શહેરા પંથકમાં મેઘમહેર થતાં જ ખરીફ સીઝનનો પ્રારંભ: બિયારણ અને ખાતર ખરીદવા એગ્રો સેન્ટરો પર ખેડૂતોની ભારે ભીડ
પંચમહાલ શહેરા:-
નિલેશકુમાર દરજી શહેરા 
શહેરા તાલુકામાં ચોમાસાના પ્રથમ વરસાદના ધમાકેદાર આગમન સાથે જ સમગ્ર ગ્રામીણ વિસ્તારોમાં કૃષિ પ્રવૃત્તિઓએ જોર પકડ્યું છે. ચોમાસું બેસતાની સાથે જ ધરતીપુત્રો ઉત્સાહમાં આવી ગયા છે અને ચાલુ વર્ષે મબલખ પાકની આશા સાથે એગ્રો સેન્ટરો પર બિયારણ તેમજ ખાતરની ખરીદી કરવા માટે ઉમટી પડ્યા છે, જેના કારણે બજારોમાં ભારે ચહલપહલ જોવા મળી રહી છે.
તાલુકામાં લાંબા સમયની રાહ જોયા બાદ વાવણીલાયક સારો વરસાદ થતાં જ ગ્રામ્ય વિસ્તારના ખેડૂતો પોતાના પરિવારના સભ્યો સાથે ઉત્સાહભેર ખેતીકામમાં જોડાઈ ગયા છે. વરસાદ પડતાંની સાથે જ જમીન તૈયાર કરીને વાવણીની પ્રક્રિયા શરૂ કરવા માટે ખેડૂતોમાં ભારે ઉત્સુકતા જોવા મળી રહી છે, જેને પગલે વહેલી સવારથી જ તાલુકા મથકે આવેલી વિવિધ ખાતર અને બિયારણની દુકાનો પર ખેડૂતોની લાંબી કતારો અને ભીડ જોવા મળી રહી છે.
સ્થાનિક એગ્રો કેન્દ્રો પરથી ખેડૂતો પોતાની પસંદગીના ઉત્તમ ગુણવત્તાયુક્ત બિયારણ અને ખાતરની ખરીદીને પ્રાધાન્ય આપી રહ્યા છે. ચાલુ વર્ષે ચોમાસું સમયસર અને સારું રહેવાની આશા હોવાથી ગ્રામીણ અર્થતંત્રમાં પણ નવી ઉર્જાનો સંચાર થયો છે. આગામી દિવસોમાં જો વરસાદનું આ જ પ્રકારે સાનુકૂળ વાતાવરણ જળવાઈ રહેશે, તો વાવણીની કામગીરી વધુ ઝડપી બનશે અને સમગ્ર પંથક લીલોછમ થઈ જશે તેવી આશા સેવાઈ રહી છે.
