errors અમદાવાદમાં ભગવાન જગન્નાથજીની ૧૪૯મી રથયાત્રા પૂર્વે નેત્રોત્સવ વિધિ સંપન્ન, ભક્તિમય માહોલ વચ્ચે ધ્વજારોહણ અને મહાઆરતી યોજાઈ
રિપોર્ટર
હિતેન્દ્ર ગોસાઈ
અમદાવાદ
અમદાવાદ શહેરમાં ભગવાન જગન્નાથજીની ઐતિહાસિક ૧૪૯મી રથયાત્રા પૂર્વે જમાલપુર સ્થિત જગન્નાથ મંદિરમાં પરંપરાગત નેત્રોત્સવ વિધિ, ધ્વજારોહણ અને મહાઆરતી ભક્તિભાવ અને ધાર્મિક ઉલ્લાસ સાથે સંપન્ન થઈ હતી. અષાઢી બીજના પાવન અવસરે યોજાનારી રથયાત્રા પૂર્વે મંદિરમાં વહેલી સવારથી જ મોટી સંખ્યામાં ભાવિકો ઉમટી પડ્યા હતા અને સમગ્ર મંદિર પરિસર જય જગન્નાથના જયઘોષથી ગુંજી ઉઠ્યું હતું.
આ પ્રસંગે નાયબ મુખ્યમંત્રી હર્ષ સંઘવી તથા ઊર્જા અને અમદાવાદ જિલ્લાના પ્રભારી મંત્રી ઋષિકેશ પટેલ ઉપસ્થિત રહ્યા હતા. નાયબ મુખ્યમંત્રીએ મંદિર પરિસરમાં ધ્વજારોહણ કરીને ભગવાન જગન્નાથજીના દર્શન કર્યા હતા અને મહાઆરતીમાં સહભાગી બની રાજ્યના નાગરિકોની સુખાકારી, સમૃદ્ધિ અને શાંતિ માટે પ્રાર્થના કરી હતી.
પરંપરાગત વિધિ અનુસાર ભગવાનના અણસરના પંદર દિવસ પૂર્ણ થયા બાદ યોજાતી નેત્રોત્સવ વિધિમાં પ્રભુના નવયૌવન દર્શનનો વિશેષ લાભ ભક્તોને મળ્યો હતો. ગર્ભગૃહમાં ભગવાનની આંખો પર રેશમી પાટા બાંધી ધાર્મિક વિધિ પૂર્ણ કરવામાં આવી હતી. આ સાથે ભગવાનને ભવ્ય સોનાવેશમાં શણગારવામાં આવ્યા હતા, જેના દર્શન માટે મોટી સંખ્યામાં શ્રદ્ધાળુઓ ઉમટી પડ્યા હતા. મંદિર પરિસરમાં ભક્તિગીતો, વૈદિક મંત્રોચ્ચાર અને આરતીના સ્વરો વચ્ચે આધ્યાત્મિક માહોલ સર્જાયો હતો.
આ પ્રસંગે હર્ષ સંઘવીએ જણાવ્યું હતું કે ભગવાન જગન્નાથજીની રથયાત્રા માત્ર ધાર્મિક પરંપરા નથી, પરંતુ સમગ્ર ગુજરાતની સાંસ્કૃતિક એકતા, સામાજિક સમરસતા અને લોકઆસ્થાનું જીવંત પ્રતીક છે. રાજ્ય સરકાર રથયાત્રા દરમિયાન દરેક શ્રદ્ધાળુને સુરક્ષિત અને સુવ્યવસ્થિત વાતાવરણ મળી રહે તે માટે તમામ જરૂરી તૈયારીઓ પૂર્ણ કરી રહી છે.
ઋષિકેશ પટેલે જણાવ્યું હતું કે રથયાત્રા ગુજરાતની ગૌરવશાળી પરંપરા છે અને લાખો લોકોની શ્રદ્ધાનું કેન્દ્ર છે. રાજ્ય સરકાર, વહીવટી તંત્ર અને વિવિધ વિભાગો વચ્ચેના સુમેળથી આ વર્ષ પણ રથયાત્રા શાંતિપૂર્ણ અને સફળતાપૂર્વક યોજાય તે માટે તમામ સ્તરે આયોજન કરવામાં આવ્યું છે.
