સાણંદમાં ₹3300 કરોડના સેમિકન્ડક્ટર OSAT પ્લાન્ટનું 31 માર્ચે ઉદ્ઘાટન, ગુજરાત ટેક હબ તરીકે વધુ મજબૂત બનશે
રિપોર્ટર
હિતેન્દ્ર ગોસાઈ
અમદાવાદ
ગુજરાતના ઔદ્યોગિક વિકાસમાં એક મહત્વપૂર્ણ કડી તરીકે 31 માર્ચ 2026ના રોજ સાણંદ ખાતે સેમિકન્ડક્ટર ક્ષેત્રના મોટા પ્રોજેક્ટનું ઉદ્ઘાટન થવા જઈ રહ્યું છે. વડાપ્રધાન નરેન્દ્ર મોદી સાણંદમાં કેન્સ સેમિકોન દ્વારા નિર્મિત OSAT (આઉટસોર્સ્ડ સેમિકન્ડક્ટર એસેમ્બલી અને ટેસ્ટ) પ્લાન્ટનું લોકાર્પણ કરશે. અંદાજે ₹3300 કરોડના ખર્ચે તૈયાર થયેલ આ પ્રોજેક્ટ ભારતના સેમિકન્ડક્ટર મિશનને નવી ગતિ આપશે.
આ પ્રોજેક્ટને કેન્દ્ર સરકાર દ્વારા 23 સપ્ટેમ્બર 2024ના રોજ મંજૂરી આપવામાં આવી હતી અને ટૂંકા ગાળામાં તેનું નિર્માણ પૂર્ણ થયું છે. આ પ્લાન્ટ શરૂ થતાં સાણંદમાં સેમિકન્ડક્ટર ઇકોસિસ્ટમ વધુ મજબૂત બનશે અને રાજ્યના ઔદ્યોગિક વિકાસને નવી દિશા મળશે. માહિતી મુજબ, પ્લાન્ટમાં દરરોજ આશરે 60 લાખ ચિપ્સના ઉત્પાદન, ટેસ્ટિંગ અને પેકેજિંગની ક્ષમતા વિકસાવવામાં આવી રહી છે.
રાજ્યમાં મુખ્યમંત્રી ભૂપેન્દ્ર પટેલના નેતૃત્વમાં સેમિકન્ડક્ટર ક્ષેત્રે ઝડપથી પ્રગતિ થઈ રહી છે. અગાઉ માઇક્રોન પ્લાન્ટના પ્રારંભ બાદ હવે કેન્સ સેમિકોનની આ સુવિધા શરૂ થવાથી સાણંદ દેશના અગ્રણી સેમિકન્ડક્ટર ક્લસ્ટર તરીકે ઉભરી રહ્યું છે. આ પ્રોજેક્ટ સ્થાનિક રોજગારી સર્જનમાં પણ મહત્વપૂર્ણ યોગદાન આપશે અને સહાયક ઉદ્યોગોને પ્રોત્સાહન મળશે.
વડાપ્રધાન નરેન્દ્ર મોદીએ સેમિકન્ડક્ટર ક્ષેત્રના વિકાસને ભારતના ટેકનોલોજી આધારિત ભવિષ્ય માટે મહત્વપૂર્ણ ગણાવ્યો છે. તેમના જણાવ્યા અનુસાર, દેશ હવે માત્ર ઉત્પાદન સુધી મર્યાદિત નથી, પરંતુ સંપૂર્ણ વેલ્યૂ ચેઇન વિકસાવવાના દિશામાં આગળ વધી રહ્યો છે. ડિઝાઇન, મેન્યુફેક્ચરિંગ, ટેસ્ટિંગ અને લોજિસ્ટિક્સ જેવા તમામ તબક્કાઓને આવરી લેતી ઇકોસિસ્ટમ તૈયાર કરવામાં આવી રહી છે.
તાજેતરમાં માઇક્રોન સેમિકન્ડક્ટર પ્લાન્ટના ઝડપી વિકાસનો ઉલ્લેખ કરતા તેમણે જણાવ્યું હતું કે ભારતે માત્ર 900 દિવસમાં પ્રોજેક્ટને કાર્યરત બનાવી વિશ્વમાં એક નવી મિસાલ ઉભી કરી છે. આ ગતિશીલતા ભારતને વૈશ્વિક સેમિકન્ડક્ટર ક્ષેત્રમાં મજબૂત સ્થાન અપાવશે.
એક સમયે ઓટોમોબાઇલ હબ તરીકે ઓળખાતું સાણંદ હવે ઝડપથી સેમિકન્ડક્ટર હબ તરીકે વિકસિત થઈ રહ્યું છે. માઇક્રોન ટેકનોલોજી, કેન્સ સેમિકોન તેમજ અન્ય કંપનીઓના રોકાણોથી આ વિસ્તાર વૈશ્વિક સ્તરે ઓળખ મેળવતો બની રહ્યો છે. નિષ્ણાતોના મતે, આ વિકાસ આગામી દાયકામાં ગુજરાતને ટેકનોલોજી અને ઇલેક્ટ્રોનિક્સ ક્ષેત્રે અગ્રેસર બનાવશે.
સરકારના ‘વિકસિત ભારત’ના વિઝન અંતર્ગત સેમિકન્ડક્ટર ક્ષેત્રે થઈ રહેલા આ પ્રોજેક્ટ્સ દેશની આત્મનિર્ભરતા વધારવા, આયાત ઉપરની નિર્ભરતા ઘટાડવા અને નિકાસ ક્ષમતા વધારવામાં મહત્વપૂર્ણ સાબિત થશે. સાથે જ, સ્થાનિક યુવાનો માટે રોજગારીની નવી તકો ઊભી થવાની સાથે સંશોધન અને નવીનતાને પણ પ્રોત્સાહન મળશે.
આ પ્રોજેક્ટ સાથે સાણંદ હવે વૈશ્વિક સેમિકન્ડક્ટર નકશા પર પોતાની મજબૂત ઓળખ સ્થાપિત કરવાની દિશામાં એક વધુ મજબૂત પગલું ભરી રહ્યું છે.
