HALVAD:હળવદના સુખપરનો કુખ્યાત બુટલેગર ‘કાલી’ પાસા હેઠળ જેલહવાલે
મોરબી જિલ્લામાં દારૂબંધીના કાયદાનું કડક પાલન કરાવવા અને ગુનેગારોમાં ફાળ પાડવા માટે પોલીસ તંત્ર એક્શન મોડમાં આવ્યું છે. હળવદ પોલીસ સ્ટેશનમાં પ્રોહિબિશનના અનેક ગુનાઓમાં સંડોવાયેલ લિસ્ટેડ આરોપી સામે પાસા હેઠળ કાર્યવાહી કરવામાં આવી છે.
હળવદ તાલુકાના સુખપર ગામના રહેવાસી મયુરસિંહ ઉર્ફે કાલી ભરતભાઇ રાઠોડ સામે અગાઉ અંગ્રેજી દારૂના વેચાણ અને હેરાફેરીના અનેક ગુનાઓ નોંધાયા હતા. આ ઇસમની ગુનાહિત પ્રવૃત્તિઓ પર અંકુશ લાવવા માટે હળવદ પોલીસ દ્વારા તેની સામે પાસા (PASA – Prevention of Anti-Social Activities Act) દરખાસ્ત તૈયાર કરી મોરબી જિલ્લા મેજિસ્ટ્રેટને મોકલવામાં આવી હતી.
જિલ્લા મેજિસ્ટ્રેટ દ્વારા આ દરખાસ્તને મંજૂરી આપી પાસા વોરંટ ઇસ્યુ કરવામાં આવતા, હળવદ પોલીસ હરકતમાં આવી હતી. આરોપીને ઝડપી લેવા માટે પોલીસ દ્વારા અલગ-અલગ ટીમો બનાવવામાં આવી હતી.
ધરપકડ: પોલીસે મયુરસિંહ ઉર્ફે કાલીને સત્વરે શોધી કાઢી તેની અટકાયત કરી હતી. પાસા વોરંટની બજવણી કરી આરોપીને જેલ હવાલે કરવાની તજવીજ હાથ ધરવામાં આવી છે. મોરબી પોલીસની આ કામગીરીથી અસામાજિક તત્વો અને દારૂના ધંધાર્થીઓમાં ફફડાટ વ્યાપી ગયો છે. પોલીસના જણાવ્યા અનુસાર, આગામી સમયમાં પણ આવા તત્વો સામે કડક કાર્યવાહી ચાલુ રહેશે.
