ચરોતર સાત ગામ પાટીદાર સમાજનો 23 મો સ્નેહ મિલન સમારોહ ઉજવાયો.

ચરોતર સાત ગામ પાટીદાર સમાજનો 23 મો સ્નેહ મિલન સમારોહ ઉજવાયો.
સમાજના 123 વિદ્યાર્થીઓને ઇનામ આપી સન્માનિત કરાયા.
તાહિર મેમણ – આણંદ – 05/11/2024 – આણંદ જિલ્લાના ખંભાત તાલુકાના કંસારી ગામે ગાયત્રી આઈસ ફેક્ટરીમાં શ્રી ચરોતર સાત ગામ પાટીદાર સમાજનો 23 મો સ્નેહ મિલન તેમજ ઈનામ વિતરણ સમારોહ ચંદન રાઈસ મિલના માલિક શ્રી અરવિંદભાઈ બાબુભાઈ પટેલના અધ્યક્ષ સ્થાને યોજવામાં આવ્યો હતો. આ પ્રસંગે અતિથિ વિશેષ તરીકે પેટલાદના વતની અને ધુવારણ જીઇબીમાં ડેપ્યુટી એન્જિનિયર તરીકે ફરજ બજાવતા દિપેશભાઈ બી પટેલે સ્થાન શોભાવ્યું હતું. ઇનામ વિતરણના દાતા શીતલબેન અશોકભાઈ ચુનીભાઇ પટેલ તથા તેમના સંતાનો હિનાક્ષીબેન, દેવાંશીબેન તથા મહિમાબેન હતા. દાતાશ્રીના પરિવાર દ્વારા સમાજના ધોરણ 10, 12, ડિપ્લોમા, બેચલર ડિગ્રી તથા માસ્ટર ડિગ્રી મેળવેલ કુલ 123 વિદ્યાર્થીઓને શિલ્ડ તેમજ ચાંદીનો મોમેન્ટો આપી સન્માનિત કરાયા હતા. સમાજના પ્રમુખ શ્રી ભાઈલાલભાઈ, મંત્રી મહેન્દ્રભાઈ, ઉપપ્રમુખ હિતેશભાઈ તથા અન્ય હોદ્દેદારોએ મહેમાનોને સન્માનિત કર્યા હતા. કાર્યક્રમની શરૂઆતમાં નાના કલોદરાના મીનુબેન કમલેશભાઈ પટેલ તથા પ્રેયલબેન કમલેશભાઈ પટેલે પ્રાર્થના તેમજ ભજન રજૂ કર્યા હતા. વિદ્યાર્થીઓને પ્રોત્સાહિત કરવાની સમાજની બાબતથી હિનક્ષીબેન ખૂબ પ્રભાવિત થયા હતા. તેઓએ સમાજ માટે ઉમદા કાર્ય કર્તા સર્વે હોદ્દેદારોનો તથા જ્ઞાતિબંધુઓનો આભાર વ્યક્ત કર્યો હતો. કાર્યક્રમનું સફળ સંચાલન શિક્ષણ સમિતિના કન્વીનર શ્રી નવીનભાઈ પટેલે સર્વેના સહકારથી કર્યું હતું. ઇનામ મેળવનાર તમામ વિદ્યાર્થીઓએ પોતાની મહેનત બદલ પ્રોત્સાહન મળતા ખૂબ જ ખુશી અનુભવી હતી.




