મહારાષ્ટ્રથી ગુજરાતમાં ઘુસાડાતો ₹79.46 લાખનો વિદેશી દારૂનો જથ્થો ઝડપાયો,
નર્મદા એલ.સી.બી.ની ચોક્કસ બાતમીના આધારે કાર્યવાહી; 33,552 ક્વાર્ટર, આઈસર કન્ટેનર સહિત મુદ્દામાલ જપ્ત, રાજસ્થાનનો યુવક ઝડપાયો
વાત્સલ્યમ સમાચાર
પ્રતિનિધી : જેસિંગ વસાવા
નર્મદા જિલ્લામાં દારૂના ગેરકાયદે વેપાર સામે પોલીસને વધુ એક મોટી સફળતા મળી છે. એલ.સી.બી. નર્મદાની ટીમે ડેડીયાપાડા પોલીસ સ્ટેશન વિસ્તારમાંથી મહારાષ્ટ્ર તરફથી ગુજરાતમાં ઘુસાડવામાં આવી રહેલો ₹79,46,984નો વિદેશી દારૂનો જથ્થો ઝડપી પાડી એક આરોપીની ધરપકડ કરી છે, જ્યારે અન્ય એક આરોપીને વોન્ટેડ જાહેર કરવામાં આવ્યો છે.
પોલીસ મહાનિરીક્ષક વડોદરા વિભાગ શ્રી સંદીપ સિંહ તથા નર્મદા જિલ્લા પોલીસ અધિક્ષક શ્રી વિશાખા ડબરાલના માર્ગદર્શન હેઠળ જિલ્લામાં દારૂના ગેરકાયદે ધંધા સામે સઘન ઝુંબેશ ચાલી રહી છે. તે અંતર્ગત પોલીસ ઇન્સ્પેક્ટર આર.જી. ચૌધરીના માર્ગદર્શન હેઠળ એલ.સી.બી.ની ટીમ ડેડીયાપાડા–સાગબારા આંતરરાજ્ય સરહદ વિસ્તારમાં પેટ્રોલિંગમાં હતી.
દરમિયાન એ.એચ.ટી.યુ.ના પીએસઆઈ જે.આર. ડામોરને ચોક્કસ બાતમી મળી હતી કે MH-04-JK-9319 નંબરનું ટાટા આઈસર કન્ટેનર મહારાષ્ટ્ર તરફથી ઘનશેરા ચેકપોસ્ટ થઈ ડેડીયાપાડા તરફ વિદેશી દારૂનો જથ્થો લઈને આવી રહ્યું છે. બાતમીના આધારે નિવાલ્દા સ્થિત નાયરા પેટ્રોલ પંપ નજીક પોલીસ દ્વારા વોચ ગોઠવવામાં આવી હતી.
શંકાસ્પદ કન્ટેનરને અટકાવી તપાસ કરતા તેમાંથી રોયલ બ્લુ માલ્ટ વ્હિસ્કીના 180 મી.લી.ના 33,552 ક્વાર્ટર મળી આવ્યા હતા. દારૂના જથ્થાની કિંમત ₹64,41,984 હોવાનું બહાર આવ્યું હતું. ઉપરાંત ₹15 લાખનું ટાટા આઈસર કન્ટેનર, ₹5 હજારનો મોબાઈલ ફોન તેમજ બિલ્ટી અને અન્ય દસ્તાવેજો સહિત કુલ ₹79,46,984નો પ્રોહિબિશન મુદ્દામાલ જપ્ત કરવામાં આવ્યો હતો.
પોલીસે રાજસ્થાનના બાડમેર જિલ્લાના **ઓમપ્રકાશ ભાખરારામ બિશ્નોઈ (ઉ.વ. 22)**ની ધરપકડ કરી છે, જ્યારે મહાદેવ રાજપુતને ફરાર જાહેર કરી તેની શોધખોળ હાથ ધરી છે.
દારૂના ગેરકાયદે નેટવર્ક સુધી પહોંચવા તપાસ તેજ
પ્રાથમિક તપાસમાં દારૂનો જથ્થો મહારાષ્ટ્રથી ગુજરાતમાં સપ્લાય માટે લાવવામાં આવી રહ્યો હોવાનું સામે આવ્યું છે. સમગ્ર રેકેટમાં અન્ય કોણ-કોણ સંડોવાયેલા છે અને દારૂ ક્યાં પહોંચાડવાનો હતો તે અંગે પોલીસે વધુ તપાસ શરૂ કરી છે.
આ સમગ્ર ઓપરેશનમાં પીઆઈ આર.જી. ચૌધરી, પીએસઆઈ એમ.આર. વાળા, પીએસઆઈ જે.આર. ડામોર, એએસઆઈ મોતીરામ સંજયભાઈ તેમજ એલ.સી.બી. નર્મદાની ટીમના અન્ય પોલીસ અધિકારીઓ અને કર્મચારીઓએ મહત્વપૂર્ણ ભૂમિકા ભજવી હતી.
દારૂના ગેરકાયદે વેપાર સામે નર્મદા પોલીસની આ કાર્યવાહી જિલ્લામાં ચર્ચાનો વિષય બની છે. પોલીસે જણાવ્યું છે કે આવા ગુનાઓ સામે આગામી સમયમાં પણ સતત અને કડક કાર્યવાહી ચાલુ રહેશે.
