વાત્સલ્યમ સમાચાર
ડાંગ
રાજ્યનાં છેવાડે આવેલ વનાચ્છાદિત ડાંગ જિલ્લામાં ગતરોજથી વરસાદી માહોલ જામતા ચોમાસુ પુરબહારમાં ખીલી ઉઠ્યુ છે.શનિવારે સતત બીજા દિવસે ડાંગ જિલ્લાનાં ગિરિમથક સાપુતારા, શામગહાન,ગલકુંડ,બોરખલ,આહવા,ચીંચલી,ગારખડી,સુબિર,સિંગાણા,બરડીપાડા,મહાલ,પીપલાઈદેવી,લવચાલી, ભેંસકાતરી,ઝાવડા,વઘઇ,સાકરપાતળ,કાલીબેલ સહિત પૂર્વપટ્ટી અને સરહદીય પંથકોમાં ધોધમાર વરસાદ પડતા સર્વત્ર પાણીની રેલમછેલ ફરી વળી હતી.ડાંગ જિલ્લામાં ધોધમાર વરસાદનાં પગલે લોકમાતાઓમાં અંબિકા, પૂર્ણા, ગીરા અને ખાપરી નદીમાં નવા નીર આવ્યા હતા.તેમજ વરસાદી માહોલનાં પગલે નીચાણવાળા ભાગોમાં પાણી ભરાયા હતા.શનિવારે ડાંગ જિલ્લાનાં ગામડાઓમાં ધોધમાર વરસાદ પડતા જંગલ વિસ્તારમાં આવેલ ઝરણા,વહેળા,અને નાના મોટા જળધોધ સક્રિય બનતા પ્રવાસીઓ માટે આકર્ષણનું કેન્દ્ર બન્યા હતા.ગિરિમથક સાપુતારા ખાતે શનિવારે પણ વરસાદી માહોલ જામતા વાતાવરણ બેવડાયુ હતુ. સાપુતારા ખાતે સતત બીજા દિવસે ગાઢ ધુમ્મસિયા વાતાવરણની સફેદ ચાદર ઓઢાઈ રહેતા વિઝિબલિટી ઘટી હતી.શનિવારે ગિરિમથક સાપુતારા ખાતે મોટી સંખ્યામાં પ્રવાસીઓ ઉમટી પડ્યા હતા.સાપુતારા ખાતે શનિવારે મોટી સંખ્યામાં પ્રવાસીઓ ઉમટી પડતા હોટલ,રેસ્ટોરા,ટેન્ટ રિસોર્ટ ખાતે હાઉસફુલનાં પાટિયા ઝૂલી ઉઠ્યા હતા.શનિવારે વરસાદી માહોલમાં કુદરતી સૌંદર્યનો આસ્વાદ માણવા આવેલ પ્રવાસીઓએ ધુમ્મસિયા વાતાવરણમાં હરીફરીને તથા વિવિધ એક્ટિવિટીઓનો આસ્વાદ માણી ધન્યતા અનુભવી હતી.સાપુતારા ઘાટમાર્ગ સહિત સાપુતારાનાં જોવાલાયક સ્થળોએ ટ્રાફિક જામની સ્થિતિ ન સર્જાઈ તે માટે શનિવારે સાપુતારા પી.એસ.આઈ એન.ઝેડ.ભોયાનાં માર્ગદર્શન હેઠળ ઠેરઠેર બંદોબસ્ત ગોઠવવામાં આવ્યો હતો.પ્રવાસીઓની ભીડનાં પગલે સાપુતારા પોલીસ મથકની ટીમ સહિત હેડકવાટર્સનાં 06 પોલીસ જવાનો તથા વધારાનાં 30 હોમગાર્ડ તથા જી.આર. ડી જવાનોને ખડેપગે તૈનાત કરાયા હતા.બોક્ષ:-(1)આહવા તાલુકાનાં પાયરપાડા ગામની સીમમાં વરસાદી માહોલમાં એક બળદનું કરંટ લાગવાથી મોત નીપજ્યુ.આહવા તાલુકાનાં પાયરપાડા ગામ ખાતે રહેતા મોતીલાલ અર્જુનભાઈ ભોયેનાં પશુઓ ગતરોજ વરસાદી માહોલમાં ઘાસ ચરી રહ્યા હતા.