MORBI:મોરબીના જેતપર આંદોલનનો ૧૭મો દિવસ: સરકારની જાહેરાત બાદ પણ આંદોલન યથાવત, પરિપત્ર આવ્યા પછી જ અંતિમ નિર્ણય લેવાશે
MORBI:મોરબીના જેતપર આંદોલનનો ૧૭મો દિવસ: સરકારની જાહેરાત બાદ પણ આંદોલન યથાવત, પરિપત્ર આવ્યા પછી જ અંતિમ નિર્ણય લેવાશે
જેતપર ખાતે ખેડૂતોના વિવિધ પ્રશ્નોને લઈને છેલ્લા ૧૭ દિવસથી ચાલી રહેલું આમરણાંત ઉપવાસ આંદોલન હજુ પણ ચાલુ રહેશે. સરકાર દ્વારા કરવામાં આવેલી તાજેતરની જાહેરાત અંગે આજે આંદોલનના ૧૭માં દિવસે ખેડૂત આંદોલન સમિતિ દ્વારા એક પ્રેસ કોન્ફરન્સ યોજીને પોતાની પ્રતિક્રિયા આપવામાં આવી હતી. સમિતિએ સ્પષ્ટ કર્યું છે કે સરકારની જાહેરાતનો સત્તાવાર પરિપત્ર (જિઆર) આવ્યા બાદ તેનો ઊંડાણપૂર્વક અભ્યાસ કરવામાં આવશે અને ત્યાર પછી જ આંદોલન સમેટવું કે નહીં તેનો આખરી નિર્ણય લેવાશે.
સરકારની જાહેરાત માત્ર મૌખિક કે અખબારી યાદી પૂરતી ન રહેતા, જ્યાં સુધી તેનો સત્તાવાર પરિપત્ર સમિતિના હાથમાં ન આવે ત્યાં સુધી કોઈ ઉતાવળિયો નિર્ણય લેવામાં આવશે નહીં.
પરિપત્ર આવ્યા બાદ સમિતિના તમામ સભ્યો અને ખેડૂતો તેનો અભ્યાસ કરશે. ત્યાં સુધી ઉપવાસ અને આંદોલન પૂર્વવત ચાલુ રાખવાનો મક્કમ નિર્ણય લેવાયો છે.
નેહુલ અમૃતિયાનું નિવેદન: છેલ્લા ૧૭ દિવસથી આમરણાંત ઉપવાસ પર બેસેલા આંદોલનકારી નેહુલ અમૃતિયાએ પત્રકારો સાથેની વાતચીતમાં જણાવ્યું હતું કે, ખેડૂતોના હિત માટે આ લડત ચલાવવામાં આવી રહી છે, તેથી સરકારના સત્તાવાર લેખિત આદેશની રાહ જોવી જરૂરી છે.
“સરકારે જાહેરાત કરી છે તે આવકારદાયક છે, પરંતુ જ્યાં સુધી સત્તાવાર પરિપત્ર બહાર ન પડે અને અમે તેનો અભ્યાસ ન કરીએ, ત્યાં સુધી અમારું આંદોલન અને ઉપવાસ ચાલુ રહેશે.”— નેહુલ અમૃતિયા (આંદોલનકારી)
ખેડૂત સમિતિના આ વલણથી હવે સૌની નજર સરકારના સત્તાવાર પરિપત્ર અને તેના આધારે લેવાનારા સમિતિના આગામી નિર્ણય પર ટકેલી છે.
