નવસારી મહાનગરપાલિકા દ્વારા ‘Waste to Best’ અભિયાન: કચરામાંથી સર્જન, સ્વચ્છતામાં નવી દિશા
વાત્સલ્યમ સમાચાર
મદન વૈષ્ણવ
નવસારી મહાનગરપાલિકા દ્વારા શહેરને વધુ સ્વચ્છ અને સુંદર બનાવવા માટે ‘Waste to Best’ અભિયાનને ગતિ આપવામાં આવી છે. સોલિડ વેસ્ટ મેનેજમેન્ટ (SWM) વિભાગ હેઠળ આ અનોખી પહેલ શહેરના જાહેર બગીચાઓમાં શરૂ કરવામાં આવી છે, જેમાં ખાસ કરીને જ્યુબિલી ગાર્ડન ખાતે સર્જનાત્મક પ્રવૃત્તિઓ હાથ ધરાઈ રહી છે.
આ અભિયાનનો મુખ્ય ઉદ્દેશ ફેંકી દેવાતી પ્લાસ્ટિક બોટલ્સ, ટીન કેન્સ અને અન્ય નકામા કચરાનો પુનઃઉપયોગ કરીને તેને આકર્ષક સુશોભન સામગ્રીમાં રૂપાંતરિત કરવાનો છે. બગીચામાં આવનાર નાગરિકો અને બાળકો માટે આ પ્રવૃત્તિ પ્રેરણાદાયી બની રહી છે, જ્યાં તેઓ પોતાના હાથથી કચરામાંથી કલા સર્જન કરી રહ્યા છે.
મહાનગરપાલિકાના અધિકારીઓ દ્વારા સ્થળ પર જઈ કામગીરીનું નિરીક્ષણ કરવામાં આવ્યું હતું. તેઓએ નાગરિકોને કચરાના યોગ્ય નિકાલ સાથે રિસાયકલિંગ તરફ પ્રોત્સાહિત કર્યા હતા. બગીચાઓમાં ખાસ ‘બોટલ કલેક્શન પોઈન્ટ’ ઉભા કરી પ્લાસ્ટિક વેસ્ટ એકત્રિત કરવાની સુવ્યવસ્થિત વ્યવસ્થા ઉભી કરવામાં આવી છે.
આ પહેલથી શહેરમાં ગંદકીમાં ઘટાડો થવા સાથે પર્યાવરણ સંરક્ષણ પ્રત્યે લોકોમાં જાગૃતિ પણ વધતી જોવા મળી રહી છે. ‘Waste to Best’ અભિયાન નવસારીને સ્વચ્છતા અને સર્જનાત્મકતાના અનોખા સમન્વય સાથે એક નવી ઓળખ આપી રહ્યું છે.
મહાનગરપાલિકા દ્વારા નાગરિકોને અપીલ કરવામાં આવી છે કે તેઓ પોતાના ઘરમાંથી નીકળતા કચરાનો યોગ્ય નિકાલ કરે અને આવા અભિયાનમાં સક્રિય ભાગ લઈ “સ્વચ્છ નવસારી, સુંદર નવસારી”ના સંકલ્પને સાકાર કરવામાં સહયોગ આપે.
