યુનિફોર્મ સિવિલ કોડ કમિટી દ્વારા નવી દિલ્હીના ગુજરાત ભવન ખાતે બે રાઉન્ડ જાહેર પરામર્શ યોજાયો
નવી દિલ્હી, ૧૨ એપ્રિલ ૨૦૨૫
પ્રથમ રાઉન્ડમાં, સમિતિએ મુસ્લિમ હિત રક્ષક સમિતિના પ્રતિનિધિઓ સાથે પરામર્શ કર્યો હતો. સમિતિના તમામ ૧૮ પ્રતિનિધિઓએ અનેક મુદ્દાઓ પર પોતાના મંતવ્યો રજૂ કર્યા હતા, જેમાં આ વિષય પર કાયદા ઘડવામાં રાજ્યનો અધિકારક્ષેત્ર અને બંધારણમાં સમાવિષ્ટ મૂળભૂત અધિકારો અને બંધારણના અનુચ્છેદ ૪૪, જે રાજ્ય નીતિના નિર્દેશક સિદ્ધાંતોનો ભાગ છે, વચ્ચેનો સંઘર્ષનો સમાવેશ થાય છે. તેમણે ૧૫ એપ્રિલ ૨૦૨૫ પહેલાં પોતાનું વિગતવાર લેખિત પ્રતિનિધિત્વ રજૂ કરવાનું પણ વચન આપ્યું હતું.
જાહેર પરામર્શના બીજા રાઉન્ડમાં, સમિતિએ શ્રી દિલ્હી ગુજરાતી સમાજના મંતવ્યો સાંભળ્યા.૧૪ પ્રતિનિધિઓએ પરામર્શ પ્રક્રિયામાં ભાગ લીધો. સમાજના પ્રતિનિધિઓએ ગુજરાતમાં યુનિફોર્મ સિવિલ કોડ લાગુ કરવા માટે પોતાનો ટેકો વ્યક્ત કર્યો.
બંને પ્રતિનિધિમંડળો – મુસ્લિમ હિત રક્ષક સમિતિ અને શ્રી દિલ્હી ગુજરાતી સમાજ – સાથેની વાતચીત સૌહાર્દપૂર્ણ અને રચનાત્મક રીતે હાથ ધરવામાં આવી હતી. બંને પરામર્શની પ્રક્રિયા દરમિયાન, યુસીસી સમિતિના અધ્યક્ષ, ન્યાયાધીશ (નિવૃત્ત) રંજના પ્રકાશ દેસાઈ; વરિષ્ઠ સલાહકાર શ્રી શત્રુઘ્ન સિંહ; અને સભ્યો – નિવૃત્ત વરિષ્ઠ આઈએએસ અધિકારી શ્રી સી.એલ. મીણા, એડવોકેટ શ્રી આર.સી. કોડેકર, ભૂતપૂર્વ કુલપતિ શ્રી દક્ષેશ ઠક્કર અને સામાજિક કાર્યકર સુશ્રી ગીતાબેન શ્રોફ – હાજર રહ્યા હતા. પરામર્શ બેઠકમાં રેસિડેન્ટ કમિશનર, ડૉ. વિક્રાંત પાંડે અને યુસીસી સમિતિના સચિવ શીતલ ગોસ્વામી પણ હાજર રહ્યા હતા.
