MORBI:મોરબી: વોર્ડ નં. 8 માં ટિકિટ જાહેર થાય તે પહેલા જ ભડકો; ‘આયાતી’ ઉમેદવારના વિરોધમાં ભજીયા પાર્ટી સાથે વિરોધ પ્રદર્શન
MORBI:મોરબી: વોર્ડ નં. 8 માં ટિકિટ જાહેર થાય તે પહેલા જ ભડકો; ‘આયાતી’ ઉમેદવારના વિરોધમાં ભજીયા પાર્ટી સાથે વિરોધ પ્રદર્શન
મોરબી: મોરબી મહાનગરપાલિકાની આગામી ચૂંટણીને લઈને હજુ ભાજપે ઉમેદવારોના નામ જાહેર કર્યા નથી, ત્યાં જ શહેરના રાજકારણમાં ગરમાવો આવી ગયો છે. ખાસ કરીને વોર્ડ નંબર 8 માં ‘આયાતી’ ઉમેદવારને ટિકિટ આપવાની ચર્ચાઓએ જોર પકડતા સ્થાનિક રહેવાસીઓમાં ભારે રોષ જોવા મળી રહ્યો છે. આ વિરોધ નોંધાવવા માટે ચિત્રકૂટ સોસાયટીના લોકોએ એક અનોખી ‘ભજીયા પાર્ટી’ યોજી ભાજપ હાઈકમાન્ડને ખુલ્લી ચીમકી આપી છે.
મોરબીના સનાળા રોડ પર આવેલી ચિત્રકૂટ સોસાયટી (વોર્ડ નં. 8) માં આજે મોડી સાંજે સ્થાનિક લોકો અને મહિલાઓ મોટી સંખ્યામાં એકત્રિત થયા હતા. સામાન્ય રીતે ભજીયા પાર્ટી આનંદ-પ્રમોદ માટે હોય છે, પરંતુ અહીં આ આયોજન રાજકીય વિરોધનું પ્રતીક બન્યું હતું. સ્થાનિકોનો આક્ષેપ છે કે:
ભાજપ દ્વારા આ વિસ્તારમાં કોઈ ‘આયાતી’ (બહારના) ઉમેદવારને ટિકિટ આપવાની પેરવી કરવામાં આવી રહી છે.
વર્ષોથી પાયાના સ્તરે કામ કરતા સ્થાનિક આગેવાનોની અવગણના કરવામાં આવી રહી છે.
સ્થાનિક રહેવાસીઓએ સ્પષ્ટ શબ્દોમાં જણાવ્યું હતું કે, જો ભાજપ કોઈ સ્થાનિક કાર્યકર કે આગેવાનને ટિકિટ આપશે તો તેમને કોઈ વાંધો નથી. પરંતુ જો બહારના ઉમેદવારને લાદવામાં આવશે તો:સ્થાનિક આગેવાનને અપક્ષ ઉમેદવાર તરીકે ચૂંટણી મેદાનમાં ઉતારવામાં આવશે.તમામ રહેવાસીઓ એકઠા થઈને ભાજપના આયાતી ઉમેદવારને હરાવી, અપક્ષ ઉમેદવારને વિજયી બનાવશે તેવો સંકલ્પ પણ લેવામાં આવ્યો હતો.”અમે વર્ષોથી ભાજપ સાથે જોડાયેલા છીએ, પણ જો પક્ષ સ્થાનિક મહેનત કરનારા કાર્યકરોને બદલે બહારના વ્યક્તિને મોકલશે, તો અમે તેને સ્વીકારીશું નહીં.” – સ્થાનિક રહેવાસી મોરબી ભાજપ માટે ‘કપરા ચઢાણ’ નોંધનીય છે કે માત્ર વોર્ડ નં. 8 જ નહીં, અગાઉ વોર્ડ નં. 3 માં પણ ઓબીસી સમાજ દ્વારા આયાતી ઉમેદવારના વિરોધમાં આવેદનપત્ર આપવામાં આવ્યું હતું. હજુ તો 52 બેઠકો માટે ઉમેદવારોના સત્તાવાર નામ જાહેર થયા નથી, ત્યાં જ જે રીતે આંતરિક વિરોધના સુર ઉઠી રહ્યા છે, તે જોતા આગામી દિવસોમાં ભાજપ માટે મોરબીમાં ચૂંટણીની રાહ મુશ્કેલ બને તેવા એંધાણ વર્તાઈ રહ્યા છે.
