વાત્સલ્યમ્ સમાચાર,
પૂજા ઠક્કર – મુંદરા કચ્છ.
કચ્છ કલેક્ટરશ્રીના હસ્તે વાંકી ગામમાં આધુનિક ગૌશાળા અને ‘અદાણી વન’નું ભવ્ય લોકાર્પણ
૦૦૦
અદાણી ફાઉન્ડેશન દ્વારા કચ્છને હરિયાળું અને પર્યાવરણમૈત્રી બનાવવાના સંકલ્પને વધુ બળ મળ્યું
* બે અગત્યની પહેલ: અદાણી ફાઉન્ડેશન દ્વારા મુન્દ્રા તાલુકાના વાંકી ગામ ખાતે આધુનિક સુવિધાઓથી સજ્જ વિશાળ ગૌશાળા અને ‘અદાણી વન’નું ઉદ્ઘાટન કરવામાં આવ્યું.
* આધુનિક ગૌશાળા: ૬૦૦થી વધુ ગાયો માટે તમામ ઋતુઓમાં આરામદાયક, સ્વચ્છ અને સુવિધાસભર આશ્રયસ્થાન ઊભું કરાયું, જે પશુ કલ્યાણ અને ગૌસંવર્ધનનું કેન્દ્ર બનશે.
* ‘અદાણી વન’નું નિર્માણ: મિયાવાકી પદ્ધતિથી ગામના વથાણ વિસ્તારમાં ૪૫થી વધુ પ્રજાતિના ૫,૦૦૦થી વધુ વૃક્ષોનું રોપણ કરી ગીચ વન વિકસાવાયું.
* હરિયાળા કચ્છનો સંકલ્પ: વર્ષ ૨૦૨૬માં કચ્છમાં ૫૦,૦૦૦થી વધુ વૃક્ષો વાવવાનો સંકલ્પ; અત્યાર સુધીમાં ૩ લાખ વૃક્ષો સાથે ૨૫થી વધુ ‘અદાણી વન’નું સફળ નિર્માણ.
મુંદરા, તા. ૯ ઓગસ્ટ ૨૦૨૬:
અદાણી ફાઉન્ડેશન દ્વારા મુન્દ્રા તાલુકાના વાંકી ગામમાં ગ્રામીણ વિકાસ, પશુ કલ્યાણ અને પર્યાવરણ સંરક્ષણને એકતાંતરે સાંકળતી બહુમુખી પહેલો હાથ ધરવામાં આવી છે. જેના ભાગરૂપે આધુનિક સુવિધાઓથી સજ્જ વિશાળ ગૌશાળાનું લોકાર્પણ અને મિયાવાકી પદ્ધતિ આધારિત “અદાણી વન”નું ઉદ્ઘાટન કરવામાં આવ્યું છે. આ કાર્યક્રમ વિશ્વ પર્યાવરણ દિવસ ૨૦૨૬ની વૈશ્વિક થીમ “Inspired by Nature. For Climate. For Our Future.” સાથે સુસંગત રહીને ટકાઉ વિકાસ પ્રત્યે અદાણી ફાઉન્ડેશનની દ્રઢ કટિબદ્ધતા દર્શાવે છે.
વાંકી ગામમાં વિકસાવાયેલી આ અત્યાધુનિક ગૌશાળામાં ૬૦૦થી વધુ ગાયો માટે સુરક્ષિત, સ્વચ્છ અને ત્રણેય ઋતુઓમાં અનુકૂળ રહે તેવું આરામદાયક વાતાવરણ ઊભું કરાયું છે. આ ઉપરાંત, ગામના વથાણ વિસ્તારમાં નિર્માણ પામેલા ‘અદાણી વન’માં ૪૫થી વધુ પ્રજાતિના સ્થાનિક વૃક્ષો, ફળઝાડ, વેલીઓ, ફૂલછોડ અને ઔષધીય વનસ્પતિઓ સહિત ૫,૦૦૦થી વધુ છોડવા વાવવામાં આવ્યા છે. કચ્છ જેવા અર્ધ-શુષ્ક પ્રદેશમાં જૈવવિવિધતા જાળવવા અને પર્યાવરણીય સંતુલન માટે આ હરિત વિસ્તાર ખૂબ મહત્વપૂર્ણ સાબિત થશે. અદાણી ફાઉન્ડેશને વર્ષ ૨૦૨૬માં સમગ્ર કચ્છમાં ૫૦,૦૦૦થી વધુ વૃક્ષો વાવવાનો લક્ષ્યાંક રાખ્યો છે. નોંધનીય છે કે, અત્યાર સુધીમાં કચ્છ જિલ્લામાં ૩ લાખથી વધુ વૃક્ષોના વાવેતર સાથે ૨૫થી વધુ ‘અદાણી વન’ સફળતાપૂર્વક વિકસાવવામાં આવ્યા છે.
આ પ્રસંગે મુખ્ય અતિથિ તરીકે ઉપસ્થિત કચ્છ જિલ્લા કલેક્ટર શ્રી અનિલ રાણાવસિયા (IAS) એ કાર્યક્રમમાં મહિલાઓની બહોળી હાજરીને ખાસ બિરદાવી હતી. તેમણે પર્યાવરણ સંરક્ષણની સાથે સ્વચ્છતાને પણ પ્રાધાન્ય આપવા આહ્વાન કર્યું હતું અને આગામી વર્ષે વાંકી ગામને સ્વચ્છતા માટે એવોર્ડ મળે તેવા પ્રેરણાદાયી કાર્યો કરવા ગ્રામજનોને પ્રોત્સાહિત કર્યા હતા.
કાર્યક્રમમાં APSEZ મુન્દ્રા પોર્ટના એક્ઝિક્યુટિવ ડિરેક્ટર શ્રી રક્ષિત શાહે જણાવ્યું હતું કે, “વૃક્ષારોપણ એ માત્ર પર્યાવરણ સંરક્ષણ પૂરતું સીમિત નથી, પરંતુ આવનારી પેઢીઓ માટે એક સુરક્ષિત અને સ્વસ્થ ભવિષ્યનું નિર્માણ કરવાનું સશક્ત માધ્યમ છે. ગૌશાળાના માધ્યમથી પશુ કલ્યાણ માટે ઊભી કરાયેલી આધુનિક સુવિધાઓ અત્યંત પ્રશંસનીય છે.”
આ કાર્યક્રમમાં વાંકી ગામના સરપંચ શ્રી ભરતસિંહ જાડેજા, અદાણી ગ્રુપના અધિકારીઓ અને મોટી સંખ્યામાં ગ્રામજનો ઉપસ્થિત રહ્યા હતા. ગૌસેવા, સમુદાય આધારિત વનીકરણ અને પર્યાવરણ સંરક્ષણના આ સરાહનીય પ્રયાસો દ્વારા અદાણી ફાઉન્ડેશન કચ્છને વધુ હરિયાળું અને પર્યાવરણમૈત્રી બનાવવા માટે સતત કાર્યરત છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
