MORBI:મોરબી જિલ્લા કલેક્ટરશ્રી સ્વપ્નિલ ખરેના અધ્યક્ષસ્થાને વર્ષ ૨૦૨૬-૨૭ ના ‘વાર્ષિક ઋણ આયોજન (ACP)’ નું વિમોચન કરાયું
MORBI:મોરબી જિલ્લા કલેક્ટરશ્રી સ્વપ્નિલ ખરેના અધ્યક્ષસ્થાને વર્ષ ૨૦૨૬-૨૭ ના ‘વાર્ષિક ઋણ આયોજન (ACP)’ નું વિમોચન કરાયું
કૃષિ, એમએસએમઈ, શિક્ષણ અને હાઉસિંગ સહિતના પ્રાથમિકતા ક્ષેત્રોમાં ધિરાણ વધારી જિલ્લાના સર્વાંગી વિકાસને વેગ અપાશે
સરકારની જનકલ્યાણકારી યોજનાઓના લાભાર્થીઓને સરળતાથી ધિરાણ ઉપલબ્ધ કરાવવા કલેક્ટરશ્રીનો બેંકોને અનુરોધ
મોરબી જિલ્લાના આર્થિક વિકાસને નવી ઊંચાઈએ લઈ જવા અને આત્મનિર્ભરતાને પ્રોત્સાહન આપવાના હેતુથી કલેક્ટર કચેરીના સભાખંડ ખાતે જિલ્લા કલેક્ટરશ્રી સ્વપ્નિલ ખરેના અધ્યક્ષસ્થાને વર્ષ ૨૦૨૬-૨૭ માટેના વાર્ષિક ઋણ આયોજન (Annual Credit Plan – ACP) નું વિધિવત લોન્ચિંગ કરવામાં આવ્યું હતું. જિલ્લા વહીવટી તંત્ર અને બેંકિંગ ક્ષેત્રના ઉચ્ચ અધિકારીઓની ઉપસ્થિતિમાં જિલ્લાના સર્વાંગી વિકાસ માટે વિવિધ ક્ષેત્રોના લક્ષ્યાંકો નિર્ધારિત કરવામાં આવ્યા હતા.
આ દરમિયાન જિલ્લામાં કૃષિ, એમએસએમઈ (MSME), શિક્ષણ, હાઉસિંગ તથા અન્ય અગ્રતા ધરાવતા ક્ષેત્રોમાં બેંકિંગ સેક્ટર દ્વારા વધુમાં વધુ ધિરાણ પૂરું પાડવા અંગે વિસ્તૃત ચર્ચા-વિચારણા હાથ ધરવામાં આવી હતી. જિલ્લા કલેક્ટરશ્રી સ્વપ્નિલ ખરેએ ઉપસ્થિત તમામ બેંકર્સને અનુરોધ કરતા જણાવ્યું હતું કે, બેંકોએ સરકારશ્રીની વિવિધ જનકલ્યાણકારી અને સ્વરોજગારલક્ષી યોજનાઓ હેઠળ સામાન્ય અને જરૂરિયાતમંદ લાભાર્થીઓ સુધી સરળતાથી ધિરાણ પહોંચે તે માટે સકારાત્મક અભિગમ દાખવવો જોઈએ.
જિલ્લા વિકાસ અધિકારીશ્રી વિદ્યાસાગરે ગ્રામ્ય અર્થતંત્રને મજબૂત કરવા પર ભાર મૂકતા જણાવ્યું હતું કે, ગ્રામ્ય વિસ્તારના વિકાસ તથા મહિલા સશક્તિકરણ અને સ્વરોજગારી આધારિત પ્રવૃત્તિઓમાં બેંકોની ભૂમિકા ખૂબ જ સક્રિય હોવી અનિવાર્ય છે. સક્ષમ ધિરાણ વ્યવસ્થા થકી જ છેવાડાના નાગરિકો આર્થિક રીતે પગભર બની શકશે. આ વેળાએ વાર્ષિક ઋણ આયોજનના લક્ષ્યાંકોને સમયસર સિદ્ધ કરવા માટે સંકલ્પબદ્ધતા વ્યક્ત કરવામાં આવી હતી.
આ પ્રસંગે જિલ્લા ગ્રામ વિકાસ એજન્સીના નિયામકશ્રી એન.એસ. ગઢવી, લીડ બેંક મેનેજરશ્રી સાકીર છીપા, નાબાર્ડ મોરબીના અધિકારીશ્રી આદિત્ય નિકમ, વિવિધ બેંકોના વરિષ્ઠ અધિકારીશ્રીઓ તેમજ સંબંધિત સરકારી વિભાગોના પ્રતિનિધિઓ ઉપસ્થિત રહ્યા હતા.