તે વેળાએ ત્રણ રસ્તા ઉપર વીજ સબ સ્ટેશન પાસે તેમનો એક બળદ (ઉ. વ.07) ઘાસ ચરી રહ્યો હતો.ત્યારે બળદને અચાનક વીજ કરંટ લગતા વીજ સબ સ્ટેશન પાસે બળદ ઢળી પડ્યો હતો.જે બાદ પશુ ડોકટરને બોલાવવામાં આવ્યા હતા.જોકે પશુ ડોકટરે બળદને મરણ ગયેલ હોવાનું જાહેર કર્યું હતું.ત્યારે આકસ્મિક બનાવને લઇને સાપુતારા પોલીસ મથકે જાણવા જોગ ફરિયાદ નોંધાવવામાં આવી હતી. બોક્ષ-(2)આહવા અને વઘઇ પંથકમાં વરસાદી માહોલ જામતા વઘઇનો ગીરા ધોધ અને શિવઘાટનો ધોધ સક્રિય બનતા પ્રવાસીઓ માટે આકર્ષણનું કેન્દ્ર બન્યા.હાલમાં ગુજરાત રાજ્ય સહિત છેવાડેનાં ડાંગ જિલ્લામાં વરસાદી માહોલ જામ્યો છે.ડાંગ જિલ્લામાં વરસાદી માહોલનાં પગલે પ્રાકૃતિક સૌંદર્ય સોળે કળાએ ખીલી ઉઠ્યુ છે.હાલમાં જિલ્લા ભરમાં જ્યાં પણ નજર નાખો ત્યાં માત્રને માત્ર મઘમઘતી લીલોતરી અને આ લીલોતરીની વચ્ચેથી ફૂટી નીકળેલ નાનકડા જળધોધ સહિત ઝરણાઓ આકર્ષણનું કેન્દ્ર બની જવા પામ્યા છે.ત્યારે વરસાદને પગલે ડાંગની નદીઓમાં પાણીની આવક વધી છે.જેની સાથે આજરોજથી નાના – મોટા જળધોધ પણ જીવંત થયા છે.ત્યારે આહવા નજીક આવેલ શિવઘાટનો ધોધ પણ સક્રિય બન્યો છે.આ ધોધ મુખ્ય રોડ પર હોવાથી પ્રવાસીઓ માટે તે આકર્ષણનું કેન્દ્ર બનવા પામ્યો છે. જ્યારે અંબિકા નદી પર વઘઇ નજીક આવેલ ગીરાધોધ પ્રવાસીઓ માટે ખૂબ જ પ્રખ્યાત છે.આજરોજ વઘઇનો ગીરાધોધ પણ સક્રિય થતા અહીના દ્રશ્યો મનમોહક બની જવા પામ્યા હતા.વઘઇનાં ગીરાધોધમાં આજરોજ નવા નીર આવતા પ્રકૃતિપ્રેમીઓ ઝૂમી ઉઠયા હતા.બોક્ષ-(3)વઘઇ પંથકમાં ધોધમાર વરસાદનાં પગલે બે કોઝવેકમ પુલો ઊંડા પાણીમાં ગરક થતા ત્રણેક ગામો પ્રભાવિત થયા.ડાંગ જિલ્લાનાં વઘઇ પંથકમાં ધોધમાર વરસાદ પડતા નીચાણવાળા કોઝવેકમ પુલો ઊંડા પાણીમાં ગરક થયા હતા.ધોધમાર વરસાદને પગલે ડાંગ જિલ્લા પંચાયત હસ્તકના કુલ બે માર્ગો, કોઝ-વે ઓવર ટોપિંગ થવાને કારણે ઓવરોધાયા છે. જેમાં (1) ખાતળ ફાટકથી ઘોડી રોડ, અને (2) વાંઝટઆંબા-કોયલીપાડા રોડ અવરોધાવાને કારણે ઘોડી અને દિવડયાવન ગામોનો યાતાયાત પ્રભાવિત થવા પામ્યો છે.આ ગામોનાં વાહન ચાલકો, રાહદારીઓ, અને પશુપાલકો તથા ખેડૂતોને તંત્ર દ્વારા સૂચવવામાં આવેલા, વેકલ્પિક માર્ગોનો ઉપયોગ કરવાની અપીલ કરવામાં આવી છે..
