મન કી બાતના 137મા એપિસોડનું થલતેજ વોર્ડમાં મુખ્યમંત્રી ભૂપેન્દ્ર પટેલે બૂથ કાર્યકર્તાઓ અને નાગરિકો સાથે સામૂહિક શ્રવણ કર્યું
રિપોર્ટર
હિતેન્દ્ર ગોસાઈ
અમદાવાદ
અમદાવાદ: વડાપ્રધાન નરેન્દ્ર મોદીના લોકપ્રિય રેડિયો કાર્યક્રમ મન કી બાતના 137મા એપિસોડનું આજે દેશભરમાં તેમજ ગુજરાતમાં વિવિધ સ્થળોએ સામૂહિક શ્રવણ કરવામાં આવ્યું હતું. અમદાવાદના ઘાટલોડિયા વિધાનસભા મતવિસ્તારના થલતેજ વોર્ડ ખાતે મુખ્યમંત્રી ભૂપેન્દ્ર પટેલે બૂથ સ્તરના કાર્યકર્તાઓ, સ્થાનિક આગેવાનો અને નાગરિકો સાથે મન કી બાતના કાર્યક્રમનું સામૂહિક શ્રવણ કર્યું હતું.
મુખ્યમંત્રીએ પોતાના મતવિસ્તારના નાગરિકો અને બૂથ કાર્યકર્તાઓ સાથે પ્રત્યક્ષ ઉપસ્થિત રહીને વડાપ્રધાનના વિચારો અને દેશવાસીઓને અપાયેલા સંદેશને સાંભળ્યો હતો. આ પ્રસંગે સંગઠનની શક્તિ, જનસહભાગિતા અને જનસેવાના સંકલ્પને વધુ મજબૂત બનાવવાનો સંદેશ પણ આપવામાં આવ્યો હતો.
મન કી બાત કાર્યક્રમ માત્ર સંવાદનું માધ્યમ નહીં, પરંતુ દેશના વિવિધ વિસ્તારોમાં લોકો દ્વારા કરવામાં આવી રહેલા સકારાત્મક અને પ્રેરણાદાયી પ્રયાસોને સમગ્ર દેશ સમક્ષ લાવવાનું એક મહત્વપૂર્ણ માધ્યમ બન્યું છે. કાર્યક્રમના માધ્યમથી સામાજિક પરિવર્તન, સ્વચ્છતા, પર્યાવરણ જતન, સ્થાનિક કલા-સંસ્કૃતિ, મહિલા સશક્તિકરણ અને આત્મનિર્ભરતા સહિતના વિવિધ વિષયો પર નાગરિકોને પ્રેરણા આપવામાં આવે છે.
વડાપ્રધાન દ્વારા વિવિધ ક્ષેત્રોમાં થઈ રહેલા નવા પ્રયોગો, સ્ટાર્ટઅપ્સ અને ટેકનોલોજીના સકારાત્મક ઉપયોગની પ્રશંસા કરવામાં આવી હતી. વોકલ ફોર લોકલના સંદેશને વધુ વ્યાપક બનાવતા સ્થાનિક ઉત્પાદનો, હસ્તકલા, કલા-સંસ્કૃતિ અને સ્વદેશી ચીજવસ્તુઓને પ્રોત્સાહન આપવા માટે નાગરિકોને આહ્વાન કરવામાં આવ્યું હતું. આત્મનિર્ભર ભારતના નિર્માણમાં સ્થાનિક સ્તરે કરવામાં આવતા પ્રયાસો મહત્વપૂર્ણ બની શકે છે તેમ પણ જણાવાયું હતું.
મન કી બાતમાં સ્વચ્છતા અભિયાન અને પર્યાવરણ સંરક્ષણ માટે દેશના વિવિધ વિસ્તારોમાં થઈ રહેલા પ્રેરણાદાયી પ્રયાસોને પણ રેખાંકિત કરવામાં આવ્યા હતા. નારી શક્તિના માધ્યમથી મહિલાઓ દ્વારા વિવિધ ક્ષેત્રોમાં કરવામાં આવી રહેલી સિદ્ધિઓ અને સમાજમાં થઈ રહેલા સકારાત્મક પરિવર્તનનો પણ ઉલ્લેખ કરવામાં આવ્યો હતો. ખેડૂતો દ્વારા આધુનિક ટેકનોલોજી સાથે પરંપરાગત ખેતી પદ્ધતિઓનો સમન્વય કરીને કરવામાં આવી રહેલા નવીન પ્રયાસોની પણ સરાહના કરવામાં આવી હતી.
યુવા પેઢીને નશાથી દૂર રાખવા માટે નશા મુક્ત ભારત અભિયાનને વધુ વેગ આપવા માટે પણ વડાપ્રધાને દેશવાસીઓને આહ્વાન કર્યું હતું. દેશના યુવાનોને સકારાત્મક દિશામાં આગળ વધીને વિકસિત ભારતના નિર્માણમાં સક્રિય યોગદાન આપવા માટે પ્રેરિત કરવામાં આવ્યા હતા.
આ ઉપરાંત, કૃષ્ણા શેષાદ્રી દ્વારા નિર્મિત ભારતરાજ્ય વેબસાઇટના પ્રયાસોનો વિશેષ ઉલ્લેખ કરવામાં આવ્યો હતો. દેશ અને સમાજને લગતી વિવિધ માહિતી તથા પ્રયાસોને એકત્રિત કરીને લોકો સુધી પહોંચાડવાના આ પ્રકારના પ્રયાસોને પ્રોત્સાહિત કરવામાં આવ્યા હતા.
થલતેજ વોર્ડ ખાતે યોજાયેલા આ સામૂહિક શ્રવણ કાર્યક્રમમાં બૂથ સ્તરના કાર્યકર્તાઓ, પદાધિકારીઓ, સ્થાનિક આગેવાનો અને મોટી સંખ્યામાં નાગરિકો ઉપસ્થિત રહ્યા હતા. કાર્યક્રમ દરમિયાન ઉપસ્થિત સૌએ વડાપ્રધાનના સંદેશને સાંભળ્યો હતો અને દેશના વિકાસમાં જનભાગીદારી વધારવા તથા સકારાત્મક વિચારોને સમાજના દરેક વર્ગ સુધી પહોંચાડવાનો સંકલ્પ વ્યક્ત કર્યો હતો.
મન કી બાતના સામૂહિક શ્રવણ દ્વારા સ્થાનિક સ્તરે નાગરિકો અને કાર્યકર્તાઓ વચ્ચે સંવાદ તથા જનસંપર્કને વધુ મજબૂત બનાવવાનો પ્રયાસ કરવામાં આવ્યો હતો. આ પ્રસંગે રાષ્ટ્ર નિર્માણમાં દરેક નાગરિકની ભૂમિકા મહત્વપૂર્ણ હોવાનું પણ રેખાંકિત કરવામાં આવ્યું હતું.
