MORBI:મોરબી જિલ્લા પંચાયતમાં મોટો ઉલટફેર: ભાજપની સત્તા છતાં કોંગ્રેસના ગીતાબેન દુબરિયા પ્રમુખ તરીકે બિનહરીફ ચૂંટાયા
MORBI:મોરબી જિલ્લા પંચાયતમાં મોટો ઉલટફેર: ભાજપની સત્તા છતાં કોંગ્રેસના ગીતાબેન દુબરિયા પ્રમુખ તરીકે બિનહરીફ ચૂંટાયા
મોરબી જિલ્લા પંચાયતના પ્રમુખની વરણીમાં એક ખૂબ જ રસપ્રદ અને રાજકીય ગરમાવો લાવી દે તેવા સમાચાર સામે આવ્યા છે. જિલ્લા પંચાયતમાં ભાજપ બહુમતી સાથે સત્તા પર આવ્યું હોવા છતાં, પ્રમુખ પદનું સુકાન કોંગ્રેસના વિજેતા ઉમેદવારના હાથમાં ગયું છે. નેકનામ બેઠક પરથી ચૂંટાયેલા કોંગ્રેસના મહિલા આગેવાન ગીતાબેન દુબરિયા મોરબી જિલ્લા પંચાયતના પ્રમુખ તરીકે બિનહરીફ ચૂંટાઈ આવ્યા છે.
અનામત બેઠકનું સમીકરણ: મોરબી જિલ્લા પંચાયતના પ્રમુખની આ બેઠક ટ્રાયબલ (આદિવાસી) માટે અનામત રાખવામાં આવી હતી. આ પ્રતિષ્ઠાભરી નેકનામ બેઠક પરથી ભાજપ, કોંગ્રેસ અને આમ આદમી પાર્ટી (AAP) ત્રણેય પક્ષોએ પોતાના મજબૂત ઉમેદવારો મેદાનમાં ઉતાર્યા હતા. આ ત્રિપાંખીયા જંગમાં સ્થાનિક સમીકરણોને આધારે કોંગ્રેસના ઉમેદવાર ગીતાબેન દુબરિયા ભવ્ય વિજેતા બન્યા હતા.
સામાન્ય રીતે જિલ્લા પંચાયતમાં જે પક્ષની સત્તા હોય તેના જ પ્રમુખ બનતા હોય છે. પરંતુ અહીં રસપ્રદ સ્થિતિ એ સર્જાઈ કે જિલ્લા પંચાયતમાં ભાજપની સત્તા આવી હોવા છતાં, પ્રમુખ પદ માટેની અનામત બેઠકના માપદંડમાં કોંગ્રેસના વિજેતા ઉમેદવાર ગીતાબેન દુબરિયા ફિટ બેસતા હતા. સામે પક્ષે અન્ય કોઈ મજબૂત દાવેદારી ન રહેતા આખરે ગીતાબેન દુબરિયાની બિનહરીફ વરણી કરવામાં આવી છે. આ અણધાર્યા રાજકીય વળાંકને કારણે મોરબીના રાજકારણમાં ભારે ચર્ચા જાગી છે. ભાજપ શાસિત જિલ્લા પંચાયતમાં હવે કોંગ્રેસના પ્રમુખ કઈ રીતે વહીવટ ચલાવે છે અને વિકાસ કાર્યોને આગળ વધારે છે તેના પર સૌની નજર રહેશે.