રથયાત્રાને ધ્યાનમાં રાખીને રાજ્ય સરકારે સુરક્ષા વ્યવસ્થાને વિશેષ પ્રાથમિકતા આપી છે. આધુનિક ટેક્નોલોજી, સીસીટીવી કેમેરા, ડ્રોન સર્વેલન્સ, કમાન્ડ એન્ડ કંટ્રોલ સેન્ટર, ક્વિક રિસ્પોન્સ ટીમો તથા સોશિયલ પોલીસિંગ જેવા ઉપાયો દ્વારા સમગ્ર માર્ગ પર સતત નજર રાખવાની વ્યવસ્થા કરવામાં આવી છે. પોલીસ, આરોગ્ય, ફાયર બ્રિગેડ, મહાનગરપાલિકા તથા અન્ય વિભાગો વચ્ચે સંકલન સાધીને શ્રદ્ધાળુઓને જરૂરી તમામ સુવિધાઓ ઉપલબ્ધ કરાવવાના પ્રયાસો કરવામાં આવ્યા છે.
રથયાત્રાના પરંપરાગત માર્ગ પર સ્વચ્છતા, પીવાના પાણી, આરોગ્ય સેવા, ટ્રાફિક વ્યવસ્થા તથા અન્ય નાગરિક સુવિધાઓ માટે પણ વ્યાપક આયોજન કરવામાં આવ્યું છે. વિવિધ સેવાભાવી સંસ્થાઓ અને સ્વયંસેવકો પણ યાત્રાળુઓને સેવા પૂરી પાડવા માટે સક્રિય બન્યા છે.
અમદાવાદની જગન્નાથ રથયાત્રા દેશની સૌથી પ્રાચીન અને ભવ્ય ધાર્મિક પરંપરાઓમાંની એક માનવામાં આવે છે. દર વર્ષે લાખો શ્રદ્ધાળુઓ ભગવાન જગન્નાથ, બલભદ્ર અને સુભદ્રાના દર્શન માટે ઉમટી પડે છે. આ વર્ષે પણ સમગ્ર શહેરમાં રથયાત્રાને લઈને ઉત્સાહ, શ્રદ્ધા અને ભક્તિનો માહોલ જોવા મળી રહ્યો છે.
આ પ્રસંગે પૂર્વ નાયબ મુખ્યમંત્રી નીતિનભાઈ પટેલ, મેયર હિતેશભાઈ બારોટ, જગન્નાથ મંદિરના મહંત દિલીપદાસજી મહારાજ, સાંસદ દિનેશભાઈ મકવાણા, ધારાસભ્યો અમિતભાઈ શાહ, કૌશિકભાઈ જૈન, દિનેશસિંહ કુશવાહ, અમૂલભાઈ ભટ્ટ અને હસમુખભાઈ પટેલ, ડેપ્યુટી મેયર અંજુબેન શાહ, મુખ્યમંત્રીના અગ્ર સચિવ સંજીવ કુમાર, રાજ્ય પોલીસ વડા જી.એસ. મલિક, શહેર પોલીસ કમિશનર અનુપમસિંહ ગેહલોત, મ્યુનિસિપલ કમિશનર બંછાનિધિ પાની, શહેર પ્રમુખ પ્રેરકભાઈ શાહ, સ્ટેન્ડિંગ કમિટીના ચેરમેન કમલેશભાઈ પટેલ, અમદાવાદ મ્યુનિસિપલ કોર્પોરેશનના હોદ્દેદારો, જગન્નાથ મંદિરના ટ્રસ્ટીઓ, વિવિધ આગેવાનો તેમજ મોટી સંખ્યામાં શ્રદ્ધાળુઓ ઉપસ્થિત રહ્યા હતા.
રથયાત્રા પૂર્વે યોજાયેલા આ ધાર્મિક કાર્યક્રમોએ સમગ્ર શહેરમાં ભક્તિ, શાંતિ અને એકતાનો સંદેશ પ્રસરાવ્યો હતો. ભગવાન જગન્નાથજીના આશીર્વાદથી રાજ્યમાં સુખ, સમૃદ્ધિ અને સર્વાંગી વિકાસ થાય તેવી પ્રાર્થના સાથે હજારો ભક્તોએ દર્શનનો લાભ લીધો અને આવનારી ભવ્ય રથયાત્રાને લઈને ઉત્સાહ વ્યક્ત કર્યો.
