરકાર કે તેમની સરકારી મીડિયા એજન્સીઓએ આ ગંભીર આરોપો પર અત્યાર સુધી કોઈ પ્રતિક્રિયા આપી નથી કે કોઈ સત્તાવાર નિવેદન બહાર પાડ્યું નથી. સ્વતંત્ર તપાસ એજન્સીઓ દ્વારા પણ આ વેટ્રેસ અને મેજર ચેન્ગ ચેન્ગ એક જ મહિલા છે તેની સત્તાવાર પુષ્ટિ થઈ શકી નથી. અત્રે નોંધનીય છે કે જેનિફર ઝેંગ અગાઉ પણ ચીન સરકાર વિરુદ્ધ આવા અનેક વિવાદાસ્પદ અને ચોંકાવનારા દાવા કરી ચૂક્યા છે. વર્ષ 2023 માં, તેમણે કેનેડામાં ખાલિસ્તાની આતંકી હરદીપ સિંહ નિજ્જરની હત્યા પાછળ ચીનની કમ્યુનિસ્ટ પાર્ટી (CCP) નો હાથ હોવાનો દાવો કર્યો હતો, જે આંતરરાષ્ટ્રીય તપાસમાં ક્યારેય સાબિત થઈ શક્યો નહોતો.
આ વિવાદ વચ્ચે વૈશ્વિક સુરક્ષા નિષ્ણાતોનું માનવું છે કે ચીન લાંબા સમયથી વિદેશી રાષ્ટ્રોના વડાઓ, રાજદ્વારો અને મોટા ઉદ્યોગપતિઓ પર પ્રભાવ પાડવા કે તેમની ગુપ્ત માહિતી કઢાવવા માટે ‘ડિપ્લોમેટિક સ્પાયિંગ’ (રાજદ્વારી જાસૂસી) નો ઉપયોગ કરતું આવ્યું છે. અમેરિકામાં અગાઉ પણ આવા અનેક કિસ્સાઓ સામે આવ્યા છે જ્યાં ચીની એજન્ટો રાજકીય ઘૂસણખોરી કરતા પકડાયા છે. સુરક્ષા નિષ્ણાતોના મતે, જો જેનિફર ઝેંગનો આ દાવો સાચો સાબિત થાય, તો આ સુરક્ષામાં બહુ મોટી ક્ષતિ અને ગંભીર આંતરરાષ્ટ્રીય ગુનો ગણાશે. ચીનની સેનાના એક સક્રિય અને આટલા વરિષ્ઠ સૈન્ય અધિકારીને અમેરિકી રાષ્ટ્રપતિની હાજરીવાળા ભોજન સમારંભમાં સામાન્ય વેટ્રેસ તરીકે તહેનાત કરવા પાછળ ચોક્કસ કોઈ મોટું ષડયંત્ર હોઈ શકે છે. હાલ આ સમગ્ર મામલો સુપરપાવર અમેરિકા અને ચીન વચ્ચે ચર્ચા અને વિવાદનો નવો મંચ બની ગયો છે.
