મણિપુરમાં ફરીથી હિંસા ૫૦ જેટલી મહિલાઓને ઈજા પહોંચી, ઈમ્ફાલમાં બે દિવસ સંપૂર્ણ કર્ફ્યૂ જાહેર

મણિપુરમાં ફરીથી હિંસા ફાટી નીકળી છે. પોલીસે જે પાંચ આરોપીઓની હથિયારો સાથે ધરપકડ કરી હતી એને છોડાવવા માટે પ્રદર્શનો થયા હતા. ટોળાએ પોલીસની ગાડીઓને રોકી હતી અને પોલીસ સ્ટેશનો પર પણ હુમલો કરવાની કોશિશ કરી હતી. એમાં મહિલાઓની સંખ્યા મોટા પ્રમાણમાં હતી. પોલીસ સાથેની અથડામણમાં ૫૦ જેટલી મહિલાઓને ઈજા પહોંચી હતી. ઈમ્ફાલમાં બે દિવસનો કર્ફ્યૂ લગાવી દેવાયો છે.

આ પ્રદર્શનો મેતેઈ મહિલાઓએ કર્યા હતા. મૈતેઈ મહિલાઓએ દાવો કર્યો હતો કે પોલીસ કુકી સમુદાયમાંથી કોઈની ધરપકડ કરતી નથી. માત્ર મૈતેઈ સમુદાયના યુવાનોને જ નિશાન બનાવે છે. સરકારે થોડા દિવસથી કર્ફ્યૂમાં છૂટછાટ આપી હતી. તેનાથી જનજીવન થાળે પડશે એવી અપેક્ષા હતી. સંવેદનશીલ જિલ્લામાં ફરીથી કડક પહેરો ભરવાનો આદેશ સુરક્ષા દળોને અપાયો છે.