WAKANER:બહેતર વાંકાનેર, સમૃદ્ધ વાંકાનેર’ની હાકલ: રસ્તા, પાણી, લાઇટ અને પ્રદૂષણ મુદ્દે યુવા કોંગ્રેસ મેદાને, હવે સહી ઝુંબેશથી કાનૂની લડત સુધીનો એલાન
WAKANER:બહેતર વાંકાનેર, સમૃદ્ધ વાંકાનેર’ની હાકલ: રસ્તા, પાણી, લાઇટ અને પ્રદૂષણ મુદ્દે યુવા કોંગ્રેસ મેદાને, હવે સહી ઝુંબેશથી કાનૂની લડત સુધીનો એલાન
“‘દાણાપીઠથી વિવેકાનંદ સર્કલ સુધીના બિસ્માર માર્ગને કેન્દ્રમાં રાખી જનસંપર્ક અભિયાનનો પ્રારંભ; આવેદનપત્ર, ધરણા અને કાયદાકીય કાર્યવાહી માટે કોંગ્રેસની તૈયારી”‘
વાંકાનેર:વાંકાનેર શહેર તથા ગ્રામ્ય વિસ્તારની પ્રાથમિક સુવિધાઓને લઈને વિરોધ પક્ષ કોંગ્રેસે “બહેતર વાંકાનેર, સમૃદ્ધ વાંકાનેર” અભિયાન શરૂ કરી તંત્ર સામે જનઆંદોલનની દિશામાં પગલું ભર્યું છે. યુવા કોંગ્રેસના નેતૃત્વમાં યોજાયેલા જનસંપર્ક કાર્યક્રમમાં શહેરના રસ્તા, પીવાનું ચોખ્ખું પાણી, સ્ટ્રીટ લાઇટ, પ્રદૂષણ સહિતના પ્રજાલક્ષી પ્રશ્નો ઉઠાવવામાં આવ્યા હતા.
અભિયાન દરમિયાન ખાસ કરીને દાણાપીઠથી વિવેકાનંદ સર્કલ સુધીના બિસ્માર માર્ગ અંગે સ્થાનિક નાગરિકોના અભિપ્રાયો લેવામાં આવ્યા હતા. યુવા કોંગ્રેસે આગામી સમયમાં આ માર્ગના નિર્માણ માટે સહી ઝુંબેશ, આવેદનપત્ર, ધરણા-પ્રદર્શન અને જરૂરી હોય તો કાયદાકીય લડત ચલાવવાની જાહેરાત કરી છે. કોંગ્રેસના આગેવાનોના જણાવ્યા મુજબ લોકોના સહયોગથી તંત્રને જવાબદાર બનાવવામાં આવશે અને વિકાસના પ્રશ્ને સતત દબાણ ઉભું કરાશે.આ કાર્યક્રમમાં વાંકાનેર વિધાનસભા કોંગ્રેસ પ્રમુખ આબીદભાઈ ગઢવારા, યુવા કોંગ્રેસ ઉપપ્રમુખ ડો. રુકમુદ્દીન માથકિયા તથા નગરપાલિકા સભ્ય અસરફભાઈ ચૌહાણ સહિત કાર્યકરો અને સ્થાનિક નાગરિકો ઉપસ્થિત રહ્યા હતા. રાજ્યમાં ભાજપની સરકાર સામે કોંગ્રેસ સ્થાનિક સ્તરે વિકાસના મુદ્દાઓને રાજકીય એજન્ડા બનાવી રહી છે. વાંકાનેરમાં શરૂ કરાયેલું “બહેતર વાંકાનેર, સમૃદ્ધ વાંકાનેર” અભિયાન માત્ર વિરોધ પૂરતું નહીં, પરંતુ રસ્તા, પાણી, લાઇટ અને પ્રદૂષણ જેવા રોજિંદા પ્રશ્નોને લોકો સાથે સીધા જોડવાનો પ્રયાસ છે. જો કોંગ્રેસ આ ઝુંબેશને સહી અભિયાન, જાહેર આંદોલન અને કાયદાકીય કાર્યવાહી સુધી લઈ જાય છે તો સ્થાનિક સ્વરાજ્યની રાજનીતિમાં વિકાસના મુદ્દાઓ વધુ કેન્દ્રસ્થાને આવી શકે છે. બીજી તરફ તંત્ર અને સત્તાધારી પક્ષ માટે પણ આ પ્રશ્નોના ઝડપી ઉકેલ માટે દબાણ વધવાની શક્યતા નકારી શકાય તેમ નથી.
