કચ્છમાં ESI એક્ટ લાગુ કરવા અંગેની PILમાં ગુજરાત હાઈકોર્ટે કેન્દ્ર સરકાર સામે લાલ આંખ કરી

સુનાવણી દરમિયાન હાઈકોર્ટના ચીફ જસ્ટિસે કેન્દ્ર સરકાર અને આસિસ્ટન્ટ સોલિસિટર જનરલની ઓફિસની નિષ્ક્રિયતા સામે ગંભીર સવાલો ઉઠાવ્યા હતા. કોર્ટે આકરી ટકોર કરતાં જણાવ્યું હતું કે, ‘કેન્દ્ર સરકાર કે આસિસ્ટન્ટ સોલિસિટર જનરલ (ASG)ની ઓફિસમાંથી હાઈકોર્ટના નિર્દેશોનો જવાબ સુદ્ધાં આપવામાં આવતો નથી. આ કોઈ એકલ-દોકલ ઘટના નથી, વારંવાર આવું બને છે. લોકોના આરોગ્ય સાથે જોડાયેલા મહત્ત્વના મુદ્દે જવાબ આપવા માટે પણ કોર્ટમાં કોઈ હાજર રહેતું નથી, જે અત્યંત કમનસીબ અને ગંભીર બાબત છે.’

અરજીમાં કરાયેલી રજૂઆત અનુસાર, કચ્છ જિલ્લામાં અનેક એવા જોખમી અને કેમિકલ ઉદ્યોગો આવેલા છે જે કામદારોના આરોગ્ય માટે જોખમી છે. છતાં, ત્યાંના ખાનગી ઉદ્યોગોમાં ઈએસઆઈ કાયદાનો અમલ કરાવવામાં આવતો નથી. કોર્ટે નોંધ્યું હતું કે, ઈએસઆઈ કાયદાના અમલ પ્રત્યેની બેદરકારીને કારણે હજારો શ્રમિકો અને મજૂરોના આરોગ્ય અને સામાજિક સુરક્ષાનું ભવિષ્ય અધ્ધરતાલ લટકી રહ્યું છે.

હાઈકોર્ટે સ્પષ્ટ શબ્દોમાં ટકોર કરી હતી કે, વૈધાનિક રીતે દેશના કોઈપણ કાયદાનો અમલ રાજ્યના દરેક જિલ્લામાં સરખી રીતે થવો જોઈએ. કોઈ ચોક્કસ જિલ્લાને તેમાંથી બાકાત રાખી શકાય નહીં. કામદારોની સોશિયલ સિક્યોરિટી અને આરોગ્ય સંબંધિત સુવિધાઓ માટે કચ્છમાં તાત્કાલિક ઈએસઆઈ એક્ટનો અમલ થાય તે જરૂરી છે.