ગુજરાતમાં ચોમાસું સક્રિય બનતા રાજ્યભરમાં મેઘરાજાએ ધમાકેદાર બેટિંગ, ઉત્તર ગુજરાત અને કચ્છ માટે રેડ એલર્ટ
ગુજરાતમાં ચોમાસાની જમાવટ વચ્ચે રાજ્યના મોટાભાગના વિસ્તારોમાં મેઘરાજા મુક્ત મને વરસી રહ્યા છે. સ્ટેટ ઇમરજન્સી ઓપરેશન સેન્ટર (SEOC) ના તાજેતરના ડેટા અનુસાર, આજે સવારે 6:00 વાગ્યાથી સાંજના 4:00 વાગ્યા સુધીના માત્ર 10 કલાકના સમયગાળામાં રાજ્યના 250 તાલુકાઓમાં નોંધપાત્ર વરસાદ નોંધાયો છે. વરસાદની તીવ્રતાના આધારે હવામાન વિભાગે ઉત્તર ગુજરાત, કચ્છ અને મધ્ય ગુજરાતના ભાગોમાં Red Alert તથા સૌરાષ્ટ્ર અને દક્ષિણ ગુજરાતના મોટાભાગના વિસ્તારોમાં Orange Alert જાહેર કર્યું છે.
ઉત્તર ગુજરાત અને સૌરાષ્ટ્રના વિસ્તારોમાં મેઘરાજાની તોફાની બેટિંગ જોવા મળી છે. રાજ્યના કુલ 2 તાલુકાઓમાં 8 ઇંચથી વધુ, 13 તાલુકાઓમાં 4 ઇંચથી વધુ, 21 તાલુકાઓમાં 3 ઇંચથી વધુ, 53 તાલુકાઓમાં 2 ઇંચથી વધુ અને 106 તાલુકાઓમાં 1 ઇંચથી વધુ સરેરાશ વરસાદ નોંધાયો છે. માત્ર 10 કલાકમાં જ અડધા ગુજરાતમાં 1 ઇંચથી વધુ વરસાદ પડી જતાં અનેક નદી-નાળા છલકાઈ ગયા છે અને નીચાણવાળા વિસ્તારોમાં પાણી ભરાવાના અહેવાલો પ્રાપ્ત થયા છે.
સૌથી વધુ વરસાદ મેળવનારા વિસ્તારોની વાત કરીએ તો પાટણ જિલ્લાનો રાધનપુર તાલુકો સમગ્ર રાજ્યમાં મોખરે રહ્યો છે, જ્યાં માત્ર 10 કલાકમાં 9.25 ઇંચ (235 mm) જેટલો ભારે વરસાદ ખાબક્યો છે. પાટણના જ સાંતલપુર તાલુકામાં 8.94 ઇંચ (227 mm) વરસાદ નોંધાયો છે. વાવ-થરાદ (બનાસકાંઠા) વિસ્તારમાં પણ જળબંબાકાર જેવી સ્થિતિ સર્જાઈ છે, જેમાં ભાભરમાં 6.77 ઇંચ (172 mm) અને દિયોદરમાં 6.73 ઇંચ (171 mm) વરસાદ પડ્યો છે. આ ઉપરાંત મધ્ય ગુજરાતના ખેડા જિલ્લાના મહેમદાબાદમાં 5.55 ઇંચ (141 mm) વરસાદ નોંધાયો છે.
અન્ય પ્રદેશોમાં પડેલા વરસાદના આંકડા જોઈએ તો, મોરબીના વાંકાનેરમાં 4.61 ઇંચ (117 mm) અને સુરેન્દ્રનગરના થાનગઢમાં 4.45 ઇંચ (113 mm) વરસાદ નોંધાયો છે. બનાસકાંઠાના હડાદ અને ઓગડ તાલુકામાં અનુક્રમે 4.45 ઇંચ (113 mm) અને 4.21 ઇંચ (107 mm) વરસાદ પડ્યો છે. ગાંધીનગરના દહેગામમાં 4.21 ઇંચ (107 mm), ખેડાના નડિયાદમાં 4.17 ઇંચ (106 mm), અરવલ્લીના ધંસુરામાં 4.17 ઇંચ (106 mm) અને મહીસાગરના વીરપુરમાં 4.02 ઇંચ (102 mm) વરસાદ ખાબક્યો છે. ટૂંકા સમયગાળામાં પડેલા આ ભારે વરસાદને કારણે સમગ્ર રાજ્યનું સરકારી તંત્ર અને આપત્તિ વ્યવસ્થાપન ટીમ હાઇ એલર્ટ પર છે.
