MORBI:મોરબીના ગોરખીજડીયા પ્રાથમિક શાળામાં ‘પ્રવેશોત્સવ’ની ઉત્સાહભેર ઉજવણી: સંસ્કૃત કક્ષનું ઉદ્ઘાટન અને બાળકો માટે પાણીપુરીની મજા
મોરબીના ગોરખીજડીયા પ્રાથમિક શાળામાં ગુજરાત સરકાર પ્રેરિત ‘શાળા પ્રવેશોત્સવ’ કાર્યક્રમ ખૂબ જ હર્ષોલ્લાસ સાથે યોજાઈ ગયો. આ પ્રસંગે શાળાના આંગણે પગ મૂકતા નાનકડા ભૂલકાઓનું ભવ્ય સ્વાગત કરવામાં આવ્યું હતું.
કાર્યક્રમ અંતર્ગત શાળાની બાલવાટિકામાં નવપ્રવેશ મેળવતા માસૂમ ભૂલકાઓને કુમકુમ તિલક કરી, આવકારવામાં આવ્યા હતા. ઉપસ્થિત મહાનુભાવોના હસ્તે તમામ નવપ્રવેશી બાળકોને શૈક્ષણિક ‘સ્કૂલ કીટ’ અર્પણ કરવામાં આવી હતી. કીટ મેળવીને બાળકોના ચહેરા પર અનોખી ખુશી જોવા મળી હતી.
આ ઉત્સવને દીપાવવા માટે ગામના સરપંચ શ્રી ગૌતમભાઈ મોરડીયા, શાળા એસ.એમ.સી. (SMC) ના અધ્યક્ષ શ્રી અશ્વિનભાઈ ગોરીયા, ગામના અન્ય અગ્રણી આગેવાનો તેમજ વડીલો મોટી સંખ્યામાં હાજર રહ્યા હતા. ગામના તમામ સ્નેહીજનોએ સાથે મળીને શિક્ષણના આ મહાપર્વને ઉત્સાહભેર ઉજવ્યો હતો.
આ પ્રવેશોત્સવના વિશેષ અવસરે, રાજ્યપાલશ્રી દ્વારા શાળાને અર્પણ કરવામાં આવેલા ખાસ ‘સંસ્કૃત કક્ષ’ નું વિધિવત ઉદ્ઘાટન ગામના સરપંચ શ્રી ગૌતમભાઈ મોરડીયાના વરદહસ્તે કરવામાં આવ્યું હતું. આ કક્ષ આગામી સમયમાં બાળકોના ભાષાકીય અને સાંસ્કૃતિક વિકાસમાં મહત્વનું યોગદાન આપશે.
કાર્યક્રમને વધુ આનંદદાયક બનાવવા માટે શાળાના આચાર્ય શ્રી પંકજભાઈ ઠોરીયા દ્વારા એક અનોખી પહેલ કરવામાં આવી હતી. તેમના તરફથી શાળાના તમામ બાળકોને ભાવતી અને ચટાકેદાર પાણીપુરીનું ભોજન કરાવવામાં આવ્યું હતું. પ્રવેશોત્સવના શૈક્ષણિક માહોલ સાથે પાણીપુરીની જ્યાફત માણીને તમામ બાળકો અને વાલીઓ ખુશખુશાલ વદને છૂટા પડ્યા હતા. ગોરખીજડીયા શાળાનો આ પ્રવેશોત્સવ માત્ર સરકારી કાર્યક્રમ ન રહેતા, સમગ્ર ગામ માટે એક યાદગાર ઉત્સવ બની રહ્યો હતો.
