સ્થાનિક સ્વરાજ્યની ચૂંટણી પહેલા 3 ઉમેદવારોના મોત નિપજ્યા, બેઠકોની ચૂંટણી મોકૂફ રખાઈ
ગાંધીનગરમાં સ્થાનિક સ્વરાજ્યની ચૂંટણી પહેલા દુઃખદ ઘટના સામે આવી છે. ત્રણ અલગ અલગ વિસ્તારોમાં ઉમેદવારોના અચાનક અવસાનને કારણે ચૂંટણી પ્રક્રિયામાં વિક્ષેપ આવ્યો છે. આ પરિસ્થિતિને ધ્યાનમાં રાખીને ચૂંટણી આયોગે ત્રણ બેઠકો પર મતદાન મોકૂફ રાખવાનો નિર્ણય લીધો છે. માહિતી અનુસાર, બાવળા, બારડોલી અને સાબરકાંઠા વિસ્તારમાં એક-એક ઉમેદવારના અવસાનના બનાવો નોંધાયા છે. જેના કારણે આ વિસ્તારોમાં યોજાનારી ચૂંટણી હાલ માટે સ્થગિત કરવામાં આવી છે. સ્થાનિક સ્તરે આ સમાચારથી શોકનો માહોલ છવાઈ ગયો છે અને રાજકીય વર્તુળોમાં પણ ચર્ચા ચાલી રહી છે.
ચૂંટણી આયોગે જણાવ્યું છે કે સામાન્ય ચૂંટણી પ્રક્રિયા પૂર્ણ થયા બાદ આ ત્રણ બેઠકો માટે નવી તારીખો જાહેર કરવામાં આવશે. આ માટે અલગથી કાર્યક્રમ ઘડવામાં આવશે જેથી મતદારોને ફરીથી મતદાન કરવાની તક મળી શકે. પ્રશાસન તરફથી તમામ જરૂરી કામગીરી હાથ ધરવામાં આવી રહી છે અને પરિસ્થિતિ પર સતત નજર રાખવામાં આવી રહી છે.
સ્થાનિક સ્વરાજ્યની ચૂંટણીને લઈ વહીવટી તંત્ર દ્વારા તૈયારીઓને આખરી ઓપ આપવામાં આવી રહ્યો છે. સાબરકાંઠાના વિજયનગરમાં તાલુકા પંચાયતની ચીતરીયા બેઠકની ચૂંટણી મોકૂફ રાખવાની વહીવટી તંત્રએ જાહેરાત કરતા લોકોમાં અનેક ચર્ચાઓ શરૂ થઈ જવા પામી હતી.
મળતી માહિતી મુજબ સાબરકાંઠાના વિજયનગરમાં તાલુકા પંચાયતની ચીતરીયા બેઠકની ચૂંટણી મોકૂફ રાખવા માટે વહીવટી તંત્ર દ્વારા જાહેરાત કરવામાં આવી છે. જેમાં તાલુકા પંચાયતના ભાજપના ઉમેદવારનું અવસાન થતા ચૂંટણી મોકૂફ કરવામાં આવી છે. તેમજ ભાજપના ઉમેદવારો લીનાબેન નિનામાનું થોડા સમયે પહેલા અવસાન થયું હતું. વહીવટી તંત્ર દ્વારા આગામી ટૂંક સમયમાં ચૂંટણીનું નવું શિડ્યુલ જાહેર કરવામાં આવશે.
સુરત જિલ્લાના બારડોલી તાલુકા પંચાયતની ચૂંટણીને લઈને એક મહત્વપૂર્ણ અને દુઃખદ સમાચાર સામે આવ્યા છે. અસ્તાન બેઠક પરથી કોંગ્રેસના ઉમેદવાર ધર્મેશ રાઠોડનું અવસાન થતાં ચૂંટણી પ્રક્રિયામાં અચાનક વળાંક આવ્યો છે. તેમના નિધનને કારણે અસ્તાન બેઠક પર યોજાનારી ચૂંટણી મોકૂફ રાખવામાં આવી છે. આ ઘટનાથી સ્થાનિક રાજકારણમાં શોકની લાગણી ફેલાઈ છે અને પાર્ટી કાર્યકરો તેમજ સમર્થકોમાં દુઃખનું માહોલ છવાઈ ગયો છે.
ઉમેદવારના અવસાનને કારણે ચૂંટણી પંચ દ્વારા અસ્તાન બેઠક પરની ચૂંટણી મોકૂફ રાખવાનો નિર્ણય લેવામાં આવ્યો છે. હવે આ બેઠક માટે નવી તારીખ જાહેર કરવામાં આવશે. આ ઘટનાએ સ્થાનિક રાજકીય વાતાવરણને અસર કરી છે અને તમામ પક્ષો દ્વારા ધર્મેશ રાઠોડને શ્રદ્ધાંજલિ આપવામાં આવી રહી છે. તેમના કાર્ય અને સમર્પણને યાદ કરીને લોકો તેમને શ્રદ્ધાંજલિ અર્પી રહ્યા છે. આ દુઃખદ ઘટનાએ ચૂંટણીના માહોલને એકદમ શાંત બનાવી દીધો છે.
