સુંદરપુરમાં નવી પાણીની ટાંકીના નિર્માણનું ખાતમુહૂર્ત સંપન્ન
90/10 યોજના હેઠળ ગામને મળશે પીવાના પાણીની વધુ સારી સુવિધા; બહેનોના હસ્તે પૂજન-વિધિથી કરાયો શુભ પ્રારંભ
વાત્સલ્યમ સમાચાર
સૈયદજી બુખારી વિજાપુર
વિજાપુર તાલુકાના સુંદરપુર ગામમાં રાજ્ય સરકારની 90/10 યોજના અંતર્ગત નવી પાણીની ટાંકીના નિર્માણનું ખાતમુહૂર્ત ધાર્મિક વિધિ અને પૂજન સાથે સંપન્ન થયું હતું. કાર્યક્રમની વિશેષતા એ રહી કે ખાતમુહૂર્તની શુભ વિધિ ગામની બહેનોના હસ્તે કરવામાં આવી હતી, જેને કારણે કાર્યક્રમને સામાજિક અને સાંસ્કૃતિક મહત્વ પ્રાપ્ત થયું હતું.
આ પ્રસંગે વિજાપુરના ધારાસભ્ય ડૉ. સી. જે. ચાવડા મુખ્ય મહેમાન તરીકે ઉપસ્થિત રહ્યા હતા. તેમની સાથે તાલુકા પંચાયત પ્રમુખ ચંદ્રિકાબેન પરમાર, ડેલિગેટ વિનોદભાઈ કે. પટેલ, મહેસાણા ટીમના મનીષભાઈ અને કિન્નરીબેન, નરેન્દ્રસિંહ, સુંદરપુરના સરપંચ કમલેશભાઈ પટેલ, ડેલિગેટ સરપંચ પહેલાદજી ઠાકોર, તલાટી મીનાક્ષીબેન, ગ્રામ પંચાયતના સભ્યો તેમજ મોટી સંખ્યામાં ગ્રામજનો ઉપસ્થિત રહ્યા હતા.
90/10 યોજના હેઠળ ગામની પ્રતીકાત્મક ભાગીદારી સાથે સરકાર દ્વારા 90 ટકા સહાય આપવામાં આવી રહી છે. આ યોજના અંતર્ગત નવી પાણીની ટાંકીનું નિર્માણ થતાં સુંદરપુર ગામના લોકોને ભવિષ્યમાં પીવાના પાણીની વધુ સારી, નિયમિત અને સુવિધાજનક વ્યવસ્થા ઉપલબ્ધ બનશે.
કાર્યક્રમના અંતે ધારાસભ્ય ડૉ. સી. જે. ચાવડાએ ઉપસ્થિત ગ્રામજનોને સંબોધતા સરકારની વિવિધ જનકલ્યાણકારી યોજનાઓનો મહત્તમ લાભ લેવા અનુરોધ કર્યો હતો. તેમણે ગામના સર્વાંગી વિકાસ માટે સૌના સહયોગની જરૂરિયાત પર ભાર મૂક્યો હતો.
પૂજન-વિધિ, શુભેચ્છાઓ અને ગ્રામજનોના ઉત્સાહભર્યા સહભાગ સાથે સમગ્ર કાર્યક્રમ સફળતાપૂર્વક પૂર્ણ થયો હતો.
