બનાસકાંઠાના ડીસા તાલુકાના ઢુવા ગામમાં દારૂના દૂષણને જડમૂળથી નાબૂદ કરવા માટે સમગ્ર ગામ એકજૂટ થયું છે. અંબાજી મંદિર ખાતે યોજાયેલી ગ્રામસભામાં અઢારે આલમના લોકોએ સાથે મળીને ગામમાં સંપૂર્ણ દારૂબંધીનો ઐતિહાસિક નિર્ણય લીધો છે. યુવા પેઢીને દારૂના વ્યસનથી બચાવવા, ગામમાં સ્વચ્છતા જાળવવા, શિક્ષણનું સ્તર ઊંચું લાવવા અને મહિલાઓની સુરક્ષા સુનિશ્ચિત કરવાના ઉમદા હેતુંથી ક્રાંતિકારી નિર્ણય લેવાયો છે. જેમાં દારૂનું વેચાણ કરનાર ઝડપાશે તો તેનું મુંડન કરીને 11 હજાર રૂપિયાનો દંડ વસૂલાશે.
મળતી માહિતી અનુસાર, અંબાજી મંદિર ખાતે યોજાયેલી ગ્રામસભામાં અઢારે આલમના લોકોએ સાથે મળીને ગામમાં સંપૂર્ણ દારૂબંધીનો ઐતિહાસિક નિર્ણય લીધો છે. આ સભામાં ઢુવા ગામના ડેપ્યુટી સરપંચ, માજીસરપંચ, દૂધ ઉત્પાદક સહકારી મંડળીના મંત્રી, પંચાયત સદસ્યો, વડીલો, યુવાનો અને રાજકીય-સામાજિક આગેવાનો હાજર રહ્યા હતા. જેમાં ગામને સંપૂર્ણપણે દારૂ મુક્ત કરવાનો સંકલ્પ લેવાયો હતો.
આ નિર્ણય અનુસાર, ઢુવા ગામમાં કોઈ પણ વ્યક્તિ દારૂનું સેવન કે વેચાણ કરી શકશે નહીં. જો બહારગામનો કોઈ વ્યક્તિ દારૂ વેચતો પકડાશે તો તેને ઢુવા ગામમાં મુંડન કરીને વરઘોડો કાઢવામાં આવશે અને 11, 000 રૂપિયાનો દંડ ફટકારવામાં આવશે. ગામમાં દારૂ વેચનારાઓને આ નિયમોનું પાલન નહીં કરે તો પંચાયત દ્વારા કાયદેસરની કાર્યવાહી કરાશે.
ગ્રામજનોએ દારૂબંધીના આ નિર્ણય પાછળના અનેક કારણો રજૂ કર્યા છે. ગ્રામજનોનું કહેવું છે કે, દારૂના કારણે શિક્ષણ બગડે છે, રાત્રે ગામમાં બહેન-દીકરીઓ સુરક્ષિત રીતે ફરી શકતી નથી અને સ્વચ્છતા જાળવવામાં પણ મુશ્કેલી પડે છે. ગ્રામજનોએ એવો પણ ઘટસ્ફોટ કર્યા છે કે, કેટલાક લોકો દૂધમાંથી એક લીટર જેટલું દૂધ કાઢીને ખાનગી ડેરીમાં વેચી દે છે અને તે પૈસાનો ઉપયોગ દારૂ પીવા માટે કરે છે, જેની જાણ ઘરના સભ્યોને પણ હોતી નથી. આ ઉપરાંત, મજૂરીના પૈસા પણ અડધા દારૂ પાછળ અને અડધા હપ્તા ભરવામાં ખર્ચાઈ જાય છે, જેના કારણે પરિવારો આર્થિક સંકળામણમાં મુકાય છે.
