વાત્સલ્યમ સમાચાર
મદન વૈષ્ણવ
ડાંગ જિલ્લાના પોલીસ અધિક્ષક શ્રી પુષ્કર યાદવે વઘઈ પોલીસ સ્ટેશનની મુલાકાત લઈ વાર્ષિક ઇન્સ્પેક્શન હાથ ધર્યું હતું. ઇન્સ્પેક્શન દરમિયાન પોલીસ સ્ટેશનની વહીવટી કામગીરી, ગુનાઓની તપાસ, રેકોર્ડની જાળવણી, કર્મચારીઓની શિસ્ત અને જાહેર સેવા સંબંધિત વિવિધ મુદ્દાઓની વિસ્તૃત સમીક્ષા કરવામાં આવી હતી.
પોલીસ અધિક્ષકે સ્ટેશનના ટર્નઆઉટ, ડ્રેસ કોડ, શિસ્તબદ્ધતા તથા વ્યવસ્થાપનનું નિરીક્ષણ કરી ઉચ્ચ સ્તરની કામગીરી જાળવવા જરૂરી માર્ગદર્શન આપ્યું હતું. ઉપરાંત ગુનાઓની તપાસ સંબંધિત દસ્તાવેજો, હથિયારખાનું, લોકઅપ, સ્ટેશન ડાયરી, ઈ-ગુજકોપ કામગીરી, સાયબર ક્રાઇમ સંબંધિત કામગીરી તેમજ પોલીસ સ્ટેશનની કાયદો-વ્યવસ્થા જાળવવાની ક્ષમતાનું પણ મૂલ્યાંકન કરવામાં આવ્યું હતું.
મુલાકાત દરમિયાન પોલીસ અધિક્ષકે પોલીસ સ્ટેશન ખાતે હાજર અરજદારો અને મુલાકાતીઓ સાથે સીધો સંવાદ સાધી તેમની રજૂઆતો, પ્રશ્નો અને ફરિયાદોની માહિતી મેળવી હતી. તેમણે ફરિયાદોના ઝડપી અને ન્યાયસંગત નિરાકરણ માટે સંબંધિત અધિકારીઓને જરૂરી સૂચનાઓ પણ આપી હતી.
બાદમાં પોલીસ અધિકારીઓ અને કર્મચારીઓ સાથે યોજાયેલી બેઠકમાં કાયદો-વ્યવસ્થા, મહિલા અને બાળ સુરક્ષા, સાયબર ગુનાઓની રોકથામ, પેન્ડિંગ કેસોના નિકાલ, પ્રોહિબિશન તેમજ જાહેર સુરક્ષા જેવા મહત્વપૂર્ણ વિષયો પર ચર્ચા કરવામાં આવી હતી. નાગરિકોને વધુ સારી, ઝડપી અને પારદર્શક પોલીસ સેવા ઉપલબ્ધ કરાવવા માટે વિશેષ ભાર મૂકવામાં આવ્યો હતો.
પોલીસ સ્ટેશન પરિસરની સ્વચ્છતા, રહેણાંક અને કેન્ટીન સુવિધાઓ, સરકારી મિલકતની જાળવણી તથા આધુનિક ટેક્નોલોજીના ઉપયોગ અંગે પણ સમીક્ષા કરી જરૂરી માર્ગદર્શન આપવામાં આવ્યું હતું. જિલ્લા પોલીસ અધિક્ષકે તમામ કર્મચારીઓને પ્રામાણિકતા, સંવેદનશીલતા અને જનસેવાના ભાવ સાથે ફરજ બજાવવા પ્રોત્સાહિત કર્યા હતા.
આ પ્રસંગે વઘઈ પોલીસ સ્ટેશનના તમામ પોલીસ અધિકારીઓ અને કર્મચારીઓ ઉપસ્થિત રહ્યા હતા. વાર્ષિક ઇન્સ્પેક્શન સફળતાપૂર્વક પૂર્ણ થતાં પોલીસ વિભાગની કાર્યક્ષમતા અને જવાબદારી પ્રત્યેની પ્રતિબદ્ધતા વધુ મજબૂત બન્યાનું જણાયું હતું.
